So̱ꞌo̱ ni̱ xa̱a̱ a̱ kii̱ꞌ ni̱ ku̱siinꞌ Lot nuu̱ꞌ Abram
13
Sa̱kanꞌ te̱ ni̱ ke̱ta̱ Abram nuu̱ꞌ ñu̱ꞌuꞌ Egipto te̱ kuaꞌa̱n ra̱ nde̱e̱ nuu̱ꞌ ñu̱ꞌuꞌ Neguev, ndiakaꞌ ra̱ ñaꞌ siꞌi ra̱, xiinꞌ sa̱kuuꞌ ña̱ꞌa̱ ña̱ kumiꞌ ra̱, te̱ kuaꞌa̱n tu̱ Lot, saxi̱n ra̱, xiinꞌ ra̱.
2 Te̱ kii̱ꞌ sa̱kanꞌ ndii, xa̱ te̱ vika̱ꞌ xa̱va̱ꞌa̱ nduuꞌ Abram, ni̱ ku̱miꞌ ra̱ kuaꞌa̱ꞌ nuu̱ꞌ ki̱tiꞌ, xiinꞌ plata, xiinꞌ oro.
3 Te̱ nde̱e̱ Neguev ja̱a̱nꞌ ni̱ ki̱e̱e̱ Abram, te̱ ni̱ na̱xa̱a̱ ra̱ ñu̱u̱ Betel, te̱ ni̱ xa̱ꞌa̱ ra̱ vi̱ꞌe̱ toto̱ ku̱nduꞌu̱ꞌ ra̱ te̱i̱n ñu̱u̱ Betel ja̱a̱nꞌ xiinꞌ ñu̱u̱ Hai, miiꞌ xa̱ ni̱ nduꞌu̱ꞌ ra̱ ña̱ nu̱uꞌ. Ndisu̱ kiꞌinꞌ xaanꞌ ni̱ nduꞌu̱ꞌ ra̱ ña̱ kuní ka̱ na̱xaa̱ ra̱ ñu̱u̱ ja̱a̱nꞌ.
4 I̱kanꞌ nduuꞌ miiꞌ ni̱ xa̱ꞌa̱ ra̱ i̱i̱n altar miiꞌ ni̱ na̱soko̱ꞌ ra̱ ki̱tiꞌ nuu̱ꞌ Ndiosí, te̱ tu̱ku̱ ni̱ ni̱ xa̱ꞌaꞌ ra̱ na̱soko̱ꞌ ra̱ ki̱tiꞌ nuu̱ꞌ Yahvé Ndiosí i̱kanꞌ.
5 Te̱ sa̱kanꞌ tu̱ Lot, te̱ kuaꞌa̱n xiinꞌ Abram ndii, vikaꞌ xa̱va̱ꞌa̱ ra̱, sa̱kanꞌ ña̱ kumiꞌ ra̱ kuaꞌa̱ꞌ mbe̱e̱, xiinꞌ si̱ndiki̱ꞌ, xiinꞌ kuaꞌa̱ꞌ vi̱ꞌe̱ toto̱.
6 Te̱ nï̱ ni̱a̱ni̱ nuu̱ꞌ ñu̱ꞌuꞌ ja̱a̱nꞌ ku̱ndi̱e̱e̱ ingaꞌ uvi̱ sa̱aꞌ ra̱, sa̱kanꞌ ña̱ te̱ vikaꞌ va̱ nduuꞌ uvi̱ sa̱aꞌ ra̱, xaꞌa̱ꞌ ja̱a̱nꞌ na nï̱ ndiee̱ ingaꞌ ka̱ ra̱.
7 Te̱ ni̱ ku̱ntaꞌanꞌ te̱ pa̱xto, te̱ xitoꞌ ki̱tiꞌ sana̱ Abram, xiinꞌ te̱ pa̱xto, te̱ xitoꞌ ki̱tiꞌ sana̱ Lot. Te̱ siinꞌ tu̱ku̱ ndii, nuu̱ꞌ ñu̱ꞌuꞌ ja̱a̱nꞌ tu̱ ni̱ ndiee̱ te̱ cananeo, xiinꞌ te̱ ferezeo kii̱ꞌ sa̱kanꞌ.
8 Sa̱kanꞌ na ni̱ kaꞌa̱n Abram xiinꞌ Lot ndii:
―Yooꞌ ndii, vä̱ꞌa̱ yoo a̱ ña̱ kuntaꞌanꞌ e̱ꞌ, ni̱ nde̱e̱ ña̱ kuntaꞌanꞌ te̱ xitoꞌ ki̱tiꞌ sana̱ yuꞌu̱, xiinꞌ te̱ xitoꞌ ki̱tiꞌ sana̱ yoꞌó, sa̱kanꞌ ña̱ i̱i̱n kuuꞌ ya̱ti̱n va̱ e̱ꞌ.
9 Ko̱to̱ u̱nꞌ sa̱a̱ vi̱ꞌ kuaꞌa̱ꞌ ñu̱ꞌuꞌ kanduꞌu̱ꞌ kuaꞌa̱n sa̱aꞌ. Sa̱kanꞌ na kaꞌán ndaꞌvi i̱ xiinꞌ u̱nꞌ ña̱ ku̱vi̱ na̱ka̱xi̱n u̱nꞌ miiꞌ ka̱ kuní mi̱iꞌ u̱nꞌ kuꞌu̱n ku̱nduꞌu̱ꞌ u̱nꞌ, naaꞌ kuꞌu̱n u̱nꞌ nda̱ꞌaꞌ i̱ti̱n e̱ꞌ ndii, yuꞌu̱ kuꞌu̱n nda̱ꞌaꞌ ku̱a̱ꞌa̱ e̱ꞌ, te̱ naaꞌ kuꞌu̱n u̱nꞌ nda̱ꞌaꞌ ku̱a̱ꞌa̱ e̱ꞌ ndii, yuꞌu̱ kuꞌu̱n nda̱ꞌaꞌ i̱ti̱n e̱ꞌ ku̱nduꞌu̱ꞌ i̱ ―ni̱ katyi̱ ra̱.
10 Sa̱kanꞌ te̱ ni̱ nda̱ni̱ꞌi̱ Lot nuu̱ꞌ ra̱, te̱ ni̱ xi̱ni̱ ra̱ ña̱ ka̱niiꞌ yo̱soꞌ i̱ti̱a̱ Jordán nde̱e̱ ni̱ xandi̱koꞌ a̱ nuu̱ꞌ ñu̱u̱ Zoar ndii, i̱i̱n ñu̱ꞌuꞌ miiꞌ köo̱ꞌ kivi̱ꞌ ndokoꞌ ti̱kui nduuꞌ a̱, te̱ nda̱tu̱nꞌ a̱ nde̱e̱ naa ña̱ ta̱ta̱ Yahvé Ndiosí, uun nde̱e̱ naa nda̱tu̱nꞌ ñu̱ꞌuꞌ Egipto. Te̱ sa̱kanꞌ ni̱ kaa̱ꞌ nuu̱ꞌ ñu̱ꞌuꞌ ja̱a̱nꞌ kii̱ꞌ kuní ka̱ sa̱ndo̱ñuꞌuꞌ Yahvé Ndiosí ñu̱u̱ Sodoma xiinꞌ ñu̱u̱ Gomorra.
11 Sa̱kanꞌ te̱ ni̱ na̱ka̱xi̱n Lot ka̱niiꞌ yo̱soꞌ miiꞌ kuaꞌa̱n i̱ti̱a̱ Jordán, te̱ ni̱ ke̱ta̱ ra̱ kuaꞌa̱n ku̱nduꞌu̱ꞌ ra̱ xtoꞌniꞌ miiꞌ ketaꞌ ñu̱ꞌu̱, te̱ ni̱ ku̱siinꞌ ra̱ nuu̱ꞌ xi̱to̱ ra̱ Abram.
12 Abram ni̱ ndoo̱ ku̱nduꞌu̱ꞌ nuu̱ꞌ ñu̱ꞌuꞌ Canaán, te̱ Lot ja̱a̱nꞌ kuaꞌa̱n ku̱nduꞌu̱ꞌ nuu̱ꞌ ñu̱ꞌuꞌ ña̱ ñuꞌuꞌ yo̱soꞌ ya̱ti̱n ñu̱u̱ Sodoma.
13 Te̱ ne̱ yivi̱ꞌ, ne̱ ndieeꞌ ñu̱u̱ Sodoma ja̱a̱nꞌ ndii, ni̱a̱ꞌa xa̱va̱ꞌa̱ ni̱a̱, te̱ xïkuiín ni̱a̱ ña̱ xaaꞌ ni̱a̱ ku̱a̱tyi̱ nuu̱ꞌ Yahvé Ndiosí.
14 Kii̱ꞌ ndi̱ꞌi̱ ni̱ ku̱siinꞌ Lot ja̱a̱nꞌ nuu̱ꞌ Abram, te̱ ni̱ kaꞌa̱n Yahvé Ndiosí xiinꞌ ra̱ ndii:
―Abram, ndo̱ni̱ꞌi̱ nuu̱ꞌ u̱nꞌ vi̱ti̱n, te̱ ko̱to̱ u̱nꞌ ka̱niiꞌ nuu̱ꞌ ñu̱ꞌuꞌ, nde̱e̱ miiꞌ ku̱vi̱ na̱xaa̱ ndu̱tyiꞌ nuu̱ꞌ u̱nꞌ ko̱to̱ u̱nꞌ, miiꞌ ketaꞌ ñu̱ꞌu̱, xiinꞌ miiꞌ ketá a̱, ni̱nu̱, xiinꞌ ninu̱.
15 Sa̱kanꞌ ña̱ ka̱niiꞌ ñu̱ꞌuꞌ ña̱ xitoꞌ u̱nꞌ kaa̱ꞌ ndii, ta̱xi̱ e̱ꞌ ku̱ndu̱u̱ ña̱ꞌa̱ yoꞌó, xiinꞌ si̱a̱niꞌ xikaꞌ u̱nꞌ nde̱e̱ ndiꞌiꞌ ni̱ kivi̱ꞌ.
16 Te̱ nda̱sa̱kuaꞌa̱ꞌ xa̱va̱ꞌa̱ i̱ si̱a̱niꞌ xikaꞌ u̱nꞌ, nde̱e̱ naa kuaꞌa̱ꞌ ya̱kaꞌ nuu̱ꞌ ñu̱ꞌuꞌ i̱i̱n yivi̱ꞌ, te̱ nde̱e̱ naa köo̱ꞌ ku̱vi̱ kaꞌviꞌ ya̱kaꞌ ja̱a̱nꞌ ndii, niiꞌ sa̱kanꞌ tu̱ köo̱ꞌ ku̱vi̱ ka̱ꞌvi̱ si̱a̱niꞌ xikaꞌ u̱nꞌ ja̱a̱nꞌ.
17 Sa̱kanꞌ na kuiiꞌ vi̱ti̱n ndii, ndo̱ndi̱tyi̱ kiꞌi̱ꞌ, te̱ kuꞌu̱n ku̱nu̱ꞌni̱ u̱nꞌ ka̱niiꞌ sa̱a̱ kuaꞌa̱n nuu̱ꞌ ñu̱ꞌuꞌ kaa̱ꞌ, sa̱kanꞌ ña̱ nda̱ꞌaꞌ yoꞌó ta̱xi̱ e̱ꞌ e̱ ―ni̱ katyi̱ a̱ xiinꞌ ra̱.
18 Sa̱kanꞌ te̱ ni̱ ta̱ni̱ Abram vi̱ꞌe̱ toto̱ miiꞌ nduꞌu̱ꞌ ra̱, te̱ ni̱ ke̱ta̱ ra̱ kuaꞌa̱n ku̱nduꞌu̱ꞌ ra̱ xiki̱ꞌ miiꞌ yoo ta̱ntaꞌ, ya̱ti̱n ñu̱u̱ Hebrón, nuu̱ꞌ ñu̱ꞌuꞌ i̱i̱n te̱ naniꞌ Mamré, te̱ ni̱ xa̱ꞌa̱ tu̱ ra̱ i̱i̱n altar miiꞌ ni̱ na̱soko̱ꞌ ra̱ ki̱tiꞌ nuu̱ꞌ Yahvé Ndiosí i̱kanꞌ.