Yoꞌoꞌ kaꞌán a̱ xaꞌa̱ꞌ kii̱ꞌ ni̱ ka̱na̱ Yahvé Ndiosí Abram
12
Te̱ ni̱ kaꞌa̱n Yahvé Ndiosí xiinꞌ Abram ndii:
―Na̱ko̱o̱ u̱nꞌ ñu̱ꞌuꞌ miiꞌ ni̱ tuvi̱ u̱nꞌ, te̱ na̱ko̱o̱ tu̱ u̱nꞌ ne̱ i̱i̱n kuuꞌ xiinꞌ u̱nꞌ, xiinꞌ vi̱ꞌe̱ yu̱vaꞌ u̱nꞌ, te̱ kuꞌu̱n ku̱nduꞌu̱ꞌ u̱nꞌ nuu̱ꞌ ñu̱ꞌuꞌ ña̱ niaꞌa̱ i̱ yoꞌó. 
2 Te̱ nda̱sa̱kuaꞌa̱ꞌ xa̱va̱ꞌa̱ i̱ si̱a̱niꞌ xikaꞌ u̱nꞌ, te̱ sa̱ñuꞌuꞌ tu̱ i̱ yoꞌó, te̱ nda̱sa̱nduuꞌ tu̱ i̱ yoꞌó te̱ kaꞌán va̱ꞌa̱ ne̱ yivi̱ꞌ xaꞌa̱ꞌ, te̱ xiinꞌ nda̱ꞌaꞌ yoꞌó sa̱ñuꞌuꞌ i̱ sa̱kuuꞌ ne̱ yivi̱ꞌ i̱i̱n yivi̱ꞌ.
3 Sa̱ñuꞌuꞌ i̱ ne̱ sa̱ñuꞌuꞌ yoꞌó, te̱ sa̱na̱tyaꞌanꞌ i̱ ne̱ sa̱na̱tyaꞌanꞌ yoꞌó. Te̱ xiinꞌ nda̱ꞌaꞌ yoꞌó sa̱ñuꞌuꞌ i̱ sa̱kuuꞌ nuu̱ꞌ ne̱ yivi̱ꞌ i̱i̱n yivi̱ꞌ ―ni̱ katyi̱ a̱ xiinꞌ ra̱.
4 Sa̱kanꞌ te̱ ni̱ ke̱ta̱ Abram kuaꞌa̱n ra̱ sa̱a̱ ni̱ kaꞌa̱n tyuunꞌ Yahvé Ndiosí xiinꞌ ra̱, te̱ kuaꞌa̱n tu̱ Lot xiinꞌ ra̱. Te̱ kii̱ꞌ ni̱ ke̱ta̱ Abram nuu̱ꞌ ñu̱ꞌuꞌ Harán ndii, uni̱ xi̱ko̱ xaꞌu̱n kuiya̱ ni̱ ku̱miꞌ ra̱.
5 Te̱ kii̱ꞌ ni̱ ke̱ta̱ Abram kuaꞌa̱n ra̱ nuu̱ꞌ ñu̱ꞌuꞌ Canaán ndii, ni̱ xa̱ka̱ ra̱ ñaꞌ siꞌi ra̱ Sarai, xiinꞌ Lot, saxi̱n ra̱, siꞌe̱ ña̱ni̱ ra̱, xiinꞌ sa̱kuuꞌ ne̱ yivi̱ꞌ, ne̱ ni̱ sa̱ta̱ꞌ ra̱ nuu̱ꞌ ñu̱ꞌuꞌ Harán, te̱ ni̱ na̱so̱ tu̱ ra̱ sa̱kuuꞌ ña̱ꞌa̱, ña̱ ni̱ ka̱ya̱ ra̱ nuu̱ꞌ ñu̱ꞌuꞌ Harán ja̱a̱nꞌ, te̱ ni̱ ki̱e̱e̱ ni̱a̱ kuaꞌa̱n ni̱a̱ nuu̱ꞌ ñu̱ꞌuꞌ Canaán.
6 Te̱ kii̱ꞌ ni̱ xa̱a̱ ni̱a̱ nuu̱ꞌ ñu̱ꞌuꞌ Canaán ja̱a̱nꞌ ndii, ni̱ xkaꞌndi̱a̱ Abram kuaꞌa̱n ra̱ nde̱e̱ ni̱ na̱xaa̱ ra̱ nde̱e̱ ñu̱u̱ Siquem, i̱i̱n xaanꞌ xiki̱ꞌ miiꞌ naniꞌ Moré. Te̱ kii̱ꞌ sa̱kanꞌ ndii, ne̱ cananeo ndieeꞌ ka̱niiꞌ ñu̱ꞌuꞌ Canaán ja̱a̱nꞌ.
7 Te̱ i̱kanꞌ ni̱ tuvi̱ Yahvé Ndiosí nuu̱ꞌ Abram, te̱ ni̱ kaꞌa̱n a̱ xiinꞌ ra̱ ndii:
―Nda̱ꞌaꞌ si̱a̱niꞌ xikaꞌ u̱nꞌ ta̱xi̱ i̱ ñu̱ꞌuꞌ kaa̱ꞌ ―ni̱ katyi̱ a̱.
Sa̱kanꞌ te̱ ni̱ xa̱ꞌa̱ ra̱ i̱i̱n altar i̱kanꞌ, xaꞌa̱ꞌ a̱ ka̱ i̱kanꞌ ni̱ tuvi̱ Ndiosí nuu̱ꞌ ra̱.
8 Ndi̱ꞌi̱ ja̱a̱nꞌ te̱ ni̱ ke̱ta̱ ra̱ kuaꞌa̱n ra̱ te̱i̱n i̱kuꞌ xtoꞌniꞌ miiꞌ ketaꞌ ñu̱ꞌu̱ xi̱i̱nꞌ ñu̱u̱ Betel, te̱ kii̱ꞌ ni̱ xa̱a̱ ra̱ i̱kanꞌ ndii, ni̱ xa̱ꞌa̱ ra̱ i̱i̱n vi̱ꞌe̱ toto̱ ku̱nduꞌu̱ꞌ ra̱. Ñu̱u̱ Ai ndii, xtoꞌniꞌ miiꞌ ketaꞌ ñu̱ꞌu̱ naá a̱, te̱ ñu̱u̱ Betel ndii, xi̱i̱nꞌ a̱ miiꞌ ketá ñu̱ꞌu̱ naá a̱, te̱ i̱kanꞌ ni̱ xa̱ꞌa̱ ra̱ i̱nga̱ altar ndi̱ti̱a̱ Yahvé Ndiosí, te̱ ni̱ xa̱kaꞌnuꞌ ña̱ꞌaꞌ ra̱ i̱kanꞌ.
9 Ndi̱ꞌi̱ ja̱a̱nꞌ te̱ ni̱ ke̱ta̱ Abram kuaꞌa̱n ra̱ nuu̱ꞌ ñu̱ꞌuꞌ Neguev, ndisu̱ kiꞌinꞌ xaanꞌ ni̱ nduꞌu̱ꞌ ra̱ ña̱ kuní ka̱ na̱xaa̱ ra̱ nuu̱ꞌ ñu̱ꞌuꞌ ja̱a̱nꞌ.
So̱ꞌo̱ ni̱ xa̱a̱ a̱ kii̱ꞌ ni̱ xaꞌa̱n Abram ñu̱ꞌuꞌ Egipto
10 Kii̱ꞌ sa̱kanꞌ ndii, ni̱ yoo̱ va̱ so̱ko̱ i̱i̱n ka̱niiꞌ nuu̱ꞌ ñu̱ꞌuꞌ miiꞌ ni̱ nduꞌu̱ꞌ Abram ja̱a̱nꞌ, sa̱kanꞌ na ni̱ na̱kaa̱ꞌ ra̱ ñu̱ꞌuꞌ Egipto te̱ ku̱nduꞌu̱ꞌ ra̱ i̱kanꞌ i̱i̱n xaꞌaꞌ, sa̱kanꞌ ña̱ tyie̱ va̱ so̱ko̱ ni̱ yoo̱ nuu̱ꞌ ñu̱ꞌuꞌ ra̱.
11 Kii̱ꞌ xa̱ kuyatinꞌ Abram ñu̱ꞌuꞌ Egipto ja̱a̱nꞌ kuaꞌa̱n ra̱, te̱ ni̱ kaꞌa̱n ra̱ xiinꞌ ñaꞌ siꞌi ra̱ Sarai ndii:
―Xiní kaxiꞌ yuꞌu̱ ña̱ i̱i̱n ña̱ꞌaꞌ nda̱tu̱nꞌ va̱ nduuꞌ yoꞌó, 
12 sa̱kanꞌ na kaꞌa̱n te̱ ñu̱ꞌuꞌ Egipto kii̱ꞌ ku̱ni̱ ra̱ yoꞌó ndii: "Ñaꞌ siꞌi te̱ kaa̱ꞌ nduuꞌ ñaꞌ kaa̱ꞌ", katyi̱ ra̱. Sa̱kanꞌ te̱ ka̱ꞌni̱ꞌ ra̱ yuꞌu̱ te̱ na̱ka̱ ra̱ yoꞌó.
13 Xaꞌa̱ꞌ a̱ ja̱a̱nꞌ na vi̱ti̱n ndii, sa̱a̱ u̱nꞌ ña̱ va̱ꞌa̱ te̱ kaꞌa̱n u̱nꞌ xiinꞌ ra̱ ña̱ ñaꞌ taꞌanꞌ i̱ nduuꞌ u̱nꞌ, naaꞌ nda̱tuꞌu̱nꞌ ra̱ yoꞌó, sa̱kanꞌ te̱ kä̱ꞌni̱ꞌ ra̱ yuꞌu̱, süu̱ꞌ ja̱a̱nꞌ ndii, ki̱ꞌi̱n kaꞌnuꞌ ra̱ yuꞌu̱ xaꞌa̱ꞌ a̱ ña̱ kuní ra̱ yoꞌó ―ni̱ katyi̱ Abram xiinꞌ Sarai.
14 Te̱ sa̱kanꞌ xna̱ꞌa̱ ni̱ xkaꞌndi̱a̱ kii̱ꞌ ni̱ ko̱ꞌni̱ ni̱a̱ ñu̱ꞌuꞌ Egipto ja̱a̱nꞌ ndii, ni̱ xi̱ni̱ te̱ ndieeꞌ ja̱a̱nꞌ ña̱ nda̱tu̱nꞌ xa̱va̱ꞌa̱ Sarai.
15 Te̱ ni̱ xi̱ni̱ tu̱ ña̱ꞌaꞌ te̱ kuuꞌ nu̱uꞌ xikaꞌ nuuꞌ nuu̱ꞌ Faraón, te̱ ni̱ kaꞌa̱n va̱ꞌa̱ ra̱ xaꞌa̱ꞌ aꞌ nuu̱ꞌ te̱ ja̱a̱nꞌ, te̱ ni̱ xa̱ka̱ ña̱ꞌaꞌ ra̱ kuaꞌa̱n aꞌ vi̱ꞌe̱ Faraón ja̱a̱nꞌ.
16 Te̱ xaꞌa̱ꞌ a̱ ña̱ ni̱ kuni̱ Faraón ndoo̱ va̱ꞌa̱ ra̱ nuu̱ꞌ Sarai ndii, va̱ꞌa̱ va̱ ni̱ ku̱u̱ ra̱ xiinꞌ Abram, ni̱ xa̱mani̱ꞌ ña̱ꞌaꞌ ra̱ mbe̱e̱, xiinꞌ si̱ndiki̱ꞌ, xiinꞌ mburru, xiinꞌ te̱ ka̱ka̱ nu̱u̱ nuu̱ꞌ ra̱, xiinꞌ ña̱ꞌaꞌ ka̱ka̱ nu̱u̱ nuu̱ꞌ ra̱, xiinꞌ mburra, xiinꞌ camello.
17 Ndisu̱ Yahvé Ndiosí ndii, ni̱ ka̱ni̱ a̱ Faraón xiinꞌ sa̱kuuꞌ ne̱ ndieeꞌ vi̱ꞌe̱ ra̱ xiinꞌ kiꞌinꞌ nuu̱ꞌ kuiꞌe̱ xatu̱ va̱, xaꞌa̱ꞌ a̱ ña̱ ni̱ na̱ka̱ ra̱ Sarai, ñaꞌ siꞌi Abram, kuaꞌa̱n aꞌ vi̱ꞌe̱ ra̱.
18 Sa̱kanꞌ na ni̱ ka̱na̱ Faraón Abram, te̱ ni̱ kaꞌa̱n ra̱ xiinꞌ ra̱ ndii:
―¿Ndiotyun na ni̱ xa̱a̱ u̱nꞌ ña̱ kaa̱ꞌ xiinꞌ i̱? ¿Ndiotyun na nï̱ kaꞌa̱n u̱nꞌ ña̱ ñaꞌ siꞌi u̱nꞌ nduuꞌ ñaꞌ kaa̱ꞌ?
19 ¿Ndiotyun na ni̱ kaꞌa̱n u̱nꞌ ndii, "ñaꞌ taꞌanꞌ i̱ nduuꞌ aꞌ," ni̱ katyi̱ u̱nꞌ, te̱ ndee tyaaꞌ va̱ na̱ka̱ ña̱ꞌaꞌ i̱ ku̱ndu̱u̱ ñaꞌ siꞌi i̱ xaꞌa̱ꞌ a̱ ña̱ ni̱ kaꞌa̱n u̱nꞌ sa̱kanꞌ? Te̱ vi̱ti̱n ndii, yoꞌoꞌ iinꞌ ñaꞌ siꞌi u̱nꞌ. Na̱ka̱ ña̱ꞌaꞌ te̱ kuꞌu̱n u̱nꞌ xiinꞌ aꞌ ―ni̱ katyi̱ ra̱.
20 Sa̱kanꞌ te̱ ni̱ kaꞌa̱n tyuunꞌ Faraón xiinꞌ sa̱va̱ te̱ xatyuunꞌ nuu̱ꞌ ra̱, te̱ ni̱ xta̱ꞌniꞌ ra̱ Abram nuu̱ꞌ ñu̱ꞌuꞌ Egipto ja̱a̱nꞌ xiinꞌ ñaꞌ siꞌi ra̱, xiinꞌ sa̱kuuꞌ ña̱ kumiꞌ ra̱.