Cati tuhun ra Jacoob chi sehe ra
49
Cana ra Jacob chi ndihi sehe ra,
ta cati ra chi ra ta ra ti:
“Tuhva ndo tihya,
vati cua ndatuhin chihin ndo cuhva cha cua coo ndo nu cuahan quivi:
2 “Nahan ndo,
sehu.
Tasoho ndo cha cua cahan yu cha cui Israel sutu ndo.
3 “Yoho Rubén,
sehe xihna cuii yu cuu cun.
Ni ndee xaan cuni yu,
ta cacu cun.
Maun cuu ra xihna cuii,
ta chacunda yahvi xaan cun,
ta chacoo xaan ca tundee ini chihun ta ñavi ca chi ndihi sehi.
4 Ta cuu cun sava ta cua iin nu chinu cahnu nduta,
vati yoni cuu casi nuun chi.
Quii xaan savahun ndavaha ni,
ta ña saxini xihna cun.
Ta chacan ña cua cuu con ra xihna cuii,
vati ni chahun tucanuun chihin yu,
ta savahun cha ña vaha chi ñasihi yu.
5 “Ta yoho Simeón chi yoho Leví,
in ni cuhva iyo ndo,
vati mani cha cahni ndo ñivi chi cha xaan cuni ndo
sava ni ta cua quiti cuhu xaan.
6 Ña cuni yu nduinuin chihin ndo chi tiñu cahan ndo,
ta ni ña cuni yu natahin chihin ndo nu nducuiti ndo,
vati quivi cha ni ndaa tisihi chihin ndo chahni ndo ñivi,
ta chahnda uhvi ndo chaha toro ñi cha cusii ini ndo.
7 Cha ndavaha ni cuu chi cha xaan xaan ndo,
ta chacan savaha ndo cha ña vaha.
Ta chacan cua cata cuati yu chihin ndo tañu ndihi ñivi yu cha cuu ñivi ñuhun Israel.
8 “Ta yoho Judá,
cua sacahnu xaan yani cun chihun,
ta cua sacanaan cun chi ra cuxaan ini chihun,
ta ndihi ca ra sehi,
cua cahnu chiti ra ta ra iti nuun cun.
9 Judá,
maun cuu sava ta cua iin ri ndicaha luhu sehu,
vati ta cha cha chachi ri quiti cuhu tiin ri.
Taxi ni queta ri,
ta chacava ri sava ta cua iin ndicaha chahnu,
ta yoni cana ini sandoyo chi ri.
10 Yoni cua cuu quenda tundee ini cha iyo chi ra Judá,
ta yoni cua quenda bastu cha naan ra ndaca ñahan cha cuu tata ra
nda quivi cha cua queta ra cua cuu Xini,
ta cua cundaca ñahan maan ra,
ta chi maan ra cua tasoho ndihi ñivi cha iyo nu ñuhun ñuñivi.
11 Ta cuaha xaan cha vaha cua coo chihun,
ta cuu chi sava ta cua iin nu iyo cuaha xaan yoho uva vaha,
ta ican cua cuhni cun burru luhu cun,
vati ña yuhvi cun masi cua cachi ri chi,
ta nda cua cua nacata cun sahma ndichin cun chi sahma chacu ndasi chata cun chi nduta chiti uva can.
12 Ta tuun xaan ca titi nuun cun,
ta ñavi ca nduta uva can,
ta cuichi xaan ca nuhun cun,
ta ñavi ca lechi.
13 “Ta yoho Zabulón,
yuhu tañuhun cua coo cun,
nu queta tundoo cua cuu chihin cun,
ta nda cua nda ñuun Sidón cua cuu xahñu cun.
14 “Ta yoho Isacar,
cua coo cun cuhva iyo ri burru nihin xaan,
cha chacava tatun ri tichi corra ri.
15 Cua ndehun ti vaha xaan ñuhun nu iyo cun cha cuu quee tatun cun,
ta cua tahan xaan ini cun chi,
ta ican ni cua cuni cun ndoun,
masi cua cuu cun musu cuatu,
ta vee xaan cua satiñu cun.
16 “Ta yoho Dan,
cua cundaca ñahan cun chi ñivi ñuun cun,
vati cuu cun tata ñivi ñuhun Israel.
17 Ta cua cuu cun sava ta cua iin coo cha caa yuhu iti.
Cha ndatu run cha cua tiin run chaha ri quiti cha yaha ican,
ta saquehni run chi ñivi yoso chata quiti can.
Xaan xaun cua cuu”,
cati ra Jacob chi ra Dan.
18 Ta cahan ra Jacob chi ra Ndioo,
ta cati ra ti:
“¡Ra Chahnu Jehová Ndioo!
Ndatu yu tu cha cua sacacu cun chi ñivi yu”,
cati ra.
19 Ta cati ndico ra Jacob chi sehe ra ti:
“Ta yoho Gad,
cua cani tahan tuvi xaan ñasuhu chihun,
soco maun cua sacanaan chi ñivi can.
20 “Ta yoho Aser,
ñuhun nu cua coo cun vaha xaan cua coo cha cua cachi cun,
ta ña cua cumani chi,
ta cuaha xaan cha vaha cua cachi cun cuhva cha chachi ra rey.
21 “Ta yoho Neftalí,
cuu cun sava ta cua isu sihi,
cha chica cuu nuna
ta taqui xaan sehe cun cua coo.
22 “Ta yoho José,
sava ta cua iin yutun cha inda yuhu ndohyo cuu cun.
Cha cuaha xaan chiti chi chaha chi,
ta nda cua ndita caa soco chi,
chata ndaca yuu.
23 Ta masi tuchi ñi nduva chihun cha xaan cuni ñi,
ta ndihi ni chaha cuni ñi cuhva ñi tisihi chihin cun,
24 soco maun José,
taxi ni chacoo cun,
ta ña tichaha nihun,
vati cha cunaan nihin tahun nduva cha tuchi cun,
vati maan ra Ndioo cha ni tindee chihin yu,
chaha tahan ra tundee ini chihin cun.
¡Tiahvi ndioo chi ra Ndioo,
rai nihin ndicha,
vati maan ra cuu ra cumi chi yo,
ta cuu ra sava ta cua iin yuu cahnu nu cua cacu ñivi ñuun Israel!
25 Tiahvi ndioo chi ra Ndioo sacahnu yu,
vati maan ra cua tindee ca chihun.
Maan ra Ndioo iyo ndihi cuii tundee ini na cua cuhva cha vaha chihin cun.
Ta na cua cuhva ra cha vaha cha iyo iti siqui andivi.
Ta na cua cuhva ra cha vaha cha iyo iti xuu tañuhun chihun,
ta na cua cuhva ra cha vaha chi ndihi tata cun cha cua coo iti nuun ca.
26 Cuaha xaan cha vaha nihin suti,
soco mai cha cui sutu cun,
cuaha ca cha vaha nihin yu cha cua cuhve chihin cun,
ta cua ndumondo chi chihun sava ta cua iin yucu cahnu xaan,
ta tañu ndihi ca ra yani cun nacachi ra Ndioo chi maun.
27 “Ta yoho Benjamín,
cuu cun sava ta cua iin ina cuhu xaan xaan,
vati cha nahan chahni ri cha cua cachi ri,
ta cha cua ini nacoo ri cha ndoo,
vati cua cachi inga tahan ri”,
cati ra Jacob chi ra.
28 Ta ndihi rahya ta ra cuu sehe ra Jacob.
Uchi uvi ra ta ra,
ta iin iin cuhva ni cahan ra chi ra ta ra.
Ta cuhva can sacu-ii ra chi ndihi ra ta ra cha cua cuu ra ta ra xini chi ndihi uchi uvi tata cuhva cha cuu ñivi ñuhun Israel.
29 Yaha chacan,
ta cati ra chi ra ta ra ti:
“Cha yatin cua cuvi yu,
ta cua nduicaa yu chi ñivi chahnu yu.
Ta chacan,
cuni yu ndaque iin tu manini chihin ndo,
vati cua cucuchi ndo chihin yu nu ni cuchi ndihi ñivi chahnu yu yavi yuu nu ni sata ra Abraham chi ra Efrón ra ñuun Het.
30-31 Ta ican ni cuchi tahan ñi chi maan ra Abraham chi ña Sara ñasihi ra chi ra Isaac chi ña Rebeca ñasihi ra,
ta ican cuchi tahin chi ña Lea.
Yavi yuu can,
iyo chi iti ñuhun Canaán nu iyo nduhva Macpela yatin nu iyo Mamre chiyo cana nicandi.
32 Nduhva can chi yavi yuu can ni sata ra Abraham chi sehe ñivi ñuun Het.
Ican cua cuchi ndo chi”,
cati ra Jacob chi ra ta ra.
33 Ta hora ndihi ndatuhun ra Jacob tiñu can chi ndihi sehe ra,
chacava vaha ra nu chito ra,
ta chihi ni ra.