Sacu-ii ra Jacoob chi ra Efraín chi ra Manasés
48
Yaha iin tiempu,
ta queta tuhun nuun ra José cha cuhvi xaan sutu ra.
Tacan cuu,
ta quihin ra nduvi tahan sehe ra,
ra Manasés chi ra Efraín,
ta quee ra cua ndehe ra chi ra Jacob sutu ra.
2 Ta hora cha cati tiñu chi ra Jacob cha queta ra José cha vachi ndehe ra chi ra,
nducu ndee ra Israel,
ta chacunda ra nu chito ra.
3 Ta cati ra Jacob chi ra José ti:
―Maan ra Ndioo iyo ndihi cuii tundee ini,
sanahan nuun ra chi ra chihin yu ñuun Luuz cha iyo cuenda ñuhun Canaán,
ta sacu-ii ra chi ican.
4 Ta chaha ra tuhun yuhu ra chi,
ta cati ra ti:
‘Cua savahi cha cua coo tuvi xaan sehe cun chi seyani cun chi tata cun,
ta cuaha xaan ñuun nahnu cua savaha ñi.
Ta cua cuhva yu ñuhun ya chi ndihi tata cun,
ta cua cuu chi chihin ñi ndihi ndoo tiempu’,
cati ra Ndioo chihin yu.
5 Ta ña ta queta yu nu iyo cun ñuhun Egipto ya,
ta cha cacu nduvi tahan sehe cun,
ra Efraín chi ra Manasés.
Cua cuu ra ta ra sehe mai cuhva cuu ra Rubén chi ra Simeón,
6 soco sehe cun cha cua coo iti nuu,
racan ta ra cua cuu sehe maun.
Ta cuenda maan ra Efraín chi ra Manasés cua nihin tahan ra ta ra ñuhun cha cua cuhve chi ra ta ra.
7 Quivi cha vachi ndi iti ñuhun Padan-aram chihi ña Raquel sihi cun ñuhun Canaán quivi cha cuahan ndi iti ñuun Efrata.
Ta cuchi yu chi ña iti cha cuahan ñuun can cha cuu chi ñuun Belén vitin ―cati ra chi ra José.
8 Ta nu ni ndehe ra Israel can chi sehe ra José,
ta nducu tuhun ra chi ra ti:
―¿Ta rahya ta ra,
yoo ra cuu ra?
―cati ra.
9 Ta nducahan ra José,
ta cati ndico ra chi sutu ra ti:
―Sehe mai cuu ra ta ra cha chaha ra Ndioo chihin yu ñuhun Egipto ya ―cati ra.
Ta cati ndico maan ra Jacob chi ra ti:
―Satuhva chi ra ta ra iti nui,
vati cua cahan vaha yu chi iin iin ra ta ra ―cati ra.
10 Ta ña ndichin vaha ca ndehe ra Israel,
vati cha chahnu xaan ra.
Tacan cuu,
ta satuhva ra José chi nduvi tahan sehe ra iti nuun sutu ra,
ta ra Jacob,
tayuhu ra,
ta chacunumi ndaa ra chi ra ta ra.
11 Ta cati ndico ra Israel chi ra José ti:
―Yuhu,
ña saxini que cha cua ndehe ndico yu chihin cun,
soco maan ra Ndioo chaha cha ndehe tahin chi sehe cun ―cati ra.
12 Tacan,
ta sanuun ra José chi sehe ra nu sihin ra Israel sutu ra.
Ta chahnu chiti ra nda nu ñuhun.
13 Ta quihin ra José chi nduvi tahan sehe ra,
ra Manasés cuahan chiyo ndaha sati ra José,
vati cua ndoo ra chiyo ndaha cuaha ra Israel,
ta ra Efraín iti chiyo ndaha cuaha ra José,
vati cua ndoo ra chiyo ndaha sati ra Israel,
ta satuhva ra José chi ra ta ra iti nuun sutu ra,
14 soco ra Israel,
tisama tahan ra ndaha ra,
ta tiso ra ndaha cuaha ra xini ra Efraín ra ni luhu ca,
ta ndaha sati ra tiso ra xini ra Manasés,
masi ra cha nihin cuu ra.
15 Tacan cuu,
ta cahan ra tuhun vaha ra chi ra José,
ta sa quechaha cahan tahan ra chi ra Ndioo,
ta cati ra ti:
“Yoho ra Ndioo,
sacahnu ra sutu chahnu yu Abraham,
ta sacahnu tahan ra Isaac sutu yu chihun.
Ta chi maun sacahnu tahin,
ta maun cumi chihin yu nda ni quivi cha cacu yu ta nda cua nda vitin.
16 Ta suvi ni maun tachi tatun cun
cha sacacu chi tichi tundoho.
Sacu-ii tahan cun chi nduvi tahan ra cuati ya,
vati cuenda rahya ta ra cua cucuhun ini ñivi sivi yu
chi sivi sutu chahnu yu Abraham chi sivi sutu yu Isaac.
¡Ta na cua coo tuvi xaan sehe ra ta ra nu ñuhun ñuñivi ya!”,
cati ra Jacob.
17 Ña tahan ini ra José cha ndehe ra cha tiso sutu ra ndaha cuaha ra xini ra Efraín,
ta chacan sachiyo ra ndaha cuaha sutu ra xini ra Efraín,
ta tiso ra chi xini ra Manasés,
18 ta cati ra chi sutu ra ti:
―¡Ñavi cuhva can,
tata!
¡Tiso ndaha cuaha cun xini ra Manasés,
vati rahya cuu ra chanihin!
―cati ra José,
19 soco ña cuni sutu ra savaha ra cuhva can,
ta cati ra ti:
―Chite,
sehu.
Chite cha cahnu ñuun cua cuu tahan rahya,
vati tuvi ñivi ra cua coo,
soco ra Efraín,
yani luhu ra.
Cua cunda yahvi xaan ca ra,
ta ndihi ñivi ra,
cahnu xaan ca ñuun cua cuu ñi ―cati ra Jacob.
20 Cuhva can chaha ra Jacob cha vaha chi ra Efraín chi ra Manasés.
Ta cati ra ti:
―Cuhva ya cua cati ñivi ñuun Israel,
ta cha cua cahan vaha ñi cuenda sivi ndo ti:
‘Maan ra Ndioo na cua cuhva cha vaha chihin cun cuhva cha chaha ra cha vaha chi ra Efraín chi ra Manasés’,
cua cati ñivi can ―cati ra chi ra ta ra.
Ta cuhva can savaha ra Israel cha cuu ra Efraín ra xihna cuii,
ta ndoo ra Manasés iti chata.
21 Ta cati ndico tucu ra Israel chi ra José ti:
―Cha yatin cua cuvi yu,
soco ra Ndioo cua coo chihin ndo,
ta cua savaha ra cha cua cuhun ndico ndo ñuhun nu chacoo sutu chahnu ndo.
22 Ta maun,
cahnu ca rai cua cuu cun,
ta ñavi ca ndihi yani cun,
ta chacan cua cuhve yucu Siquem chihin cun,
ta yucu can quenda yu chi ñivi amorreo quivi cha cani tahan ndi cuenda chi nu quichi quivi ―cati ra Jacob.