Queta ra Jacoob nuun ra faraón
47
1-2 Tacan cuu,
ta quihin ra José uhun tahan yani ra,
vati cua cuhva ra cuenda chi ra faraón cha cha queta ra ta ra,
ta nu ni queta ra ta ra nuun ra,
ta quechaha cati ra José chi ra ti:
―Sutu yu chi yani yu chi ndihi sana ra ta ra chi ndihi ndatiñu ra,
cha quichi ra ta ra iti ñuhun Canaán,
ta vitin cha iyo ra ta ra ñuhun Gosén ―cati ra José.
3 Ta quechaha nducu tuhun ra faraón chihin ra ta ra ti:
―¿Ñaan tiñu satiñu ndo?
―cati ra.
Ta nducahan ra ta ra,
ta cati ra ta ra ti:
―Ndiuhu ra musu cun,
ra sacuenda mbee cuu ndi cuhva cha satiñu ñivi chahnu ndi.
4 Ta cahnu xaan tama iyo ñuhun Canaán,
ta ñahni ca cha cachi sana ndi.
Ta chacan vachi ndi tihya ti cua ndoo ndi,
ta chacan cahan ndahvi ndi chihin cun,
vati na cua cuhva cun ndatu cha cua coo ndi ñuhun Gosén ―cati ra ta ra.
5 Tacan cuu,
ta quechaha cati ra faraón chi ra José ti:
―Sutu cun ta ndihi yani cun,
vachi coo ra ta ra nu iyo cun.
6 Tichi ndaha maan cun iyo ñuhun Egipto ya,
ta chacan na ndoo sutu cun chi ndihi yani cun nu cuu chi ñuhun vaha.
Ta na cua coo ra ta ra ñuhun Gosén,
ta maan cun chito tu iyo ra satiñu vaha,
tiso chi ra ta ra cha cua sacuenda ra ta ra sana yu ―cati ra faraón can.
7 Yaha chacan,
ta cha quihin ra José chi ra Jacob sutu ra,
ta cha ndaca ra chi ra nuun ra faraón,
ta ra Jacob,
sacahnu ra chi ra faraón,
ta chaha ra tuhun vaha chi ra.
8 Tacan,
ta nducu tuhun ra faraón chi ra ti:
―¿Yoso cuiya cun?
―cati ra.
9 Ta cati ra Jacob chi ra ti:
―Cientu oco uchi cuiya yu,
ta chica cuu ndahvi yu iin chiyo ta inga chiyo.
Chi cuaha tundoho ni iyo yu,
soco ña ta queta yu cuiya cha chacoo ñivi chahnu yu cha chica cuu ndahvi ñi nu ñuhun ñuñivi ya ―cati ra Jacob.
10 Tacan cuu,
ta cahan tucu ra Jacob tuhun vaha chi ra faraón,
ta cuahan ra.
11 Ta ra José,
chaha ra ñuhun vaha xaan nu cua coo sutu ra chi ndihi yani ra cuhva cha ni chaha ra faraón tiñu chi ra.
Cuhva can nihin ra ta ra ñuhun vaha nu cuu cuenda ra Ramesee.
12 Ta chaha ra José cha chachi sutu ra chi ndihi yani ra chi ndihi ñivi ra ta ra tiempu tama can.
13 Ta ndunihin xaan ca tama can,
ta ñahni ca cha cachi ñivi ni iin chiyo,
ta cuhva can quechaha chihi ñivi iyo ñuhun Egipto chi ñi iyo ñuhun Canaán.
14 Ta ra José,
xico ra chiti trigu cha cua cachi ñivi iyo ñuhun Egipto chi ñivi ñuhun Canaán,
ta sacuiti ra ndihi xuhun can,
ta cha naa ra chi vehe ra faraón.
15 Ta nu ndihi xuhun ñivi iyo ñuhun Egipto can chi ñivi ñuhun Canaán,
chahan ñi nuun ra José,
ta cati ñi chi ra ti:
―Cuhva cha cua cachi ndi coto cua cuvi ndi chi soco,
vati ñahni ca xuhun ndi ―cati ñi ta ñi.
16 Ta quechaha cati ndico ra José chi ñi ti:
―Cua cuhva ndo sana ndo chi tu cha ndihi xuhun ndo,
ta cua cuhve cha cua cachi ndo cuenda rican ta ri ―cati ra.
17 Ta chacan cha naan ñi ta ñi quiti cuhu sana ñi chi ra,
cha naan ñi quiti ñi chi mbee ñi chi chivu ñi chi sundiquin ñi chi burru ñi,
ta nihin ñi cha chachi ñi tichi cuiya can.
18 Ta nu ni ndihi cuiya can,
chahan ndico tucu ñivi can cha ndehe ñi chi ra José inga chaha,
ta cati ñi chi ra ti:
―Ra chahnu,
chito cun ti cha ndihi xuhun ndi,
ta cha ndihi sana ndi chaha ndi chihin cun.
Ta vitin ñahni ca cha iyo chihin ndi,
ta maan ni ndi chi ñuhun ndi ndoo.
19 Ña vaha cha cua cuvi ndi,
ta cua ndoo ñuhun ndi.
Sata chihin ndi chi ñuhun ndi,
ta cuhva cun chiti trigu cachi ndi,
ta cua cuu ndi musu nuun ra faraón,
ta cua satiñu ndi nu ñuhun ndi cuenda maan ra.
Ta cua cuhva cun chiti trigu cha cua tachi ndi,
ta cua coo cha cua cachi ndi,
ta ña cua cuvi ndi.
Tacan ña cua ndoo ñuhun ndi cha ñahni ca cha iyo nuun chi ―cati ñi ta ñi.
20 Tacan cuu,
ta sata ra José ndihi ñuhun Egipto cha cua cuu chi ra faraón.
Ta ndihi ñivi ñuhun Egipto xico ñi ñuhun ñi,
vati ndunihin xaan ca tama can,
ta ñahni ca cha cachi ñi iyo.
Ta ndihi ñuhun can ndoo chi cuenda maan ra faraón.
21 Ta chi ndihi ñivi iyo iin chiyo ta inga chiyo ñuhun Egipto,
savaha ra cha cuu ñi musu cuatu ra faraón.
22 Ituhun ñuhun cha cuu cuenda ra sutu ta ra,
ña sata ra José chi,
vati maan ra faraón chaha chiti trigu cha chachi ra ta ra,
ta ña cumani chi,
ta chacan cuu cha ña xico ra ta ra ñuhun ra.
23 Ta cati ndico ra José chi ñivi ñuhun Egipto can ti:
―Vitin cha sate chihin ndo chi ndihi ñuhun ndo cha cuenda ra faraón.
Ihya iyo chiti trigu cha cua tachi ndo,
24 soco quivi cha cua canihin vaha ndo ndihi chiti cha cua tachi ndo,
cua natahvi ndo uhun cuhva chihin chi,
ta cua cuhva ndo ituhun cuhva can chi ra faraón,
ta inca cumi cuhva chi cua cuu chi chi maan ndo,
ta ican cua tava ndo cha cua tachi ndo,
ta ndihi ca chi cua cachi ndo chi ndihi sehe cuati ndo chi ñivi ndo vehe ndo ―cati ra José.
25 Ta cati ndico ñi ta ñi chi ra ti:
―Cacu ndi savaha cun,
ta ña cua cuvi ndi.
Vaha ti cuni mani cun chihin ndi,
ra chahnu,
ta cua cuu ndi musu ra faraón ―cati ñi.
26 Tacan cuu,
ta tiso ra José iin ley ñuhun Egipto,
ta iyo chi nda cua nda vitin,
vati cua natahvi ñi uhun cuhva chi ndihi chiti cha cua canihin vaha ñi.
Ta ituhun cuhva chi cua cuhva ñi chi ra faraón.
Ta ñuhun cha cuu chi ra sutu ta ra,
samani ra faraón chi chi ra ta ra,
ta chacan ñahni cha cua tiahvi ra ta ra chi ra rey can.
27 Tacan,
ta ndoo ñivi ra Israel iyo ñi ñuhun Gosén tichi ñuhun Egipto,
ta ican nihin ñi ñuhun nu iyo ñi,
ta tuvi xaan sehe ñi chacoo,
ta cahnu xaan ñuun cuu ñi.
28 Ta chacoo ra Jacob chahun uvi cuiya ñuhun Egipto,
ta queta cientu uvi xico ucha cuiya chacoo ra ñuñivi.
29 Ta nu cha yatin cua cuvi ra,
cana ra chi ra José sehe ra,
ta cati ra chi ra ti:
―Tu ndicha cha cuni mani cun chihin yu,
tiso ndaha cun nu sihin yu vitin,
ta cati vaha chihin yu tu cha cua savahun tu manini cuhva cha cua ndaca yu chihin cun.
Chica ndahvi yu chihun,
vati ña cuni yu cha cua cuchi cun chi tichi ñuhun Egipto ya.
30 Quivi cha cua cuvi yu,
ta cua nduiin yu chi ñivi chahnu yu,
cua tava cun chi tichi ñuhun ya,
ta cua cuchi cun chi nu cuchi ñivi yu ―cati ra Jacob.
Ta cati ndico ra José chi ra ti:
―Cua savahi cuhva cha chica cun ―cati ra.
31 Ta cati ndico tucu ra Israel chi ra ti:
―Cati ndicha chi ―cati sutu ra chi ra.
Ta ra José,
cati vaha ra chi sutu ra cha cua savaha ra tacan.
Tacan cuu,
ta chacava vaha ndico ra Israel nu sahma xini ra nu chito ra.