Cuahan ra Jacoob iti ñuhun Egipto
46
Tacan cuu,
ta quee ra Israel ñuhun Canaán,
ta cuahan ra iti ñuhun Egipto chi ndihi cha iyo chihin ra,
ta queta ra ñuun Beerseba,
ta samani ra iin mbee iti nuun ra Ndioo cha sacahnu ra Isaac sutu ra.
2 Ta chacuaa can ni cahan ra Ndioo chi ra tichi ñumahna,
ta cati ra chi ra ti:
―¡Jacob,
Jacob!
―cati ra Ndioo.
Ta nducahan ra,
ta cati ra ti:
―Ihya iye ―cati ra Jacob.
3 Ta cati ndico ra Ndioo chi ra ti:
―Yuhu cuu ra Ndioo ra ni sacahnu sutu cun.
Ña cuyuhvi cun cuhun cun iti ñuhun Egipto,
vati ican cua savahi iin ñuun cahnu xaan chi ndihi ñivi cuu tata cun.
4 Main cua cuhun chihin cun iti ñuhun Egipto,
ta cua savahi cha cua quichi ndico cun.
Ta maan ra José cua casi titi nuun cun quivi cha cua cuvi cun ―cati ra Ndioo chi ra Jacob.
5 Tacan cuu,
ta ñuun Beerseba can quee ra Jacob chi ndihi sehe rai ra chi ndihi sehe cuati ñi chi ndihi ñasihi ra ta ra,
ta quihvi ñi ta ñi tichi ndihi carreta cha tachi ra faraón cha cua cuhun ñi.
6 Quihin tahan ra ta ra ndihi sana ra chi ndihi ndatiñu cha ni nihin ra ta ra ñuhun Canaán,
ta cuahan ra ta ra
7 chi ndihi sehe ñi chi ndihi seyani ñi iti ñuhun Egipto.
8 Ta chehe cuu ndihi sivi sehe ra Israel cha cuahan chihin ra iti ñuhun Egipto.
Maan ra Jacob chi ndihi sehe ra cuahan.
Ra Rubén sehe xihna cuii ra.
9 Ta ndihi sehe ra Rubén cuu ra Hanooc chi ra Falu chi ra Hezrón chi ra Carmi.
10 Ta ndihi sehe ra Simeón cuu ra Jemueel chi ra Jamín chi ra Ohaad chi ra Jaquín chi ra Zohaar chi ra Saúl sehe iin ña ñahan ñuhun Canaán.
11 Ta ndihi sehe ra Leví cuu ra Gersón chi ra Coat chi ra Merari.
12 Ta ndihi sehe ra Judá cuu ra Er chi ra Onán chi ra Sela chi ra Fares chi ra Zara,
ta ra Er chi ra Onán chihi ra ta ra ñuhun Canaán.
Ta sehe ra Fares cuu ra Hezrón chi ra Hamul.
13 Ta ndihi sehe ra Isacar cuu ra Tola chi ra Fua chi ra Job chi ra Simrón.
14 Ta ndihi sehe ra Zabulón cuu ra Sered chi ra Elón chi ra Jahleel.
15 Ndihi rahya ta ra cuu sehe ña Lea chi ra Jacob cha cacu ra ta ra iti ñuhun Padan-aram,
ta chacoo inga sehe sihi ña cha chacunani Dina.
Oco uchi uni ñi cha ndihi ñi.
16 Ta ndihi sehe ra Gad cuu ra Zifioon chi ra Hagui chi ra Ezboon chi ra Suni chi ra Eri chi ra Arodi chi ra Areli.
17 Ta ndihi sehe ra Aser cuu ra Imnaa chi ra Isuua chi ra Isuui chi ra Beriia,
ta chacoo tahan ituhun cuhva ra ta ra cha chacunani ña Sera.
Ta ndihi sehe ra Beriia can cuu ra Heber chi ra Malquieel.
18 Ndihi rahya ta ra cuu sehe ña Zilpa chi ra Jacob.
Ta ña Zilpa can cuu musu ña Lea cha chaha ra Labán sutu ña chihin ña.
Chahun iin ñi cha ndihi ñi.
19 Ta ndihi sehe ña Raquel cha cuu ñasihi maan ra Jacob can cuu ra José chi ra Benjamín.
20 Ta ndihi sehe ra José chi ña Asenaat cha chacoo ñuhun Egipto cuu ra Manasés chi ra Efraín.
Ta ña Asenaat can cuu sehe sihi ra Potifera cha cuu sutu chahnu ñuun Oon.
21 Ta ndihi sehe ra Benjamín cuu ra Bela chi ra Bequeer chi ra Asbeel chi ra Gera chi ra Naamaan chi ra Ehi chi ra Roos chi ra Mupiim chi ra Hupiim chi ra Ard.
22 Ndihi rahya ta ra cuu tata ña Raquel chi ra Jacob.
Uchi cumi ñi cha ndihi ñi.
23 Ta sehe ra Dan cuu ra Husiim.
24 Ta ndihi sehe ra Neftalí cuu ra Jahzeel chi ra Guni chi ra Jezeer chi ra Sileem.
25 Ndihi rahya ta ra cuu tata ña Bilha chi ra Jacob ña cuu musu ña Raquel cha chaha ra Labán sutu ña chi ña.
Ucha tahan ñi cha ndihi ñi.
26 Ta ndihi ñivi cha cuahan chi ra Jacob iti ñuhun Egipto cuu ñi uni xico iñu,
ta ña cahvi tiñu chi ndihi ñi cuu ñasihi sehe rai ra.
27 Ta cha ndihi ñivi ra Jacob cha chacoo ñuhun Egipto,
ta cahvi ndihi tiñu chi ra José chi nduvi tahan sehe ra,
cuu ñi uni xico uchi ñivi.
28 Tacan cuu,
ta tachi maan ra Jacob can chi ra Judá iti nuu,
vati cua cati ra chi ra José cha na cua quichi ndehe ra chi ra nu cuu chi ñuhun Gosén,
vati ican cua queta ra chi ndihi ñivi ra.
29 Tacan,
ta ra José,
tiso vaha ra carreta ra cha cua cuhun ra iti Gosén nu cua quihin cuenda ra chi ra Israel sutu ra.
Ta nu ni ndehe ra chi sutu ra,
chacunumi ndaa ra chi ra,
ta chaqui ra xini ra sucu ra,
ta nahan xaan ndahyu ra.
30 Tacan cuu,
ta quechaha cati ra Israel chi ra José ti:
―Vitin cha cuu cuvi yu,
vati cha ni ndehi chihin cun,
ta chite cha ni vii ndito cun ―cati ra.
31 Ta cati ndico maan ra José can chi yani ra chi ndihi ñivi sutu ra ti:
―Cua cucati yu chi ra faraón cha cha queta ndihi ndo cha cuu ndo yani yu chi ndihi ñivi sutu yo cha quee ndo ñuhun Canaán,
ta vachi ndo nu iyo yu.
32 Ta ra sacuenda mbee,
sundiqui chi chivu cuu ndo,
ta vachi ndihi sana ndo chi ndihi ndatiñu ndo chihin ndo.
33 Ta hora cua cana ra faraón can chihin ndo,
ta cua nducu tuhun ra chihin ndo ti:
“¿Ñaan tiñu satiñu ndo?”,
34 ta cua cati ndo ti: ”
Ra sacuenda mbee cuu ndi nda cua nda vachi cuahnu ndi cuhva cha chacoo ndihi ñivi chahnu ndi cha cuu ndi musu cun”,
cua cati ndo.
Tacan cua cuu ndoo ndo coo ndo ñuhun Gosén,
vati ñivi ñuhun Egipto,
ña tahan ini ñi coo yatin ñi chi ñivi sacuenda mbee chi chivu ―cati ra José.