Savaha ra Jose cha nacoto yani ra chi ra
45
Ña cundee ca ini ra José.
Chacan quechaha cati ra chi ndihi ra cuu musu cha tindee chi ra ti: ”
Quee nuun ndihi ndo nuquehe”,
cati ra.
Chacan cuu cha yoni ca racan ta ra inda hora cha cati ra chi yani ra cha maan ra cuu ra José.
2 Ta nihin xaan quechaha ndahyu ra,
ta ndihi musu ra chini,
ta nda nu iyo vehe ra faraón chini ñivi cha ndahyu ra.
3 Ta cati ra José chi yani ra ti:
―Yuhu cuu José.
¿Atu ni ndito suti?
―cati ra.
Ta ña cuu cahan ndihi yani ra,
vati yuhvi xaan cuni ra ta ra ndehe ra chi ra.
4 Ta cati ndico ra José chi ra ta ra ti:
―Savaha ndo tu manini,
tuhva yatin ndo chi ―cati ra.
Ta nu ni tuhva ra ta ra chi ra,
cati ndico ra chi ra ta ra ti:
―Yuhu cuu José yani ndo,
ra ni xico ndo chi ñivi cuahan iti ñuhun Egipto.
5 Ta vitin ña ndundahvi cuni ndo,
ta ni ña cuvi ndo tisihi ndehe ndo chi tahan ndo cuenda cha ni xico ndo chi tihya,
vati ra Ndioo tachi chi iti nuun ndo cha cua tindei chi ñivi,
ta ña cua cuvi ñi.
6 Cha queta uvi cuiya vitin cha iyo tama ñuhun ya,
ta ni cumani inga uhun cuiya cha ña cua coo cha cua cachi ñivi.
7 Ta maan ra Ndioo tachi chihin yu ñuhun ya cha xihna cuii cha cua savahi tu manini chihin ndo,
ta ña cua cuvi ndo chi ndihi sehe ndo.
8 Chacan cuu cha ñavi ndioho tachi chi tihya.
Maan ra Ndioo cuu ra,
ta suvi ni maan ra chaha tiñu chi,
cha cui xini chi ndihi ra cuu musu vehe ra faraón,
ta ndaca ñahan tahin chi ndihi ñivi ñuhun Egipto.
9 Ta chacan cuu cha cua sanumi ni ndo,
ta cua cuhun ndico ni ndo nu iyo suti,
ta cua cati ndo chi ra cuhva ya ti:
‘Cati ra José sehe cun ti:
Maan ra Ndioo chaha cha ndaca ñahin chi ndihi ñivi ñuhun Egipto,
ta chacan cuni yu cha yatin ni cua quichi cun nu iyo yu tihya.
Ña cua nducuee cun.
10 Ta ñuhun Gosén cua coo cun chi ndihi sehe cun chi ndihi seyani cun chi ndihi quiti cuhu sana cun chi ndihi ndatiñu cun,
ta yatin ni cua coo cun chihin yu ihya.
11 Ta cua cuhva mai cha cua cachi cun chi ndihi ñivi cun,
vati ni cumani inga uhun cuiya cha cua coo tama,
ta tacan ña cua cuvi ndo chi soco,
ni maun ta ni ñivi cun’.
12 Ta ndihi maan ndo chini cuhva cha cati yu,
ta chini tahan ra Benjamín yani yu.
13 Ta cua cuhva ndo cuenda chi maan suti ndihi cha ndehe ndo cuhva cha ndaca ñahin chi ndihi ñivi ñuhun Egipto ya,
ta numi ni cua quichi ndaca ndo chi ra ―cati ra José chi yani ra.
14 Ta chacunumi ndaa tahan ra José chi ra Benjamín,
ta ndahyu xaan nduvi tahan ra ta ra.
15 Ta chi ndihi ca yani ra,
tayuhu ra chi ra ta ra,
ta ndahyu tahan ra ta ra chi ra,
ta sa hora can ni cuu ndatuhun ra ta ra chihin ra.
16 Sii xaan ni cuni tahan ra faraón chi ndihi musu ra cha chito ra ta ra cha quichi ndihi yani ra José ñuhun Egipto.
17 Chacan cuu cha cati ra faraón chi ra José ti:
―Cati chi ndihi ra yani cun na taa ra ta ra xiin sana ra,
ta cua cuhun ndico ra ta ra iti ñuhun Canaán,
18 ta na cua cu quihin ra ta ra chi maan sutu ndo chi ndihi ñivi ndo,
ta cua quichi ndico ra ta ra,
vati cua cuhva mai ñuhun vaha nu cua satiñu ra ta ra ñuhun Egipto ya.
Tacan cua nihin vaha ra ta ra cha cua cachi ra ta ra nu ñuhun ya.
19 Ta cua cuhva cun tiñu cha na cua cuhun quiti xita carreta chi ra ta ra,
vati cua quichi ndihi ve cuati chi ndihi ñi cuu ñasihi ra ta ra chi maan sutu ndo.
20 Ta na ña cua saxini ñi cuenda ndihi cha cua nacoo ñi tican,
vati ndihi cha vaha iyo ñuhun Egipto ya cua cuu tahan chi chihin ñi ―cati ra faraón chi ra José.
21 Tacan cuu,
ta savaha ndihi sehe ra Israel cuhva cha tava tiñu ra faraón,
ta chacan chaha ra José quiti xita carreta chi ra ta ra chi ndihi cha cua cachi ra ta ra iti.
22 Ta chaha ra iin ndichin sahma chaa chi iin iin ra ta ra,
ta chi ra Benjamín chaha ra uni cientu xuhun cuichi chi uhun ndichin sahma chaa vaha.
23 Ta chi maan sutu ra tachi ra uchi tahan burru cha ndiso ndihi nuun cha vaha cha iyo ñuhun Egipto can chi inga uchi ri burru sihi cha ndiso trigu chi paan chi ndihi cha cua cachi sutu ra iti.
24 Ta hora cha saña tahan ra José chi yani ra cati ra chi ra ta ra ti:
―Ña cua cani tahan ndo chi tahan ndo iti cuahan ndo ―cati ra.
25 Quee ra ta ra ñuhun Egipto can,
ta cuahan ra ta ra,
ta nu queta ndico ra ta ra ñuhun Canaán nu iyo ra Jacob sutu ra ta ra,
26 ta chaha ndico ra ta ra cuenda chi ra,
ta cati ra ta ra ti:
‘Ni ndito ra José,
ta maan ra cuu ra ndaca ñahan ñuhun Egipto’,
cati ra ta ra.
Nduiyo xaan cuni ra Jacob,
ta cuni cahni nuun chi chi ra,
ta saxini ra ti ña ndicha ra ta ra cha cahan ra,
27 soco nu ni cati ra ta ra ndihi tiñu cuhva cha ni cahan ra José,
ta ndehe ra ndihi quiti ndaca carreta cha tachi ra cha cua cuhun ra ta ra,
sii xaan quechaha cuni ra.
28 Tacan cuu,
ta cati ra Israel chi ra ta ra ti:
“Vaha,
tu tacan cuu chi.
Vitin chite cha ndito ra José sehi.
Cua cuhin,
ta cua ndehi chi ra,
ta ni cha ña ta cuvi yu”,
cati ra.