Cha quihin cuati ra Benjamín cuenda copa ra Jose
44
Ta nu yaha ndihi chacan,
ta cati tuhun ra José chi ra musu chahnu ra ti:
―Cua sacutu vahun ndihi costa rahya ta ra chi chiti trigu,
ta cua tihi ndico cun xuhun ra tichi iin iin costa ra ta ra.
2 Ta tichi costa ra luhu cuii ca cua tihi cun copa xuhun cuichi yu,
ta cua tihi ndico tahun xuhun ra cuenda chiti trigu cha sata ra ―cati ra José.
Ta cuhva can savaha ra musu can.
3 Ta nu ni cundichin,
ndihi yani ra José saña tahan ra ta ra chi ra,
ta quihin ra ta ra burru sana ra,
ta quee ra ta ra cuahan ra.
4 Sa ni quee ra ta ra yuhu ñuun can,
ta ña ta nducani cuhun ra ta ra,
ta tava tiñu ra José chi musu ra,
ta cati ra chi ra ti:
―Cuahan cua ndicu chi ra sa cuahan can ta ra,
ta nu cua tahun chi ra ta ra,
cua cati cun cuhva ya:
‘¿Ñacu savaha ndo cha ndavaha ni chi ra chitohi,
cha suhu ndo copa xuhun cuichi ra?,
ta maan ra,
savaha ra cha vaha chihin ndo.
5 Ta copa can chatiñu ra cha chihi ra,
ta suvi ni chacan chatiñu ra cha natava ra.
Ta ña vaha cuii cha ni suhu ndo copa ra’,
cua cati cun chi ra ta ra ―cati ra José chi ra musu can.
6 Ta nu ni tahan ra musu can chi ra ta ra,
cati ra ndihi cuhva cha ni cati ra José chi ra cha cua cati ra chi ra ta ra.
7 Ta cati ndico ra ta ra ti:
―¿Ra chahnu,
ñacu cati cun chihin ndi tacan?
Ta ña tuhva savaha ndiuhu cuhva can.
8 Tu cha tacan iyo ndi,
ña cua quichi ca ndi quichi naan ndi xuhun cha nanihin ndi tichi costa ndi nda ñuun ndi.
¿Ñacu cua suhu ndiuhu xuhun cuaan chi xuhun cuichi ra chitoho cun?
9 Tu cha cua nanihun copa can tichi costa,
ndaa ra suhu chi,
na cua cuvi ra,
ta ndihi maan ndi cua cuu musu ra chitoho cun ―cati ra ta ra.
10 Ta cati ndico ra musu can chi ra ta ra ti:
―Vaha,
tu cha tacan cuu chi.
Cua ndoo chi cuhva cati maan ndo,
soco ndicha cuii ra quihin copa can cua cuu musu ra,
ta ndihi ca ndo cua ndoo nuna ndo,
vati ñahni cuati ndo ―cati ra musu can chi ra ta ra.
11 Tacan cuu,
ta numi ni ra ta ra sanuun ra ta ra xiin burru ra,
ta nuna ra ta ra yuhu iin iin costa ra.
12 Ta quechaha nanducu ra musu can tichi iin iin costa ra ta ra.
Quechaha ra chi ra chanihin ca,
ta sandihi ra chi ra luhu cuii ca,
ta nanihin ra copa can tichi costa ra Benjamín.
13 Nu ni ndehe ndihi yani ra José cha cuhva can cuu chi,
ndata ra ta ra sahma ra cha ndahvi cuni ra ta ra,
ta sa ni taa ndico ra ta ra costa xiin burru ra,
ta cuahan ndico ra ta ra iti ñuun can.
14 Ta nu ni queta ndico ra ta ra vehe ra José,
ni iyo ra vehe ra.
Tacan cuu,
ta chacuiñi chiti ra Judá chi ndihi ca yani ra,
ta taa ra ta ra nuun ra nda nu ñuhun iti nuun ra José.
15 Ta quechaha cati ra José chi ra ta ra ti:
―Ña vaha cha savaha ndo cuhva ya chihin yu.
Vasi ña chito ndo cha rai natava cuu yu ―cati ra.
16 Ta nducahan ra Judá,
ta cati ra ti:
―Ñahni cha chito ndi cua cati ndi chihin cun,
ra chahnu.
Ña cuu cati ndi cha ñahni cuati ndi,
vati ra Ndioo cha ndehe ra cha savaha ndi.
Vitin ndihi ndi cua cuu musu cun,
ta cua cutahan ndihi ndi chi ra ni suhu copa cun ―cati ra.
17 Ta cati ndico ra José ti:
―Ña tacan.
Ndicha cuii ra ni suhu copa can cua cuu musu yu.
Ta ndihi ca ndioho,
na cua cuhun vaha ndo vehe sutu ndo ―cati ra José chi ra ta ra.
Cahan ndahvi ra Judá chi ra Jose cuenda ra Benjamín
18 Tacan cuu,
ta tuhva ra Judá iti nuun ra José,
ta cati ra chi ra ti:
―Ra chahnu,
chite ti cha cua cahin chihin cun,
cuu chi sava ta cua cha cua cahin chi maan ra faraón.
Chica yu tu manini na cua cuhva cun ndatu ti cua cahin iin tiñu chihin cun,
soco ña cua quihun tisihi chihin yu.
19 Maan cun nducu tuhun chihin ndi cha cuu ndi musu cun a ni iyo sutu ndian iyo inga yani ndi.
20 Ta chacan cati ndi chihin cun ti iyo sutu ndi,
ta cha chahnu xaan ra,
ta iyo inga yani ndi cha cuu ra luhu cuii ca,
ta cha chahnu tahan maan sutu ndi,
ta cha cacu ra,
ta inga yani ra ni chihi,
ta ituhun ca rahya ndoo cha in ni sihi ra ta ra,
ta chacan cuni xaan sutu ndi chi ra.
21 Ta maan cun chica cha na quichi ra chihin ndi,
vati cuni cun nacoto cun chihin ra.
22 Ta cati cachi ndi chihin cun ti cua cuvi sutu ndi chi tu cuihya ini,
tu cha cua nacoo ra luhu can chi ra.
23 Ta cati cun chihin ndi ti:
“Tu cha ña cua quichi ra yani ndo chihin ndo,
ña cua quihin cuenda ca yu chihin ndo”,
cati cun ―cati ra Judá.
24 Ni vii cahan ra Judá,
ta cati ra ti:
―Ta quivi cha queta ndico ndi vehe sutu ndi,
ndatuhun ndi chi ra ndihi cuhva cha ni cahan cun.
25 Ta cati ndico sutu ndi chihin ndi ti:
‘Cua cu sata ndo suhva ca trigu cha cua cachi yo’,
cati ra.
26 Ta chacan cati ndico ndi chi ra ti:
‘Tu cua cuhun ra luhu yani ndi,
cua cuhun ndi,
soco tu ña cua cuhun ra ña cua cuhun ndi,
vati ña cua quihin cuenda ca ra ndaca ñahan can chihin ndi,
tu cha ña cua cuhun ra tivaa can chihin ndi’,
cati ndi chi ra.
27 Ta cati ndico sutu ndi chihin ndi ti:
‘Chito vaha maan ndo ti uvi tahan sehi ni chacoo chi ña Raquel ña cuu ñasihi yu.
28 Ta iin ra ña iyo ca ra nui,
ta saxini yu ti vasi chachi quiti cuhu chi ra,
ta nda cua nda vitin ña ndehe que chi ra.
29 Ta vitin,
tu cua quihin ndihi ndo chi rahya,
ta cua cuhun ndo,
ta ñaan cha ña vaha cua tahan ra tican,
cua savaha ndo cha cua cuvi yu chi tu cuihya ini’,
cati ra chihin ndi.
30 “Tu ña cua cuhun ndico ra chihin ndi vitin,
cua cuvi sutu ndi,
vati ni vii iyo ndito ra,
vati cuni mani xaan ra chi ra tivaa ya.
31 Ta cua savaha ndi cha cua cuvi cuii sutu ndi,
tu cua ndehe ra cha cua queta ndi,
ta ñahni ca ra tivaa ya ndaca ndi.
32 Ta cati yu chi suti ti:
‘Main cua cumi chi ra yani yu,
ta inga cha ni cahan yu chi ra ti:
‘Tu cha ña cua quichi ndico ra tivaa can chihin yu,
siqui mai cua ndoo cuati can ndihi ndoo tiempu’,
cati yu chi ra.
33 Ta chacan cuu cha chica yu tu manini chihin cun,
na cuhva cun ndoo mai,
ta cui musu cun tiñu nuun ra tivaa yani yu,
ta maan ra,
na cua cuhun ra chi ndihi ca yani ndi iti vehe ndi,
34 vati ña cuu queta yu nuun suti,
tu ñahni rahya ndaca yu cua cuhin.
Ta ña cuni yu cua ndehi ndihi tundoho cua ndehe suti,
ta cua cuvi ra cuenda chacan ―cati ra Judá chi ra José.