Cuahan ra Benjamín chi yani ra nu iyo ra Jose ñuhun Egipto
43
Ta tiempu can ndunihin iyo tama nu ñuhun Canaán,
2 ta nu ndihi chachi ra ta ra chiti trigu cha cha sata ra ta ra nda ñuhun Egipto,
quechaha cati sutu ra ta ra ti:
―Cua cuhun ndico tucu ndo,
ta cua sata ndo uxu ca cha cua cachi yo ―cati ra.
3 Ta nducahan ra Judá,
ta cati ra ti:
―Cati cachin ra ndaca ñahan ñuhun Egipto can chi ndi ti:
‘Ña cuni ra ndehe ra chihin ndi,
tu ña cua cuhun tahan ra Benjamín yani ndi chi ndi’.
4 Tu cua cuhun ra yani ndi chi ndi,
cua cuhun ndi cua cu sata ndi cha cua cachi yo,
5 soco tu ña cua cuhva cun cuhun ra chihin ndi,
ña cua cuhun ndi,
vati ni cati cachin ra ndaca ñahan can chihin ndi ti:
‘Ña cua quihin cuende chihin ndo,
tu ña cua quichi ra yani luhu ndo chi ndo’,
cati ra chi ndi ―cati ra Judá.
6 Ta cati ndico ra Israel sutu ra ta ra ti:
―Ña vaha cuii savaha ndo cha cati ndo chi ra ndaca ñahan can cha iyo inga yani ndo ―cati ra.
7 Ta nducahan ra ta ra,
ta cati ndico ra ti:
―Maan ra ndaca ñahan can,
nducu tuhun ra chi ndi cuenda maan ndi ta cuenda ndihi ñivi ndi,
ta cati ra chi ndi ti:
‘¿Atu ni iyo ndito sutu ndo?
¿Atu iyo inga yani ndo?’
Ta cati ndi ndihi cha nducu tuhun ra chi ndi,
vati ña chito ndi tu cha cua cati ra cha na cua cuhun tahan ra yani luhu ndi chi ndi ―cati ra ta ra.
8 Tacan cuu,
ta quechaha cati ra Judá chi ra Israel sutu ra ti:
―Cuhva ndatu cha na cua cuhun ra tivaa yani ndi chi mai,
ta cua cuhun ni ndi,
vati tacan ña cua cuvi yo chi soco.
Ña cua cuvi yoho,
ta ni ña cua cuvi sehe ndi.
9 Cha cuenda mai cua cuhun ra,
ta chi mai cua ndaca ndico cun cuenda.
Tu ña cua quichi ndico ra chihin yu,
siqui mai cua ndoo cuati can ndihi ndoo tiempu.
10 Ta tu ñavi cha maun sanducuee xaan chihin ndi,
cha uvi chaha ndi cha quichi ndico ndi ―cati ra Judá.
11 Tacan cuu,
ta cati ndico ra Israel sutu ra ta ra ti:
―Vaha tu tacan.
Cuahan ndo,
soco quihin ndo iin cha vaha cha iyo ñuhun yo,
ta cua cuiso ndo chi tichi costa ndo,
vati cua samani ndo chi chi ra ndaca ñahan can.
Cua quihin ndo suhva baalsamo chi suhva nduxi chi nduta vixin chahan chi suchan xico vixin chahan chi chiti nuee chi limendra.
12 Cua quihin ndico ndo xuhun quichi tichi costa ndo,
ta inga tacan cua quihin ndo cha cua sata ca ndo,
vati chito a ñavi ni catu ra ta ra.
13 Ta quihin tahan ndo chi ra yani ndo,
ta cuahan ndo cua ndehe ndo chi ra ndaca ñahan can.
14 Ta maan ra Ndioo iyo ndihi cuii tundee ini,
na cua cuhva cha vaha chi ra ndaca ñahan can,
ta na cua cuhva ra cha cua quichi ndico ra Simeón yani ndo chihin ndo,
ta tacan ni cua quichi ndico ra Benjamín ya.
Tu ña cua quichi ca ndihi sehi,
cuihya xaan ca cua cuni yu chi anime,
soco cua ndoi vaha ―cati ra chi ra ta ra.
15 Tacan cuu,
ta quihin ra ta ra cha cua samani ra ta ra chi ra ndaca ñahan can,
ta quihin tahan ra ta ra inga uvi tacan xuhun cha cua sata ra ta ra,
ta quihin tahan ra ta ra chi ra Benjamín,
ta cuahan ra ta ra iti ñuhun Egipto.
Ta nu ni queta ra ta ra ican,
cha yaha ra ta ra nu iyo ra José.
16 Ta nu ni ndehe ra José can chi ra Benjamín chihin ra ta ra,
quechaha cati ra chi ra musu chahnu ra ti:
―Cua cundaca cun chi rahya ta ra vehi,
ta cua cahni cun iin sundiquin ti cua cachi ra ta ra chihin yu icaa ni cha sava nduvi ya ―cati ra.
17 Ta ra musu chahnu can,
savaha ra cuhva cha quee tiñu chi ra,
ta cha ndaca ra chihin ra ta ra vehe ra José.
18 Ta yuhvi xaan quechaha cuni ra ta ra cha cuahan ra ta ra vehe ra José.
Ta cati ra ta ra chi tahan ra ti:
―Cha cuenda xuhun cha tihi ndico ta run tichi costa yo cha quichi yo cha xihna cuii,
cuenda chacan vachi naan ta run chihin yo ihya,
ta cua tiin ta run chihin yo,
ta cua cuu yo musu cuatu ta run,
ta cua quihin ta run ndihi burru sana yo ―cati ra ta ra.
19 Ta nu ni queta ra ta ra yuvehe ra José,
tuhva ra ta ra chi ra musu chahnu ra.
20 Ta quechaha cati ra ta ra chi ra ti:
―Ra chahnu,
chito cun cha quichi sata ndi cha cua cachi ndi ihya iin chaha,
ta cuahan ndico ndi.
21 Ta queta ndi nu cua ndoo nuun ndi chacuaa can,
ta ndachi ndi yuhu costa ndi,
ta ndehe ndi cha indi ndico xuhun can cuhva iyo chi tichi costa iin iin ndi,
soco naan ndico ndi chi vachi ndi cha cua cuhva ndico ndi chi.
22 Ta naan ca ndi xuhun cha cua sata ca ndi cha cua cachi ndi,
soco ña chito ndi yoo tihi ndico xuhun can nu costa ndi ―cati ra ta ra chi ra musu chahnu can.
23 Ta cati ndico ra musu can ti:
―Ña saxini ndo,
ta ña cuyuhvi ndo,
vati maan ra Ndioo ndo cha sacahnu sutu ndo,
samani ra xuhun can chihin ndo,
vati quihin yu xuhun cha tiahvi ndo ―cati ra.
Tacan cuu,
ta tava ra chi ra Simeón nu indi ra vecaa,
ta quichi ndaca ra chi ra nu inda ra ta ra.
24 Tacan cuu,
ta satuhun ra chi ndihi ra ta ra cha na quihvi ra ta ra tichi vehe ra José,
ta chaha ra musu can nduta ndoo chaha ra ta ra,
ta chaha tahan ra cha chachi ndihi burru sana ra ta ra.
25 Ta nu ni chito ra ta ra cha cua cusama ra icaa ni chi ra José cha sava nduvi,
tiso vaha ra ta ra ndihi cha cua samani ra ta ra chihin ra na cua queta ra.
26 Ta nu ni quihvi ra José tichi vehe ra,
chahnu chiti ra ta ra,
ta taa ra ta ra nuun ra nda nu ñuhun iti nuun ra José.
Tacan,
ta chaha cuenda ra ta ra cha samani ra ta ra chihin ra.
27 Tacan cuu,
ta nducu tuhun ra José chi ra ta ra ñaan caa iyo ra ta ra,
ta nducu tuhun tahan ra cuenda sutu ra ta ra,
ta cati ra ti:
―Ta ra chanihin cha cati ndo cha cuu sutu ndo,
¿atu iyo vaha ra?
¿atu ni ndito ra?
―cati ra José.
28 Ta cati ndico ra ta ra chi ra ti:
―Ni ndito sutu ndi ra cuu musu cun,
ta iyo vaha ra ―cati ra ta ra.
Ta chahnu chiti ra ta ra nda nu ñuhun,
ta tayahvi xaan ra ta ra chi ra cuhva cha iyo tahan maan ra ta ra.
29 Ta cani nuun ra José,
ta ndehe ra chi ra Benjamín yani ra cha in ni sihi ra ta ra,
ta cati ra chi ra ta ra ti:
―¿Atu rahya cuu yani luhu ndo cuhva cha cati ndo chi?
Ta cati ra chi ra tivaa can ti:
¡Maan ra Ndioo na sacu-ii chihun,
sehu!
―cati ra José chi ra.
30 Tacan,
ta nu ni cati ra chi ra,
ndahvi xaan quechaha cuni ra,
ta cuni ndahyu ra.
Tacan cuu,
ta numi ni ra quihvi ra inga cuartu vehe ra,
ta quechaha ndahyu xaan ra.
31 Yaha ndahyu ra,
ta nacata ndaa ra nuun ra,
ta sanihin ini ra chi ra,
ta quee ndico ra nu iyo ra ta ra,
ta cati ra ti:
“Tihi ndo cha cua cachi ndi”,
cati ra.
32 Tacan,
ta tihi ra ta ra cha cua cachi ra José,
ta tiso ra chi iin nu mesa,
ta ndihi yani ra chacunda ra ta ra inga mesa,
ta maan ñivi ñuhun Egipto cha iyo chihin ra chacunda tahan ñi inga mesa,
vati ña tuhva ñi cunda cachi icaa ni chi ñivi hebreo,
vati ica iyo tiñu cha cua cunda ñi cachi ñi chi ñivi can.
33 Ta chacunda ra ta ra iti nuun ra José savaha ra.
Cuhva cuiya ra ta ra ndaa ra,
ta iyo xaan cuni ra ta ra ndehe ra cuhva cha ndaa tahan ra ta ra.
34 Ta nu ni queta cha cua cachi ra José,
sayaha ra ndayu can na cachi tahan yani ra,
soco chi maan ra Benjamín tihi ra ta ra uhun cuhva cha cua cachi ra.
Cuaha ca chaha ra cha cua cachi ra Benjamín.
Cuhva can chachi ra ta ra,
ta chihi ra ta ra icaa ni chi ra José,
ta cusii ini xaan ra ta ra.