Iti Egipto cuahan yani ra Jose
42
Nu chito ra Jacob cha iyo trigu iti ñuhun Egipto,
quechaha cati ra chi ndihi sehe ra ti:
“Ña vaha ndacu ndo cha taxi tecu ndo ndehe ndo nuun tahan ndo.
2 Chini sohi ti iti ñuhun Egipto iyo xaan chiti trigu.
Chacan cua cuhun ndo,
ta cua sata ndo cha cua cachi yo,
vati tacan ña cua cuvi yo chi soco”,
cati ra Jacob.
3 Tacan cuu,
ta cuahan ndihi uchi yani ra José cua sata ra ta ra chiti trigu nda ñuhun Egipto,
4 soco ña chaha ra Jacob cuhun ra Benjamín chi ndihi ca yani ra,
vati yuhvi ra,
coto ñaan tahan ra.
5 Cuahan ndihi sehe ra Israel chi ndihi ca ñivi cha cua sata tahan tican,
vati nihin xaan iyo tama ñuhun Canaán.
6 Ta maan ra José ndaca ñahan ñuhun Egipto can,
ta suvi ni maan ra xico trigu chi ndihi ñivi ñuun cha quichi inga ñuhun,
ta nu ni queta yani ra José nu iyo ra,
chahnu chiti ra ta ra iti nuun ra.
7 Ta nu ni ndehe ra José chi yani ra,
quii xaan nacoto ra chi ra ta ra,
soco savaha ra cha ña nacoto ra chi ra ta ra.
Chacan cuu cha xaan quechaha nducu tuhun ra chi ra ta ra,
ta cati ra chi ra ta ra ti:
―¿Ta ndioho,
ndaa iti vachi ndo?
―cati ra José.
Ta cati ra ta ra ti:
―Iti ñuhun Canaán quee ndi,
ta vachi sata ndi trigu ―cati ra ta ra.
8 Maan ra José,
nacoto ra chi ra ta ra,
soco ña nacoto maan ra ta ra chi ra.
9 Tacan,
ta chacuhun ini ra José cha ni cahan ñumahna chihin ra cuenda ra ta ra,
ta cati ra chi ra ta ra ti:
―Ndioho,
ra chica ndehe xehe cuu ndo,
vati vachi savaha ndo cuenda ñaan cuhva iyo ndi,
ta yoso cuhva cha cua quichi cani tahan ndo chihin ndi ―cati ra José.
10 Nducahan ra ta ra,
ta cati ra ti:
―Ña tacan,
ra chahnu.
Ndiuhu cuu musu cun.
Cha cachi ndi vachi sata ndi.
11 Ta ndihi ndi cuu sehe ituhun ni rai.
Ñivi vaha cuu ndi.
Ñavi ra chica ndehe xehe cuu ndi ―cati ra ta ra.
12 Ta cati ndico ra José ti:
―Ña ndicha ndo.
Chica ndehe xehe ndo ñaan cuhva iyo ndi ―cati ra.
13 Ta cati ra ta ra ti:
―Ndiuhu,
musu cun.
Uchi uvi yani cuu ndi,
ta sehe in ni rai cuu ndi,
ta iyo ra ñuhun Canaán.
Ta ra luhu cuii ca,
ndoo ra chi sutu ndi,
ta inga ra,
chihi ra ―cati ra ta ra.
14 Ta cati ndico tucu ra José ti:
―Chacan cuu cha cati yu ti ra ndehe xehe cuu ndo.
15 Ta cha cuenda chacan cua nducu cuhva yu chihin ndo,
ta cati ndicha yu chihin ndo cha cuenda ra faraón ti ña cua quee nahan ndo ihya,
tu cha ña cua quichi ra luhu yani ndo.
16 Ndehe maan ndo yoo cua tachi ndo cua cu quihin chi ra,
ta ndihi ca ndo,
cua ndoo nuun ndo vecaa ya,
vati tacan cua nihin yu cuhva tu ndicha ndo cha cahan ndo.
Tu cha ñavi tacan cuu chi,
cha cuenda ra faraón ndicha yu cha cati yu,
vati ra chica ndehe xehe cuu ndo ―cati ra José.
17 Tacan cuu,
ta tihi ra José chihin ra ta ra vecaa uni quivi.
18 Ta yaha uni quivi can,
ta cati ndico ra José chi ra ta ra ti:
―Yuhu,
sacahnu-i chi ra Ndioo.
Tu cha cua savaha ndo cuhva cha cua cati yu,
ña cua cuvi ndo.
19 Tu ndicha ndo cha ñivi vaha cuu ndo,
cua ndoo ituhun ni ndo vecaa ya,
ta ndihi ca ndo,
cua cundaca ndo cha cua cachi ñivi ndo,
ta ña cua cuisoco ca ñi,
20 soco cua quihin ndo chi ra luhu yani ndo,
ta cua quichi ndico ndo.
Tacan cua coto yuan ndicha ndo cha cahan ndo,
ta ña cua cuvi ndo ―cati ra.
―Ndicha cha savaha yo cuati chi yani yo,
vati ndehe yo cha yaha ra tundoho,
ta ni cahan ndahvi ra chihin yo cha na tindee yo chi ra,
soco ña tasoho yo cha cahan ra,
ta chacan indi tahan yo tichi tundoho vitin ―cati ra ta ra.
22 Ta nducahan ra Rubén,
ta cati ra ti:
―Cha cati yu chihin ndo ti na ña cua savaha ndo ndavaha ni chi ra tivaa can,
soco ña tosoho ndo cha cahin,
ta vitin cutuni yo cuenda cha savaha yo chihin ra ―cati ra chi ra ta ra.
23 Ta ña nihin yani ra José cuhva cha cutuni ini ra cha cahan ra ta ra,
vati chatiñu ra José chi iin ra sandico coo tuhun cha cahan ra chi ra ta ra.
24 Tacan,
ta quee ndaa ra José iin chiyo,
ta ndahyu ra cha ndahvi cuni ra.
Yaha chacan,
ta sa queta ndico ra nu indi ra ta ra,
ta nacoo tiñu chi ra Simeón,
ta iti nuun ra ta ra savaha ra cha chuhni tiñu chi ra.
25 Yaha chacan,
ta tava tiñu ra José cha na sacutu tiñu costa ra ta ra chi chiti trigu,
ta savaha ra cha tihi ndico tiñu xuhun cha tiahvi ra ta ra tichi costa iin iin ra.
Ta cati tahan ra cha na cua cuhva tiñu cha cua cachi ra ta ra iti.
Tacan ni savaha tiñu chihin ra ta ra.
26 Ta tiso ra ta ra chi siqui burru ra,
ta cuahan ra ta ra.
27 Tacan cuu,
ta queta ra ta ra nu cua cusu ra,
ta nuna iin ra yuhu costa ra cha cua cuhva ra cha cua cachi burru ra,
ta ndehe ra cha indi xuhun ra nuun chi.
28 Ta cati ra chi yani ra ti:
―¡Chaha ndico ra ta ra xuhun yu-i.
Ndehe ndo cha indi chi tichi costa yu!
―cati ra.
Ta ndihi ca ra,
quechaha cuyuhvi ra ta ra,
ta cati ra chi tahan ra ti:
―¿Ñaan cha cuu cha ndacu ra Ndioo chihin yo?
―cati ra ta ra.
29 Ta nu ni queta ndico ra ta ra nu iyo ra Jacob sutu ra ñuhun Canaán,
chaha ra cuenda cuhva cha tahan ra ta ra.
Ta cati ra ta ra ti:
30 ―Ra ndaca ñahan ñuhun can,
cuxaan xaan ra chihin ndi,
ta cati ra ti ra chica cuu ndehe xehe ñuhun nu ndaca ñahan ra cuu ndi,
31 soco cati ndi chi ra ti ñivi vaha cuu ndi,
ta nducu vaha ndi cha cachi ndi,
ta ña chica ndehe xehe ndi.
32 Ta cati ndi ti uchi uvi yani cuu ndi cha ndihi ndi,
ta in ni sutu ndi,
ta iin yani ndi cha chihi ra,
ta inga ra luhu cuii ca,
ndoo ra chi sutu ndi ñuhun Canaán ―cati ndi chihin ra.
33 Tacan cuu,
ta cati ndico ra ndaca ñahan ñuhun can chihin ndi ti:
‘Tu cha ndicha ndo ti ñivi vaha cuu ndo,
cua nacoo ndo iin yani ndo vecaa ya,
ta ndihi ca ndo,
cua cuhun ndico ndo,
vati cua cunaan ndo chiti trigu cha cua cachi ñivi ndo,
34 soco cua quihin ndo chi ra luhu yani ndo ta cua quichi ra chihin ndo,
ta cuhva can cua coto yu tu cha ndicha ndo cha cahan ndo ti ñavi ñivi chica cuu ndehe xehe cuu ndo.
Tacan,
ta cua quee ndico yani ndo cha ndoo vecaa ya,
ta cua cuu caca cuu nuna ndo ihya,
ta cua cuu sata ndoan cua xico ndo tichi ñuhun ya’,
cati ra chihin ndi.
35 Ta nu quechaha tava ra ta ra ndihi cha indi tichi costa,
ndehe ra ta ra cha mani indi ndico iti xuhun tichi chi,
ta quechaha yuhvi xaan cuni ra ta ra,
ta yuhvi tahan sutu ra.
36 Tacan cuu,
ta cati ra Jacob chi ra ta ra ti:
―¡Ndahvi xaan cuni yu cha savaha ndioho!
Ñahni ca sehi cua ndoo chihin yu,
vati ra José,
ñahni ca ra iyo chihin yo,
ta ni ra Simeón.
Ta vitin cua quihin ndo chi ra Benjamín.
¡Cuenda ndihi cha tahin cua cuvi yu!
―cati ra.
37 Tacan,
ta cati ra Rubén chi sutu ra ti:
―Cuhva ndatu cha cua cuhun ra Benjamín,
vati mai cua cahan cuenda ra,
ta cua quichi naa ndico yu chi ra chihin cun.
Tu ña cua quichi ca ra,
chahi ndatu cha cahni cun nduvi tahan sehi ―cati ra.
38 Ta cati ndico ra Jacob ti:
―Ña cua cuhun ra Benjamín sehi chihin ndo,
vati cha chihi yani ra,
ta ituhun ca ra ndoo chihin yu cha cuu sehe ña Raquel ñasihi yu.
Ta coto ñaan tahan ra iti cuahan ndo,
ta cua savaha ndo cha cua cuvi yu chi tu cuihya ini ―cati ra Jacob.