Sandico coo ra Jose ñumahna cha ndehe ra faraón
41
Yaha uvi cuiya,
ta ndehe ra faraón ñumahna cha inda ra yuhu yuta Nilo,
2 ta tichi yuta can quee ucha sundiquin xahan taqui xaan,
ta quechaha chachi ri ita cha iyo yuhu yuta can.
3 Yaha chacan,
ta quee tahan inga ucha sundiquin cuehe ndasi caa,
ta cuahan ri ta ri nu iyo ri sundiquin xahan tecu yuhu yuta can.
4 Tacan cuu,
ta quechaha chachi ri sundiquin cuehe can ta ri chi ri sundiquin xahan taqui can.
Ta suvi ni hora can ndoyo ra faraón,
5 soco quixi ndico ra,
ta ndehe ndico tucu ra inga ñumahna cha inda iin chaha trigu cha iyo ucha yoco.
Nahnu chi,
ta taqui chi.
6 Tacan cuu,
ta quee inga chaha trigu cha iyo ucha yoco xii chi,
ta iti chi cha chahmi tati yoco cha quichi chiyo cana nicandi.
7 Ta yoco trigu iti can,
quechaha coco chi chi ndihi ucha yoco trigu nahnu can.
Tacan cuu,
ta sa ndoyo ndico tucu ra faraón,
ta chito ra cha ñumahna ndehe ra.
8 Ta tuvi inga quivi can tuñu xaan quechaha cuni ra.
Chacan cuu cha tachi ra tiñu cha quihin chi ndihi ra nditi chi ndihi ra natava cha iyo ñuhun Egipto can,
ta ndatuhun ra chi ra ta ra cuhva cha ndehe ra ñumahna,
soco ni iin ra ta ra ña cuu sandico coo cuhva cha cahan ñumahna can.
9 Tacan cuu,
ta ra cuu xini cha cumi nu chihi ra faraón,
quechaha cati ra chi ra ti:
―Quichi cuhun ini yu vitin cha ña vaha savahi,
10 vati quivi cha quihin cun tisihi chi chi inga ra cuu xini cha savaha paan,
tihi cun chihin ndi vecaa,
ta chaha cuenda cun chihin ndi chi ra cuu xini cha cumi vecaa.
11 Ta iin chacuaa nduvi tahan ndi ndehe ñumahna,
soco siin siin cuhva cuni cati chi.
12 Ta ican indi tahan iin ra tivaa ñuun hebreo,
ta musu ra cuu xini cha cumi vecaa can cuu ra,
ta ndatuhun ndi chi ra cuhva cha ndehe ndi ñumahna.
Ta ra tivaa can,
sandico coo ra cuhva cha cuni cati chi chi iin iin ndi.
13 Ta chinu chi cuhva cha ni cati ra tivaa can chihin ndi.
Yuhu,
nihin ndico yu tiñu savahi,
ta chi inga ra,
chata caa tiñu chi ra ―cati ra tihi cha chihi ra rey can.
14 Tacan cuu,
ta ra faraón,
tachi ra cha quihin tiñu chi ra José nu indi ra vecaa,
ta sata tiñu xini ra chi ixi yuhu ra,
ta sama ra sahma ra,
ta chahan ra iti nuun ra faraón.
15 Ta cati ra faraón can chi ra José ti:
―Ndehi ñumahna,
ta yoni cuu sandico coo chi,
soco chini sohi cha yoho cuu sandico coo cuhva cha cahan ñumahna can ―cati ra faraón.
16 Nducahan ra José chi ra faraón,
ta cati ra ti:
―Ña cuu chi yuhu,
soco ra Ndioo cuu chi ra ―cati ra José.
17 Tacan cuu,
ta ra faraón ndatuhun ra cuhva cha ndehe ra,
ta cati ra ti:
―Ndehi tichi ñumahna cha inde yuhu yuta Nilo.
18 Ta tichi nduta can quee ucha sundiquin xahan taqui xaan,
ta chachi ri ita iyo ican.
19 Yaha chacan,
ta quichi quee tahan inga ucha sundiquin cuehe ndasi caa,
ta ni iin chaha ña ta ndehi sundiquin caa cuhva can tichi ñuhun Egipto.
20 Ta ndihi sundiquin cuehe cha ndasi caa can,
chachi ri ta ri chi ndihi ucha ri sundiquin xahan taqui can.
21 Ta masi chachi ri ta ri chi ri sundiquin xahan can,
soco ña ndichin caa ri cha chachi ri,
vati ta ni cuhva cuehe ri,
ta ndasi caa ri ta ri,
ta hora can chacuhun ini yu.
22 Tacan cuu,
ta ndehe ndico tuqui inga ñumahna cha inda iin chaha trigu,
ta iyo ucha yoco chi,
ta taqui xaan nahnu chi.
23 Ta chahnu tahan inga ucha yoco trigu xii,
ta iti chi savaha tati yoco cha quichi iti chiyo cana nicandi.
24 Ta yoco trigu iti can,
coco chi chi ndihi yoco trigu cha taqui xaan can.
Ta ndihi cuhva ya cha ndatuhin chi ndihi ra nditi,
soco ni iin ra ta ra ña cuu sandico coo cuhva cha cuni cati ñumahna can ―cati ra faraón.
25 Tacan cuu,
ta cati ra José chi ra faraón can ti:
―Nduvi tahan ñumahna cha ndehun,
in ni cuhva cuni cati chi.
Ra Ndioo,
sanahan ra chihun cuhva cha cua savaha ra,
ta cha yatin xaan cua coo chi.
26 Ucha sundiquin xahan ta ucha yoco trigu taqui xaan can cuu chi ucha cuiya cha cua coo vaha itu,
ta in ni cuhva cuni cati ñumahna can.
27 Ta ucha sundiquin cuehe cha ndasi caa,
ta ucha yoco trigu xii,
ta iti chi,
cuu tahan chi inga ucha cuiya cha cua coo tama.
28 Ta sanahan ra Ndioo chihun cuhva can,
vati cha yatin cua savaha ra chi.
29 Ta tichi ucha cuiya cua coo vaha xaan itu cha cua cachi ñivi niniin cahnu ñuhun Egipto.
30 Ta cua yaha tiempu can,
ta inga ucha cuiya can cahnu xaan tama cua coo,
ta yoni cua cucuhun ini quivi cha chacoo vaha cha chachi ñivi,
ta tuvi xaan ñivi cua cuvi cha cuenda tama can niniin cahnu tichi ñuhun Egipto.
31 Quivi cha cua coo tama ya yoni ca cua cucuhun ini cuhva cha chacoo vaha cha chachi ñivi,
vati cuaha ndicha tundoho cua ndehe ñi.
32 Ta nduvi tahan ñumahna cha ndehe cun,
in ni cuhva cuni cati chi.
Ra Ndioo,
cha saxini ndicha ra cuhva cha cua savaha ra,
ta cha yatin xaan cua cuu chi.
33 “Ta chacan cuu cha cati yu chihin cun ti cua cunumi cun,
ta cua nducu cun iin rai nditi,
ta iyo vaha cha chini tuni chi ra,
vati cua ndehe ra tiñu ya niniin cahnu ñuhun Egipto.
34 Ta cua tiso tahan cun chi inga ra ta ra cha cua cuu iti nuun chi tiñu ya ndihi ñuun cha iyo niniin cahnu ñuhun Egipto,
vati cua natahvi ra ta ra uhun cuhva ndihi chiti trigu cha cua nihin ñivi cha satiñu ñi nu ñuhun ya,
ta cua canihin vaha ra ta ra ituhun cuhva chi ndihi ucha cuiya cha cua coo vaha chi.
35 Ta cha nini xaan cuu chi cha cua sacuiti ra ta ra ndihi chacan tichi cuiya cha cua coo vaha chi,
ta vaha ca cha cua coo chi tichi ndaha maun cha cuu cun rey.
Ta cua cuindi vaha chi iin iin ñuun nu cua sataca tiñu chihin chi.
36 Ta cua cuindi vaha chiti trigu can cha cuenda ñivi ñuhun Egipto,
vati chacan cua cachi ñi tichi ucha cuiya cha cua coo tama niniin cahnu ñuhun Egipto,
vati tacan ña cua cuvi ñivi iyo nu ñuhun ya chi soco ―cati ra José chi ra faraón.
Chacundaca ñahan ra Jose chi ñivi ñuhun Egipto
37 Ta tahan xaan ini ra faraón chi ndihi ra cutahan chihin ra cuhva cha cati ra José.
38 Ta cati ra faraón chi ndihi ra cutahan chi ra ti:
―Ña cua nanihin yo chi inga rai cha iyo ra Tati Ndioo ―cati ra.
39 Tacan cuu,
ta quechaha cati ndico tucu ra faraón chi ra José ti:
―Yoni inga ñivi cha nditi,
ta iyo cha chini tuni ta cua maun.
Chihun sanahan ra Ndioo cuhva cha cua coo chi.
40 Vitin cua quihin maun tiñu cha cua cundaca ñahan cun vetiñu nu iyo yu,
ta chi ndihi ñivi ñuin cua cundaca ñahan cun,
ta cua tayahvi ñi tiñu cua cahan cun,
soco mai cua cundaca ñahan chi maun ―cati ra faraón chi ra José.
41 Yaha chacan,
ta cati ndico tucu ra faraón chi ra José ti:
―Ndehe vitin,
chahi tiñu chihin cun cha cua cundaca ñahan cun niniin cahnu ñuhun Egipto ya ―cati ra.
42 Tacan cuu,
ta tava ra faraón xehe indi nundaha ra,
ta tihi ra chi nundaha ra José.
Ta chaha ra tiñu cha na sacundichin ra ta ra iin sahma yuhva linu vaha xaan chi ra,
ta tihi ra iin siqui xuhun cuaan sucu ra.
43 Ta chaha ra faraón iin carreta cha cuahan iti chata ra cha cua coso ra José,
ta chaha ra tiñu cha na cua cana chaa ñivi cuahan iti nuun ra,
ta cana chaa ñi,
ta cati ñi:
“¡Nuna ndo iti cua yaha ra,
ta cahnu chiti ndo!”
Cuhva can chaha ra rey can tiñu chi ra José.
44 Ta cati ndico tucu ra faraón chi ra José ti:
―Main cuu rey ñuhun Egipto,
soco maun cuu ra cua cati ñaan cua savaha ñivi ñuhun ya ―cati ra.
45 Sama ra faraón can sivi ra José,
ta sacunani ra Zafnaat-panea chi ra,
ta chaha ra chi ña Asenaat cha cua cuu ñasihi ra.
Sehe ra Potifera ra cuu sutu ñuun Oon cuu ña.
Tacan,
ta ndoo ra José cuu ra tiñu cha ndaca ñahan ra ñuhun Egipto.
46 Ta cha iyo ra José oco uchi cuiya ra quivi cha chandaca tiñu chi ra nuun ra faraón ra ndaca ñahan ñuhun Egipto.
Ta ican quee ra,
ta cuahan ra cua ndehe ra yoso cuhva iyo ñivi niniin cahnu ñuhun Egipto can.
47 Ta ucha cuiya chacoo cuaha xaan chiti trigu nu ñuhun can.
48 Tacan,
ta ucha cuiya chacoo vaha cha chachi ñivi ñuhun can.
Ta savaha ra José cha sacuiti ñivi chi,
ta canihin vaha ñi chi ndihi ñuun nahnu ndihi cha quee nu iyo chiqui ñi.
49 Ta cuaha xaan chiti trigu sacuiti ra sava ta cua yuti yuhu tañuhun.
Ta ña cuu ca cahvi tiñu chi,
vati cuaha xaan chi.
50 Ta ña ta queta cuiya cha cua coo tama can,
ta chacoo uvi tahan sehe ra José chi ña Asenaat ña cuu sehe ra Potifera ra cuu sutu ñuun Oon.
51 Ta sehe xihna cuii ra sacunani ra Manasés,
vati cati ra ti:
“Maan ra Ndioo savaha cha naan ini yu ndihi tundoho cha ni yahi chi ndihi ñivi yu vehe suti”,
cati ra.
52 Ta chi ra cuu sehe uvi ra sacunani ra Efraín,
ta cati tucu ra ti:
“Maan ra Ndioo chaha ndatu cha na coo sehi ñuhun nu yaha xain tundoho”,
cati ra.
53 Tacan,
ta ndihi ucha cuiya cha chacoo vaha cha chachi vaha ñivi niniin cahnu ñuhun Egipto.
54 Ta quihvi inga ucha cuiya cha quechaha cumani cha cua cachi ñivi,
ta chinu chi cuhva cha ni cati ra José,
vati cahnu xaan chacoo tama niniin cahnu nu ñuhun ñuñivi,
ta ndicha cuii ñuhun Egipto can chacoo cha cachi ñivi.
55 Ta nu ni quechaha chisoco ñivi ñuhun Egipto can,
chahan ñi nuun ra faraón,
ta chica ñi cha cua cachi ñi chi ra.
Tacan cuu,
ta cati ra chi ñi ti:
“Cuahan ndo nuun ra José,
ta racan cua cati ñaan cua savaha ndo”,
cati ra chi ñi.
56 Ta nu quechaha ndunihin ca tama can,
ta cumani cha cachi ñivi niniin cahnu nu ñuhun Egipto can,
nuna ra José ndihi vehe nu indi vaha chiti trigu,
ta quechaha xico ra chi ndihi ñivi iyo ñuhun Egipto can,
vati cahnu ndicha tama chacoo nu ñuhun can,
ta chisoco ñi.
57 Cahnu xaan tama chacoo niniin cahnu nu ñuhun ñuñivi,
ta chacan cuu cha quichi tahan ñivi inga ñuhun,
quichi sata ñi cha cua cachi ñi nu iyo ra José ñuhun Egipto.