Sandico coo ra Jose nduvi tahan cuhva cha cahan ñumahna
40
Yaha chacan,
ta iyo uvi rai cha cuu tatun ra faraón ra ndaca ñahan ñuhun Egipto.
Iin ra cumi cha cua coho ra,
ta inga ra cuu xini chi ñivi cha savaha paan cha chachi ra.
Tacan,
ta chaha ra ta ra tisihi chi ra rey chitoho ra ta ra.
2 Ta xaan xaan cuni ra rey can ndehe ra chi nduvi tahan ra ta ra.
3 Chacan cuu cha chaha cuenda ra chi ra ta ra chi ra cuu xini chi ndihi ñivi cha cumi vecaa cha iyo vehe ra,
vati na cua tihi ra chi ra ta ra nu cha indi ra José.
4 Ta ra cuu xini chi ra cumi vecaa can,
nacoo ra tiñu chi ra José cha na cua ndo tiñu ra chi nduvi tahan ra indi vecaa can,
ta cuaha tiempu cuu chi cha chacuindi ra ta ra ican.
5 Ta nduvi tahan ra indi vecaa can,
ndehe ra ta ra ñumahna in ni chacuaa,
ta siin siin cuhva ni cahan chi chihin ra ta ra.
6 Ta inga quivi can quihvi ra José nu indi ra ta ra,
ta ndehe ra cha saxini xaan ra ta ra,
vati ndahvi xaan cuni ra ta ra,
7 ta nducu tuhun ra chi ra ta ra,
ta cati ra ti:
―¿Ñacu ndahvi xaan ndehe ndo vitin?
―cati ra.
8 Nducahan ra ta ra,
ta cati ra ti:
―Ni cahan ñumahna chihin ndi,
ta yoni chito ñaan cuni cati chi ―cati ra ta ra.
Ta cati ra José chi ra ta ra ti:
―Ra Ndioo cuu sanahan cuhva cha cuni cati chi.
Ndatuhun ndo chihin yu ñaan cha ni cahan ñumahna chihin ndo ―cati ra.
9 Tacan cuu,
ta ra cuu xini cuenda cha chihi ra rey can,
ndatuhun ra chi ra José ñaan cha cuu cha ni ndehe ra,
ta cati ra ti:
―Ndehi cha inda iin yoho chiti uva,
10 ta quee uni tahan soco chi.
Ta cha quee ni ita chi,
ta ita can cha cuu ni chi chiti uva.
11 Ta cha cuu ni chi cha naa yu copa nu chihi ra rey,
ta quihin yu uva can,
ta nacuhni yu chi tichi copa ra.
Ta chahi chi maan ra faraón can ―cati ra.
12 Ta cati ndico ra José chi ra ti:
―Cua cati yu chihun ñaan cuni cati cha ndehe cun tichi ñumahna.
Cha cuu uni soco yoho chiti uva can cuu chi uni quivi.
13 Ta chacan tichi uni quivi cua cucahnu ini ra rey cuati cun.
Ta cua cuhva ndico ra tiñu chihun,
ta cua cuu ndico cun xini cha cua cumi cun cha chihi ra cuhva cha satiñu tahan maun chihin ra nu quichi quivi,
14 soco vitin ta cha cua ndoo nuna cun na cua savahun tu manini cua cucuhun ini cun chihin yu.
Ta cua cahun cuenda yu chi ra rey,
vati na cua quee tahin vecaa ya,
15 vati suhu ñivi chihin yu nu iyo ñivi hebreo,
ta ñahni cuati savahi,
ta indi yu vecaa ya ―cati ra José chi ra.
16 Ta nu ni chini ra savaha paan can ti vaha xaan cahan ra José,
cati tahan ra chi ra ti:
―Ni cahan tahan ñumahna chihin yu.
Cuu chi cha yoso xini yu uni tahan tica paan.
17 Ta tichi tica yoso nda siqui ca indi ndihi nuun paan vixin cha cua cuu chi ra rey,
ta chachi ri saa ndihi paan indi tichi tica cha yoso xini yu ―cati ra.
18 Tacan cuu,
ta cati ndico tucu ra José chi ra ti:
―Cuhva cha ndehe cun uni tahan tica,
cuni cati chi ti uni quivi cuu chi.
19 Ta tichi uni quivi can cua cahnda ra rey sucu cun,
ta cuñu ñuhun cun cua cata caa ra chi nu yutun,
ta cua cachi tachii chi ―cati ra José chi ra.
20 Yaha chacan,
ta tichi uni quivi sacahnu ra faraón vico cuiya ra.
Ta satuhun ra chi ndihi ra ndo tiñu chi ra,
ta iti nuun ndihi racan ta ra tava ra chi nduvi tahan ra tatun ra cha indi vecaa.
21 Ta chi ra cuu xini cuenda cha chihi ra faraón can,
chaha ndico ra tiñu cha cua cumi ra nu chihi ra,
22 ta chi ra savaha paan can,
chata caa ra chi ra nu yutun.
Cuhva ya ni tahan nduvi tahan ra cuhva cha ni cati ra José chi ra ta ra,
23 soco ra cuu xini chi ñivi cha cumi cha chihi ra rey can,
ña cha cuhun ca ini ra chi ra José.