Iyo ra Jose ñuhun Egipto
39
Cuahan ra José chi ñivi ñuun Ismaeel iti ñuhun Egipto,
ta ra Potifaar cha cuu xini cha cumi vehe ra faraón,
ni sata ndico ra,
chi ra José chi ñivi can.
2 Ta vaha xaan chacoo ra vehe ra cuu chitoho ra,
ra ñuhun Egipto,
vati ra Jehová Ndioo chacoo chi ra.
3 Ta ndehe ra Potifaar cha tindee xaan ra Jehová Ndioo chi ra José,
vati ndihi tiñu cha ndacu ra quee vaha chi.
4 Chacan cuu cha quechaha vii xaan iyo ra chi ra José,
ta tiso ra chi ra cha cuu ra xini chi vehe ra chi ndihi cha iyo chihin ra.
5 Nda ni quivi cha ni tiso ra chi ra José cha cuu ra xini,
quechaha savaha ra Jehová Ndioo cha vaha vehe ra Potifaar cha cuenda maan ra José,
vati chaha xaan ra ndatiñu vehe ra,
ta chacoo vaha xaan itu nu iyo chiqui ra.
6 Chacan cuu cha chaha cuenda ra ndihi ndatiñu ra chi ra José cha cua cumi ra,
ta ña tuñu ca cuni ra cuenda ndihi ndatiñu ra,
soco ituhun ni cha chachi ni ra Potifaar saxini ra.
Ta rai taqui cuu ra José,
ta sii cuni ñivi ndehe ñi chi ra.
7 Yaha iin tiempu,
ta ña cuu ñasihi ra Potifaar can,
tahan ini ña chi ra José,
ta queta iin quivi cati ña chi ra ti:
―Cava chihin yu,
José ―cati ña.
8 Ta ña cuni ra José savaha ra cuhva cha chica ña chi ra,
ta cati ra chi ña ti:
―Ndehe xihna,
ñahni cha saxini ña vaha ra chitoho yu,
cuenda cha iyo yu vehe ra,
ta chaha ra cha ndehi ndihi tiñu ra,
vati cua sacuenda vaha yu ndihi cha iyo chi ra.
9 Ta mai cuu xini chi ndihi chacan,
ta ñahni inga ñivi ndehe tiñu cha cahnu ca cuhva mai vehe ya,
soco cha cuenda maun ña chaha ra tiñu chihin cha cua cumi yu chihin cun,
vati ñasihi ra cuu cun,
ta chacan ña cua savaha yu ndavaha ni chihun tichi vehe ra,
vati cuati cuu chi iti nuun ra Ndioo ―cati ra José chi ña.
10 Ta masi ndihi ni quivi chica ña chi ra cha nacoo ra ndavaha ni chihin ña,
soco ña tasoho ra cha cahan ña.
11 Ta queta iin quivi cha yoni iyo tichi vehe,
ta quihvi ra José cha cua savaha ra tiñu,
12 ta xita caa ña sahma ra,
ta cati ña chi ra ti:
―Cava chihin yu vitin ―cati ña.
Nacoo ihni ra sahma ra nuun ndaha ña,
ta quechaha chinu ra.
13 Nu ndehe ña cha chinu ra,
ta ndoo ihni sahma ra nuun ndaha ña,
14 ta quechaha cana chaa ña chi ndihi ca musu cha iyo vehe ña,
ta cati ña ti:
―Ndehe xihna ndo,
ra ñuun hebreo cha quichi ndaca maan ra ii yu ihya,
ña chaa ini ra chihin yo,
vati quihvi ra nu indi yu,
ta cuni ra savaha ra ndavaha ni chihin yu,
soco cana chaa xain chi ndihi cuii tundee ini chi.
15 Ta nu ni chini ra cha quechaha cana chai,
nacoo ihni ra sahma ra,
ta chinu xaan ra cuahan ra ―cati ña.
16 Tivaha ña sahma ra José nda cua nda ni queta ndico maan ra ii ña vehe ñi.
17 Ta cati ña chi ra Potifaar ii ña ti:
―Run hebreo ni sata cun,
quichi run,
ta cuni savaha run ndavaha ni chi,
18 soco quechaha cana chaa xain,
ta nacoo ihni run sahma run,
ta chinu run cuahan run ―cati ña chi ra ii ña.
19 Nu ni chito ra Potifaar ndihi cha ni cati ñasihi ra,
xaan xaan cuni ra.
20 Chacan cuu cha tiin tiñu chi ra José,
ta cuahan ra vecaa nu indi ñivi cha tihi ra faraón ican,
21 soco in ni cuhva chacoo ra Jehová Ndioo chi ra José,
ta chaha ra tundee ini chi ra,
ta chacan vii xaan chacoo ra cuu xini vecaa can chihin ra.
22 Ta tiso ra cuu xini vecaa can chi ra José cha cua sacuenda ra chi ndihi ra indi tichi vecaa can cuhva cha satiñu ra ta ra.
23 Ta ra cuu xini cuenda vecaa can,
ña tichaha ra cuenda ndihi tiñu cha ndacu ra José,
vati ra Jehová Ndioo tindee chi ra José chi ndihi tiñu cha ndacu ra,
ta quee vaha ndihi chi.