Nducu ra Judá chi ña Tamaar cha cua cuu ñasihi ra Er
38
Ta suvi ni tiempu can quee ndaa ra Judá nu iyo ndihi yani ra,
ta cuahan ra nu iyo ra nani Hira ra ñuun Adulaam.
2 Ta ican nacoto ra chi sehe sihi iin ra ñuun Canaán cha nani Sua.
Ta tandaha ra chi ña.
3 Ta yaha quivi,
ta quetuvi ña cha ñuhun sehe ña,
ta cacu ve,
ta ra Judá,
sacunani ra Er chi ve.
4 Yaha iin tiempu,
ta cha cuñuhun inga sehe ña,
ta cacu ve,
ta sacunani ra Onán chi ve.
5 Yaha tucu inga tiempu cha cha iyo ñi nda Queziib,
ta chacoo ndico tucu inga sehe ña,
ta cacu ve,
ta sacunani ra Sela chi ve.
6 Yaha chacan,
ta nducu ra Judá ñasihi ra Er sehe xihna cuii ra,
ta Tamaar nani ña,
7 soco ña sii vaha cuni ra Jehová Ndioo ndehe ra cuhva cha ña vaha iyo ra Er,
ta chacan quenda ra Jehová Ndioo cha ndito ra,
ta chihi ra.
8 Tacan cuu,
ta quechaha cati maan ra Judá can chi ra Onán ti:
―Quihin chi ña cuu ñasihi yani cun,
ta cua coo sehe ndo,
vati tacan na cua coo tata ra yani cun ―cati ra chi ra Onán.
9 Ta ndihi chaha cha chacoo ra chi ña cumi ra chi ra cha na ña cua cuñuhun sehe ña,
vati chito ra cha ñavi sehe maan ra cua cuu ve,
ta ña cuni ra cha cua coo tata yani ra.
10 Ta ra Jehová Ndioo,
ña tahan ini ra cha ni savaha ra Onán.
Chacan quenda tahan ra cha ndito ra,
ta chihi ra.
11 Tacan cuu,
ta cati ra Judá chi ña Tamaar chanu ra ti:
―Cua cuhun cun nu iyo sutu cun,
ta ña cua tandaha nahun nda cua cuahnu ra Sela sehi ―cati ra.
Cati ra cuhva can,
vati yuhvi ra,
coto cua cuvi tahan ra Sela cuhva cha chihi uvi yani ra.
Ta chacan cuahan ña Tamaar vehe sutu ña.
12 Cuaha tiempu yaha,
ta chihi ñasihi ra Judá,
ña cuu sehe ra Sua.
Yaha cha chacoo ra chi tu cuihya ini,
ta cuahan ra chi ra Hira amigu ra iti Timnatt nu iyo ra sata ixi mbee chi ixi chivu sana ra.
13 Ta chito ña Tamaar cha cuahan chiso ña iti Timnatt nu sata ixi mbee chi ixi chivu sana ra.
14 Ta chacan tava ña sahma tuun ndichin ña,
ta chasi ña sahma ndiqui nuun ña,
ta chacunda ña yuhu ñuun Enaiim iti cuahan ñuun Timnatt.
Savaha ña tacan,
vati chito ña cha cha chahnu ra Sela,
ta ña ta tandaha ña chi ra.
15 Ta ndehe ra Judá chi ña,
ta saxini ra ti ñahan chica cuu ndavaha ni cuu ña,
vati ndasi sahma ndiqui nuun ña.
16 Ta tuhva ra nu ndaa ña yuhu iti can,
soco ña chito ra cha chanu ra cuu ña,
ta chacan cati ra chi ña ti:
―¿Atu cuu cusu yu chihin cun?
―cati ra.
Ta nducahan ña,
ta cati ña ti:
―¿Ñaan cua cuhva cun chi cha cua coo cun chihin yu?
―cati ña.
17 Ta cati ndico ra ti:
―Cua tachi yu in chivu luhu cha cuu sana yu chihin cun ―cati ra.
Ta cati ndico ña ti:
―Vaha,
soco cuhva in sahma chi cha cuu in seña cha cua tachi cun chi ri chi ―cati ña.
18 Ta cati ndico ra Judá ti:
―¿Ñaan cha cuu cha cua cuhve chihin cun?
―cati ra.
Ta cati ña chi ra ti:
―Cuhva xehe cha indi sucu cun ndoo ni chi yuhva chi,
ta cua cuhva tahun yutun naa cun ―cati ña.
Tacan cuu,
ta chaha ra ndihi chi chihin ña,
ta chacoo ra chi ña,
ta quetuvi ña cha ñuhun sehe ña.
19 Yaha chacan,
ta tava ña sahma ndiqui ndichin ña,
ta chacundichin ndico ña sahma tuun cuhva cha cuu ña ñahan ndahvi.
20 Tacan,
ta tachi ra Judá chi ri chivu luhu cha cua cundaca ra Hira amigu ra,
vati tacan cua cuhva ndico ña ñahan can ndihi ndatiñu ra,
soco ña nanihin ca amigu ra chi ña.
21 Tacan cuu,
ta nducu tuhun ra chi ra rai iyo ican,
ta cati ra ti:
―¿Ndaa iyo ña ñahan ñuun Enaiim cha chica cuu ndavaha ni cha chacunda yuhu iti ya?
―cati ra Hira.
Ta cati racan ta ra ti:
―Ñahni ni ituhun ñi ñahan chica cuu ndavaha ni iyo ihya ―cati ra ta ra.
22 Tacan cuu,
ta quee ndico ra cuahan ra nu iyo ra Judá,
ta cati ra chi ra ti:
―Ña nanihin yu chi ña ñahan can,
ta cati ra ñuun can ta ra ti yoni ni ituhun ñi ñahan chica cuu ndavaha ni iyo ican ―cati ra chi ra Judá.
23 Ta cati ndico ra Judá ti:
―Na ndoo ndihi cha chahi chihin ña,
vati ña cuni yu cha cua cuacu nahan ñivi ndehe ñi chi,
soco vaha ti tachi yu chi ri chivu luhu can,
ta ña nanihin cun chi ña ―cati ra.
24 Yaha uni yoo,
ta queta tiñu nuun ra Judá,
ta cati ñivi can chi ra ti:
―Ña Tamaar chanu cun,
chacoo ña ndavaha ni chi iin rai,
ta cha ñuhun sehe ña ―cati ñi.
Ta nduxaan ra Judá,
ta cati ra ti:
―¡Tava ndo chi ña iti chata ñuun ndo,
ta cahmi ndo chi ña!
―cati ra.
25 Ta hora cha tava ñivi ñuun can chihin ña tachi ña tiñu chi chiso ña,
ta cati ña ti: ”
Ra cuu chitoho ndihi cha nain ihya iyo cuati cuenda cha ñuhun sehi.
Ta ndehe xehe chi yuhva cha chacuindi sucu ra,
ta yutun cha chacunaan ra”,
cati ña.
26 Tacan cuu,
ta nacoto ra Judá ndihi ndatiñu ra,
ta cati ra ti:
“Cha ndicha ña cati ña cha mai iyo cuati,
vati ña chahi chi ra Sela sehi chi ña cuhva cha cati yu”,
cati ra.
Ta ña chacoo ca ra chi ña ni inga ca chaha.
27 Ta cha cua queta tiempu cha cua cacu sehe ña,
ta chito ña cha xinihin cuu ve ta ve.
28 Ta quivi cha cacu sehe ña tava iin ve luhu can,
ndaha ve,
ta ña ndehe nu cacu ve cuati,
chuhni ña yuhva cuaha ndaha ve tava xihna cuii ndaha,
ta cati ña ti: ”
Rahya cacu xihna cuii”,
cati ña,
29 soco tihi ndico ra ndaha ra,
ta cacu inga ra yani ra,
ta cati ña ndehe nu cacu ve cuati can ti: ”
Quihin xaan iti nuna cun”,
cati ña.
Ta chacan sacunani ñi Fares chi ra.
30 Yaha cha cacu racan,
ta cacu tahan ra nuhni yuhva cuaha ndaha can,
ta chacan chacunani ra Zara.