Xico yani ra Jose chi ra
37
Ta ra Jacob,
ndoo ra ñuhun Canaán nu chacoo sutu ra.
2 Cuhva ya chaha chi cuenda yoso cuhva cha chacoo ñivi ra Jacob.
Ra José,
iyo ra chahun uvi cuiya ra,
ta cha tindee ra sacuenda ra mbee chi chivu chi sehe ña Bilha chi sehe ña Zilpa cha cuu yani ra.
Ta cati tuhun ra chi sutu ra ndihi cha ña vaha ndacu ra ta ra.
3 Ta cuni xaan ca ra Israel chi ra José ta ñavi ca chi ndihi sehe ra cha iyo,
vati cha chahnu xaan ra,
ta cacu ra José.
Ta savaha ra iin sahma ndihi nuun ni color cha ndichin ra.
4 Nu ni ndehe ndihi yani ra cha cuni ca sutu ra ta ra chi ra José ta ñavi ca chi ndihi ra ta ra,
xaan xaan quechaha cuni ra ta ra ndehe ra chi ra José,
ta ni ña cahan vaha ca ra ta ra chi ra.
5 Ta ndehe ra José ñumahna,
ta cati ra chi ndihi yani ra cha ni ndehe ra,
ta xaan ca quechaha cuni ra ta ra ndehe ra chi ra.
6 Ta cati ndico ra José chi ra ta ra ti:
―Tasoho ndo,
ti cua cati yu chihin ndo cuhva cha ndehi ñumahna.
7 Ndihi yo indi tichi cuhu,
ta chuhni yo cuhva sucu trigu,
ta suvi ni hora can sucu cha chuhni yuhu.
Ndoyo chi,
ta chacuinda cuiti chi,
ta sucu cha chuhni maan ndo,
ticuta chi,
ta chacuiñi chiti chi iti nuun cha chuhni yuhu ―cati ra José.
8 Ta nducahan ndihi yani ra,
ta cati ra ta ra ti:
―¿Tu tacan,
yoho cua cundaca ñahan chi ndi,
a yoho cua cuu chitoho ndi?
―cati ra ta ra.
Ta xaan ca quechaha cuni ra ta ra ndehe ra chi ra cuenda cha ndatuhun ra cuhva cha ndehe ra ñumahna can.
9 Ta ndehe ndico tucu ra José inga ñumahna,
ta ta ni cuhva ndatuhun tucu ra chi ndihi yani ra cha ndehe ra.
Ta cati ra ti:
―Ndehe tuqui inga ñumahna cha iyo ri nicandi chi ri yoo chi uchi iin ri tiñu,
ta chahnu chiti ri ta ri iti nui ―cati ra.
10 Ta nu cati tuhun ra chi sutu ra chi ndihi yani ra cuhva cha ndehe ra ñumahna can,
cuxaan sutu ra chi ra,
ta cati ra ti:
―¿Ñaan cuni cati chi cha ndehe cun tacan?
¿An cua queta iin quivi cha cua cahnu chiti yu chi sihi cun chi ndihi yani cun iti nuun cun?
―cati sutu ra chi ra.
11 Ta quechaha ndutahñu cuni ndihi yani ra ndehe ra chi ra,
soco sutu ra,
saxini xaan ra ñaan cuni cati ñumahna cha ndehe ra José.
12 Yaha chacan,
ta ndihi yani ra,
cuahan ra ta ra iti Siquem cua sacuenda ra ta ra mbee chi chivu sutu ra.
13 Tacan cuu,
ta cati ra Israel chi ra José ti:
―Cuni yu cha cua cundehe cun nu indi yani cun nda iti Siquem nu sacuenda ra ta ra mbee ―cati ra Israel sutu ra.
Nducahan ra José,
ta cati ra ti:
―Vaha,
cua cuhin ―cati ra.
14 Ta cati ndico tucu ra Israel chi ra ti:
―Cuahan vitin,
ta cua ndehe cun a vaha ni caa nu indi yani cun sacuenda ra ta ra mbee chi chivu.
Ta sa vachi ndico cun ti cua cati cun chi ñaan caa nu indi ra ta ra ―cati ra Israel chi ra.
Ta quee ra nu cuu chi nduhva Hebrón,
ta cuahan ra nda Siquem,
ta queta ra ican.
15 Ta sana ihni ra tichi cuhu can,
ta nanihin iin ra rai chi ra,
ta nducu tuhun ra chi ra José,
ta cati ra ti:
―¿Ñaan nanducu cun?
―cati ra.
16 Ta cati ra José chi ra ti:
―Chi ndihi yani yu chique nanduqui.
Savaha tu manini cati chi ndaa ca indi ra ta ra sacuenda ra ta ra mbee ―cati ra.
17 Ta cati ndico ra rai can ti:
―Yoni ca ra ta ra indi ihya.
Chini yu cha cati ra ta ra cha cua cuhun ra ta ra iti Dotaan ―cati ra chi ra José.
Tacan cuu,
ta quee ra José cua nanducu ra chi ra ta ra,
ta nanihin ra chi ra ta ra nda ndacan.
18 Ta ni cani ta ndehe ndihi yani ra cha cuahan ra nu indi ra ta ra,
ta quechaha tiso vaha ra ta ra tiñu yoso cuhva cua cahni ra ta ra chi ra.
19 Ta cati ra ta ra chi tahan ra ti:
―Ndehe ndo,
ican vachi ra ndehe ñumahna.
20 Yatin ndo ti cua cahni yo chi ra,
ta cua tihi yo chi ra tichi soco,
ta cua cati yo ti quiti cuhu xaan chachi chi ra.
Ta cua ndehe yo tu cha cua cuinu cuhva cha cahan ñumahna chi ra ―cati ra ta ra.
21 Nu ni chini ra Rubén cha cahan ra ta ra nducu ra cuhva cha cua tindee ra chi ra José,
ta cati ra chi ra ta ra ti:
―Ña cua cahni yo chi ra ―cati ra.
22 Ta cati ndico tucu ra Rubén ti:
―Ña cua cati yo niñi ra.
Cua canihni yo chi ra tichi soco ya,
ta ña cua sayaha yo tundoho chi ra ―cati ra Rubén.
Cati ra cuhva can,
vati cua sacacu ra chi ra,
ta cua tachi ndico ra chi ra José nu iyo sutu ra.
23 Ta nu ni queta vaha ra José nu indi ndihi yani ra quenda ta run sahma taqui ndichin ra.
24 Ta tiin ta run chi ra,
ta tihi ta run tichi soco cunu nu ñahni ca nduta iyo.
25 Yaha chacan,
ta sa chacunda ta run chachi ta run,
ta ndehe run ta run cha vachi uvi ñivi ñuhun Ismaeel cha xico,
cha quee iti ñuhun Galaad.
Ta ndiso camellu ñivi can nduta vixin chahan chi aceite baalsamo chi cutu vaha cha cua xico ra ta ra iti ñuhun Egipto.
26 Tacan cuu,
ta cati ra Judá chi ndihi yani ra ti:
―Ñahni cha cua sacanaan yo cha cua cahni yo yani yo,
ta ña cua cuu tixehe yo cha cua savaha yo.
27 Vaha ca cha cua xico yo chi ra chi ñivi ñuhun Ismaeel ya.
Ña cua sayaha yo tundoho chi ra,
vati yani yo cuu ra,
ta in ni niñi cuu yo ―cati ra chi run ta run.
Nduinuun ndihi ca ta run chi ra Judá.
28 Ta hora cha yaha ñivi ñuhun Madián iti can tava ta run chi ra José tichi soco,
ta chi oco xuhun cuichi xico ta run chi ra chi ñivi ñuun Ismaeel.
Chacan cuu cha cuahan ra José chi ñivi can iti ñuhun Egipto.
29 Ta queta ndico ra Rubén nu ndaa soco can,
ta ndehe ra cha ñahni ca ra José indi ican.
Chacan chahnda cuati ra sahma ndichin ra.
Cha cuu chi iin seña cha ndahvi xaan cuni ra.
30 Ican quee ra,
ta cuahan ndico ra nu indi yani ra,
ta cati ra chi run ta run ti:
―Yoni ca ra José indi tichi soco can.
Ña chite ñaan cua cati yu chi sutu yo vitin ―cati ra.
31 Chacan cuu cha chahni run ta run iin chivu luhu,
ta cuhu ta run niñi ri sahma ra José.
32 Ta quihin run ta run sahma taqui ra,
ta chandaca ta run chi chi ra Jacob,
ta cati run ta run chi ra ti: ”
Sahma ya nanihin ndi.
Ndehe a ñavi chi sehe cun cuu chi”,
cati run ta run chi ra.
33 Nacoto ra Jacob sahma can,
ta cati ra ti: ”
Suvi chi.
Sahma sehi cuu chi.
Vasi iin quiti cuhu xaan chahnda cuati chi ra José,
ta chachi run chi ra”,
cati ra.
34 Tacan cuu,
ta chahnda cuati ra sahma ra,
ta quihin ra iin sahma tuun chacundichin ra,
ta cuaha xaan quivi chacoo ra chi tu cuihya ini,
ta chacu xaan ra cha cuenda sehe ra.
35 Ndihi sehe rai ra chi sehe sihi ra,
cahan ndee ini xaan ñi chi ra,
soco ña ndoo ra vaha,
ta cati ra ti:
“Cua coo tahan maan cha ndahvi anime cha cuenda sehi nda cua nda cha cua cuvi yu”,
cati ra.
Cuhva can ndoo ra ndahyu xaan ra cha cuenda sehe ra.
36 Ta nu queta ñivi ñuhun Madián can ñuhun Egipto xico ta run chi ra José chi ra Potifaar ra cuu xini cha cumi vehe ra faraón.