Ñivi cha cuu tata ra Esaú
36
Ndihi ñivi ya cuu tata ra Esaú,
ta inga sivi ra cuu Edom.
2 Ta ra Esaú,
tandaha ra chi ñi ñahan ñuhun Canaán.
Tandaha ra chi ña Ada cha cuu sehe sihi ra Elón cha cuu ñivi Het,
ta tandaha tahan ra chi ña Aholibama cha cuu sehe sihi ra Aná ra cuu sehe ra Zibeón cha cuu ra ñivi Hev,
3 ta tandaha tahan ra chi ña Basemaat cha cuu sehe sihi ra Ismaeel cha cuu cuhva ra Nebaioot.
4 Ta chacoo iin sehe ña Ada chi ra Esaú,
ta chacunani ve Elifaaz.
Tacan ni ña Basemaat chacoo tahan iin sehe ña,
ta chacunani ve Reuel.
5 Ta ña Aholibama,
chacoo uni tahan sehe ña.
Chacoo ra Jeuus chi ra Jalaam chi ra Coré.
Ndihi racan ta ra cuu sehe ra Esaú cha cacu ñuhun Canaán.
6 Ta quihin ra Esaú chi ñi cuu ñasihi ra chi ndihi sehe rai ra chi sehe sihi ra chi ndihi ñivi cha iyo chi ra.
Quihin tahan ra ndihi quiti cuhu sana ra chi ndihi ndatiñu ra cha nihin ra ñuhun Canaán,
ta quee ndaa ra Esaú chi ra Jacob yani ra,
ta cuahan ra cua coo ra inga ñuhun,
7 vati tuvi xaan sana ra ta ra iyo.
Chacan ña cua cuu coo icaa ra ta ra ñuhun Canaán can,
vati ña cua queta cachi sana ra ta ra ican.
8 Ta ra Esaú ndoo ra yucu Seiir.
Ta Edom cuu inga sivi ra.
9 Ndihi ñivi ya cuu tata ra Esaú cha cuu ñivi ñuun Edom cha iyo yucu Seiir.
10 Ta cuhva ya chacunani ra ta ra:
Iin ra cuu Elifaaz cha cuu sehe ña Ada ñasihi xihna cuii ra Esaú,
ta inga ra cuu ra Reuel cha cuu sehe ña Basemaat inga ñasihi ra.
11 Ta sehe ra Elifaz cuu ra Temán chi ra Omar chi ra Zefo chi ra Gatam chi ra Cenaz.
12 Ta chacoo inca ñasihi ra Elifaz cha chacunani Timna,
ta chacoo iin sehe ña cha nani Amalec.
Rahya cuu seyani ña Ada ña cuu ñasihi xihna cuii ra Esaú.
13 Ta sehe ra Reuel cuu ra Nahaat chi ra Zera chi ra Sama chi ra Miza.
Ndihi racan ta ra cuu sehe ña Basemaat ña cuu ñasihi uvi ra Esaú.
14 Ta ña cuu ñasihi uni ra Esaú cuu ña Aholibama cha cuu sehe ra Anaa,
ta seyani ra Zibeoon cuu ña,
ta ndihi sehe ña cha chacoo cuu ra Jeuus chi ra Jalaam chi ra Coré.
15 Racan ta ra cuu xini chi ñivi ra Esaú.
Ta ndihi sehe ra Elifaaz sehe xihna cuii maan ra Esaú cuu rahya ta ra.
Ra cuu xini cuu ra Temaan chi ra Omaar chi ra Zefo chi ra Cenaaz
16 chi ra Coré chi ra Gataam chi ra Amalec.
Racan ta ra cuu iti nuun chi ñivi ñuhun Edom cha cuu ñivi ra Elifaaz,
ta ndihi ra ta ra cuu sehe ña Ada.
17 Ta ndihi sehe ra Reuel,
inga sehe ra Esaú:
Ra cuu xini cuu ra Nahaat chi ra Zera chi ra Sama chi ra Miza,
ta racan ta ra cuu xini cuenda ra Reuel,
ta chacundaca ñahan ra ta ra chi ndihi ñivi ñuhun Edom cha cuu tata ña Basemaat ñasihi uvi ra Esaú.
18 Ta ndihi sehe ña Aholibama ñasihi uni ra Esaú cha cuu sehe sihi ra Anaa cuu ra Jeuus chi ra Jalaam chi ra Coré,
ta rahya ta ra cuu xini chi ñivi ra ta ra.
19 Ndihi racan ta ra cuu xini cha cuu tata ra Esaú,
ta chacundaca ñahan ra ta ra chi ñivi ñuhun Edom.
20 Rahya ta ra cuu sehe ra Seiir ñivi Hoor cha iyo nu ñuhun can:
Ra Lotaan chi ra Sobaal chi ra Zibeoon chi ra Anaa
21 chi ra Disoon chi ra Ezeer chi ra Disaan cuu ra ta ra.
Ta ndihi racan ta ra cuu xini chi ñivi Hoor cha cuu ñivi ra Seiir cha iyo tichi ñuhun Edom.
22 Ta sehe ra Lotaan cuu ra Hori chi ra Hemaam.
Ta cuhva ra Lotaan cuu ña Timnat.
23 Ta sehe ra Sobaal cuu ra Alvaan chi ra Manahaat chi ra Ebaal chi ra Sefo chi ra Onaam.
24 Ta sehe ra Zibeoon cuu ra Aja chi ra Anaa.
Ta ra Anaa cuu ra nanihin nu iyo nduta nduhva iti nu cha sacoho ra ndihi burru cha cuu sana sutu ra.
25 Ta nduvi sehe ra Anaa cuu ra Disoon chi ña Aholibama.
26 Ta sehe ra Disoon cuu ra Hemdaan chi ra Esbaan chi ra Itraan chi ra Queraan.
27 Ta sehe ra Ezeer cuu ra Bilhaan chi ra Zavaan chi ra Acán.
28 Ta sehe ra Disaan cuu ra Uz chi ra Araan.
29 Rahya ta ra cuu xini chi ñivi Hoor:
Ra Lotaan chi ra Sobaal chi ra Zibeoom chi ra Anaa
30 chi ra Disoon chi ra Ezeer chi ra Disaan cuu ra ta ra.
Ta ndihi racan ta ra chacundaca ñahan chi ñivi ra ta ra tichi ñuhun Seiir.
31 Xihna ca cha ña ta cundaca ñahan ni iin rey chi ñivi ra Israel,
chacoo rey chi ñivi ra Edom ta rahya ta ra chacundaca ñahan:
32 Ra Bela cha cuu sehe ra Beoor,
ta Dinaba chacunani ñuun ra.
33 Ta nu ni chihi ra Bela ndoo ra Jobaab sehe ra Zera cuu ra xini tiñu nuun ra,
ta ra ñuun Bosra cuu ra.
34 Tacan ni cha ni chihi ra Jobaab,
ta ndoo ra Husaam cuu ra xini,
ta ra ñuun Temaan cuu ra.
35 Ta chihi tahan ra Husaam,
ta ndoo ra Hadaad cha cuu sehe ra Bedaad,
ta chacundaca ñahan ra tiñu nuun ra Husaam,
ta racan sacanaan chi ñivi ñuhun Madián nu cuu chi ñuhun Moaab,
ta Aviit chacunani ñuun ra.
36 Ta nu ni chihi tahan ra Hadaad ndoo ra Samlaa cuu ra xini,
ta ra ñuun Masreca cuu ra.
37 Ta cha yaha chihi ra Samlaa,
ta chacundaca ñahan ra Saúl tiñu nuun ra,
ta ra ñuun Rehoboot cuu ra cha ndoo chi xiin yuta cahnu Euufrate.
38 Ta nu ni chihi ra Saúl,
chacundaca ñahan ra Baal-hanaan sehe ra Acboor tiñu nuun ra.
39 Ta nu ni chihi ra Baal-hanaan,
chacundaca ñahan ra Hadaar tiñu nuun ra,
ta ra ñuun Pau cuu ra,
ta ñasihi ra chacunani Mehetabeel sehe ña Matreed ña cuu sehe ra Mezaab.
40 Ndihi sivi ñivi ya cuu tata ra Esaú cuhva chacoo iin iin ñuun ra ta ra.
Ra Timna chi ra Alva chi ra Jeteet
41 chi ra Aholibama chi ra Ela chi ra Pinoon
42 chi ra Cenaaz chi ra Temaan chi ra Mibzaar
43 chi ra Magdieel chi ra Iraam cuu ra ta ra.
Ta ndihi racan ta ra chacundaca ñahan chi ñivi ñuhun Edom cuhva cha tahan chi ñuhun nu chacoo ra ta ra.
Ta maan ra Esaú cuu sutu chi ndihi ñivi ñuhun Edom.