Cuahan ra Jacoob ñuun Beteel
35
Yaha chacan,
ta cahan tucu ra Jehová Ndioo chi ra Jacob,
ta cati ra ti:
“Cuahan iti ñuun Beteel,
ta cua ndoo nuun cun tican.
Ta cua savahun in altaar ican,
ta cua sacahnu cun chihin yu nu ni ndehe cun chi quivi cha cuahan chinu cun nuun ra Esaú yani cun”,
cati ra Jehová Ndioo.
2 Tacan cuu,
ta cahan ra Jacob chi ndihi ñivi ra chi ndihi ca ñivi cha iyo chi ra,
ta cati ra chi ñi ti:
―Cua tava ndo ndihi ita niñu cha sacahnu ndo,
ta cua cuhva cuenda ndo chihin yu,
ta cua coo ica ndo,
ta cua cuti ndo,
ta cua sama ndo sahma ndo,
3 vati cua cuhun yo iti ñuun Beteel,
ta ican cua savahi in altaar nu cua sacahnu yo chi ra Ndioo,
ra ni tindee chihin yu quivi cha chacoi chi tundoho,
ta suvi ni maan ra tindee chihin ndihi nu cuahin nda cua nda vitin ―cati ra Jacob.
4 Cuhva can quechaha chaha cuenda ñi ndihi ita niñu cha sacahnu ñi,
ta chaha tahan ñi ndihi siqui soho ñi,
ta cuchi ra Jacob ndihi run chaha yutun tundii cahnu cha inda yatin ñuun Siquem.
5 Ican quee ñi,
ta cuahan ñi,
ta savaha ra Ndioo cha cuyuhvi ndihi ñivi ñuun cha iyo yatin nu cuahan ñi,
ta yoni cani tahan chi ñivi ra Jacob.
6 Ta queta ra Jacob chi ndihi ñivi ra ñuun cha nani Luuz,
ta vitin nani chi Beteel cha iyo cuenda ñuhun Canaán.
7 Tacan cuu,
ta savaha ra in altaar cuhva cha cati ra Ndioo chi ra,
ta sacunani ra Beteel chi,
vati ican ni ndehe ra chi ra Ndioo quivi cha cuahan chinu ra cuenda ra Esaú yani ra.
8 Ta tichi quivi can chihi ña Débora ñahan ni cumi chi ña Rebeca cha cuu ña ñaluhu,
ta cuchi ñi chihin ña chaha yutun tundii cha inda yatin Beteel can,
ta chacan chacunani chi Aloon-bacuut cha cuni cati “Yutun nu ndahyu ñivi”.
9 Ta quivi cha quichi ndico ra Jacob iti Padan-aram satuvi nuun ra Jehová Ndioo chi ra,
ta ni chaha ra cha vaha chi ra.
10 Ta cati ra Ndioo chi ra ti:
”Jacob nani cun,
soco vitin cua sama yu sivi cun,
ta Israel cua cunani cun”,
cati ra chi ra.
“Yuhu cuu ra Ndioo iyo ndihi cuii tundee ini,
na cua ndutuvi sehe cun chi seyani cun cha cua cuu tata cun,
ta ñican cua sañuun,
ta cua savaha ñi cuaha xaan ñuun nahnu,
ta suvi ni tata cun cua quee ñivi cha cua cundaca ñahan chi ñivi can.
12 Ta ndihi ñuhun cha chahi chi ra Abraham chi ra Isaac
cua cuhve chi chihin cun,
chi ndihi tata cun”,
cati ra Ndioo.
13 Ndihi cahan ra Ndioo chi ra,
ta cuahan ra.
14 Ta quihin ra Jacob iin yuu,
ta chaqui ndaa ra chi cuhva iin seña cha ican ni cahan ra Ndioo chi ra,
ta choso ra aceite olivu chi nduxi chiti uva nuun chi,
ta ndoo chi cuenda ra Ndioo.
15 Ta Beteel sacunani ra Jacob ican,
vati ican ni cahan ra Ndioo chi ra.
16 Tacan cuu,
ta quee ñi ican,
ta cuahan ñi iti nuun ca.
Ni cani ta cua queta ñi ñuun Efrata,
ta cacu sehe ña Raquel.
Cuaha xaan tundoho ndehe ña,
ta chacoo ve.
17 Ta hora cha ni ndehe ña tundoho cati ña ñahan cha ndehe nu cacu sehe ña Raquel ti:
“Ña cuyuhvi cun,
vati suvi ni rai cuu ve cua cacu”,
cati ña.
18 Cha cuni cuvi ña,
ta cacu sehe ña,
ta sacunani ña Benoni chi ve,
soco sutu ve sacunani ra Benjamín chi ve.
19 Yaha chacan,
ta chihi ña Raquel,
ta cuchi ñi chihin ña iti cuahan ñuun Efrata nu cuu chi Belén vitin.
20 Ta quihin ra Jacob iin yuu,
ta chaqui ndaa ra chi nu cuchi ra chi ña Raquel cha cua cuu chi iin seña,
ta iyo chi nda cua nda vitin.
21 Chacan cuu cha quee ñivi ra Israel,
ta cuahan ñi iti nu cuu chi Migdaal-edar,
ta ican ni sandaa ñi vehe ñiin ñi.
22 Tacan cuu,
ta cha ni iyo ñi nu ñuhun can,
ta quixi ra Rubén chi ña Bilha cha cuu ñasihi sutu ra,
ta chacoo ra chihin ña,
ta chito ra Israel cha ni savaha ra,
ta chihi xaan ra tisihi.
Uchi uvi sehe ra Jacoob
Tacan,
ta chacoo uchi uvi sehe ra Israel.
23 Ta ndihi sehe ña Lea cha chacoo chi ra Jacob,
cuu ra Rubén,
sehe xihna cuii ña,
ta sa chacoo tahan ra Simeón chi ra Leví chi ra Judá chi ra Isacar chi ra Zabulón.
24 Ndihi sehe ña Raquel cha chacoo cuu ra José chi ra Benjamín.
25 Ndihi sehe ña Bilha cha cuu musu ña Raquel cuu ra Dan chi ra Neftalí.
26 Ndihi sehe ña Zilpa cha cuu musu ña Lea cuu ra Gad chi ra Aser.
Ndihi racan ta ra cuu sehe ra Jacob cha cacu nu ni chacoo ra iti ñuhun Padan-aram.
27 Ta cuahan ndico ra Jacob vehe ra Isaac sutu ra iti ñuun Mamre cha iyo cuenda ñuhun Arba cha cuu ñuun Hebrón nu ni chacoo ra Abraham chi ra Isaac.
28 Cientu cumi xico cuiya chacoo ra Isaac nu ñuhun ñuñivi ya.
29 Ta cha chahnu xaan ra,
ta chihi ra.
Nduicaa ra chi ñivi chahnu ra,
ta cuchi ra Esaú chi ra Jacob sehe ra chi ra.