Sandoyo ñuhun run Siquem chi ña Dina
34
Ta chacoo iin quivi quee ña Dina sehe ra Jacob chi ña Lea,
ta chahan ña cha ndehe ña chi ñi ñahan tivaa cha iyo ñuun can.
2 Ta ndehe run Siquem chi ña,
ta titahan xaan run chi ña,
ta sa chacoo run ndavaha ni chi ña.
Ta run Siquem can cuu sehe ra Hamoor cha ndaca ñahan chi ñivi ñuun can,
3 soco yaha cha savaha run tacan,
ta cuni xaan run chi ña,
ta nducu run cuhva cha na cua cuni tahan ña chi run.
4 Chacan cuu cha ni cati run chi sutu run ti:
―Cua nducu cun chi ña tivaa can,
vati cua cuu ñasihi yu ―cati run Siquem chi sutu run.
5 Ta nu ni chito ra Jacob cha ni savaha run Siquem chi sehe sihi ra,
ña cahan ni ra hora can,
soco chatu ra nda ni queta ndihi sehe rai ra cha cuahan ra ta ra chiqui cua sacuenda ra ta ra sana ra.
6 Ta suvi ni quivi can chahan ra Hamoor cha cahan vaha ra chi ra Jacob.
7 Ta nu ni queta ndihi sehe rai ra Jacob cha chahan ra ta ra chiqui,
ta ni chito ra ta ra cha savaha run Siquem chi ña Dina.
Ndahvi xaan cuni ra ta ra,
soco xaan xaan quechaha cuni tahan ra ta ra cuenda cha ña chaa ini run Siquem chi ñivi ñuun Israel cha savaha run ndavaha ni chi tahan ra ta ra,
vati iin cha ña tahan chi ni savaha run.
8 Ta ra Hamoor,
cahan vaha ra chi ra ta ra,
ta cati ra ti:
―Ra sehi Siquem,
cuni ndicha ra chi ña tivaa tahan ndo,
ta chacan chica xain tu manini chihin ndo cha na cua cuhva ndo chi ña,
vati cua tandaha ña chi ra.
9 Chacan vitin cua tiso vaha yo tiñu,
vati tacan cua cuu tandaha ñi ñahan ñuun ndo chi ra ñuun maan ndi,
ta cua tandaha tahan ñi ñahan ñuun ndi chi ra ñuun ndo.
10 Cuu ndoo ndo chihin ndi.
Coo ndo,
vati iyo nuna nu ñuhun ya satiñu ndo,
ta xico ndo ndatiñu ndo,
ta cuu sata ca ndo ñuhun cha cua cuu chihin ndo ―cati ra Hamoor.
11 Ta cati run Siquem chi ra Jacob chi ndihi sehe rai ra ti:
―Savaha ndo tu manini chi,
ta cua cuhve ndihi cha cua ndaca ndo.
12 Cati maan ndo chi ñaan ndihi cha cuni ndo,
ta cua cuhva yu ndihi chi,
soco savaha ndo tu manini cuhva ndo chi ña Dina,
ti cua tandahi chi ña ―cati run Siquem.
13 Tacan cati run,
soco ndihi ra cuu sehe rai ra Jacob,
ña cuni vaha ra ta ra ndoo ra ta ra tiñu chi run Siquem ni chi sutu run cuenda cha ña ni chaa ini run chi ñivi ra ta ra,
vati chacoo run ndavaha chi ña Dina,
ta chacan sandahyu ñahan ra ta ra.
14 Ta cati ra ta ra chi run Siquem chi sutu run ti:
―Ña cuu cuhva ndi chi ña tahan ndi cha cua tandaha ña chi iin rai cha ña tahnda ñiin xini xuu ra cuhva iyo maan ndi,
vati cua cuu chi iin tucanuun chihin ndi.
15 Cuu cua ndoo ndi tiñu cuhva cha chica ndo,
soco cua savaha tahan ndo cuhva cha iyo tahan maan ndi,
vati ndihi ra rai ñuun ndo,
cua tahnda tahan ñiin xini xuu ra ta ra.
16 Tacan cua cuu tandaha ra ta ra chi sehe sihi ndi,
ta cua tandaha maan ndi chi ñivi ñahan ñuun ndo.
Ta cua ndoo ndi chihin ndo,
ta cua cuu yo in ni ñuun.
17 Ta tu cha ña ndoo ndo vaha cuhva cha chica ndi chihin ndo,
cua quihin ndi chi ña Dina tahan ndi,
ta cua cuhun ndi ―cati ra ta ra.
18 Ta ra Hamoor chi ra Siquem sehe ra,
ndoo ra ta ra vaha cuhva cha chica tiñu chi ra ta ra.
19 Chacan cuu cha ra Siquem,
numi ni ra,
ta savaha ra cuhva cha chica tiñu chi ra,
vati cuni xaan ra chi sehe ra Jacob.
Ta maan ra cuu iin rai ndaa yahvi xaan chi ndihi ñivi ra.
20 Ta ra Hamoor chi sehe ra,
queta ra ta ra yuhu ñuun ra,
ta cha cahan ra ta ra chi ndihi ra rai ñuun can nu tiso vaha ra ta ra ndihi tiñu.
Ta cati ra ta ra ti:
21 ―Ndihi ñivi cha cuu sehe ra Jacob,
rai vaha xaan cuu ra ta ra,
ta chacan cua cuhva yo cha cua coo ra ta ra nu ñuhun yo,
ta cua satiñu ra ta ra nuun chi,
vati ni iyo xaan nu nuna nu ñuhun yo,
ta cuhva can cua cuu tandaha yo chi sehe sihi ñi,
ta cua cuhva tahan yo sehe sihi yo chihin ñi.
22 Ta cua ndoo ñi coo ñi ihya tu cha cua savaha yo cuhva cha iyo tahan maan ñi,
ta in ni ñuun cua cuu yo.
23 Ndihi ndatiñu ñivi can chi ndihi sana ñi cua cuu chi chi maan yo,
ndicha cuii ti cua sacuinu yo cuhva cha chica ñivi can ―cati ra ta ra chi ñivi ñuun ra.
24 Ta ñivi ñuun can ta ñi,
nduinuun ñi ta ñi chi ra Hamoor chi sehe ra.
Tacan,
ta ndihi ra yaha yuhu ñuun can,
savaha ra ta ra cuhva cha chica tiñu chi ra ta ra,
25 soco cha ni yaha uni quivi cha savaha ra rai can ta ra cuhva cha iyo tahan maan ñivi ra Jacob,
ta ra Simeón chi ra Leví cuhva ña Dina,
quihin ra ta ra machete ra,
ta chahan ra ta ra ñuun can,
ta ni chahni ra ta ra chi ndihi ra rai iyo ican,
ta ña cuu cani tahan ñivi can,
vati ni uhvi xaan ra ta ra cuenda cha savaha ra ta ra cuhva cha ni chica ndihi sehe ra Jacob.
26 Ta chahni tahan ra ta ra chi ra Hamoor chi run Siquem sehe ra chi machete ra,
ta sa ni quihin ndico ra ta ra chi ña Dina,
ta cuahan ra ta ra.
27 Ta queta ndihi ca sehe ra Jacob ñuun can,
ta yaha cava ra ta ra siqui ndii cuecu ican,
ta suhu ra ta ra ndihi cha iyo ñuun can cuenda cha ni savaha run Siquem ndavaha ni chi ña Dina cuhva ra ta ra.
28 Ta quihin tahan ra ta ra ndihi ri mbee chi ri chi chivu chi ri sundiquin chi ri burru cha iyo ñuun can,
ta quihin tahan ra ta ra ndihi ri cha iyo chiqui.
29 Ndihi ndatiñu ñivi can cha iyo vehe ñi ni quihin ra ta ra,
ta quihin ra ta ra chi ndihi ñi ñahan chi ndihi sehe ñi.
30 Tacan cuu,
ta cati ra Jacob chi ra Simeón chi ra Leví ti:
―Ña vaha cuii savaha ndo,
vati tichi tundoho cahnu xaan tihi ndo chihin yu.
Ta vitin ñivi Canaán chi ñivi Ferez,
cua cuxaan ini run ta run chi,
ta cua quichi cani tahan ta run chihin yu,
ta ña tuvi ñivi iyo chihin.
Ta cua cahni ta run chihin yu chi ndihi ñivi yu vehi ―cati ra Jacob.
31 Ta nducahan ra ta ra,
ta cati ra ti:
―Maan run Siquem savaha ndavaha ni chi ña tahan ndi,
vati savaha run chi ña cuhva cha ndacu ñivi chi ñi ñahan chica cuu ndavaha ni ―cati ra ta ra.