Ndumani ra Jacoob chi ra Esaú
33
Ta nu ni ndehe ra Jacob cha vachi ra Esaú chi cumi cientu rai cha cuahan chi ra,
quechaha natahvi ra sehe cuati ra chi ña Lea chi ña Raquel chi nduvi ñi cuu musu ra.
2 Ta nduvi ñi musu can,
cuahan ñi iti nuun chi ndihi sehe ñi,
ta sa cuahan tahan ña Lea chi ndihi sehe ña,
ta nda nu sandihi cuahan ña Raquel chi ra José.
3 Ta yaha ra iti nu ndihi ñi,
ta chahnu chiti ra ta taa ra xini ra nda ñuhun ucha chaha nda cua nda cha nduyatin ra chi yani ra.
Cuhva can queta ra nu inda yani ra,
4 soco ra Esaú,
chinu xaan ra cha satahan iti ra chi ra Jacob,
ta chacunumi ndaa ra chi ra,
ta tayuhu ra chi ra.
Ta quechaha ndahyu xaan nduvi tahan ra ta ra.
5 Yaha chacan,
ta ndehe ra Esaú nu inda ñi ñahan can ta ñi chi ndihi sehe cuati ñi,
ta quechaha nducu tuhun ra chi ra Jacob ti:
―Ta ñivi can,
¿yoo ñi cuu ñi?
―cati ra.
Ta cati ndico ra Jacob ti:
―Sehe cuati ra musu cun cuu ve ta ve cha chaha ra Ndioo chihin yu ―cati ra.
6 Tacan,
ta tuhva ñi cuu musu ra chi ndihi sehe ñi,
ta chahnu chiti ñi nu inda ra Esaú.
7 Ta sa tuhva tahan ña Lea chi ndihi sehe ña ta chahnu chiti ñi,
ta queta tahan ra José chi ña Raquel,
ta chahnu chiti tahan ñi.
8 Ta quechaha nducu tuhun ra Esaú chi ra ti:
―¿Ñaan cuni cati cha tachi cun ndihi sana cun chihin yu chi ndihi ñivi cha tahan tahin iti vachi?
―cati ra.
Ta nducahan ra Jacob,
ta cati ra ti:
―Cuni yu cha savahun tu manini,
cucahnu ini cun chihin yu,
yoho ra chahnu ―cati ra.
9 Ta cati ndico ra Esaú ti:
―Yani xaa,
cuaha xaan cha iyo chihin yu,
na ndoo ndico sana cun chi maun ―cati ra Esaú.
10 Ta nducahan ndico ra Jacob,
ta cati ra ti:
―¡Ña tacan!
Savaha tu manini chihin yu,
tu cha ndicha cucahnu ini cun chi,
cua quihin cuenda cun ndihi cha samani yu chihun,
vati cha ndehi nuun cun vitin.
Nuu ra Ndioo ndehi cuni yu,
ta cusii ini xain,
vati quihin cuenda vahun chi.
11 Ta chica ndahvi xain chihun,
na cua quihin cuenda cun ndihi cha vaha cha chahi chihin cun,
vati maan ra Ndioo,
cuaha xaan cha vaha chaha ra chihin yu,
ta ñahni cha cumani chi ―cati ra Jacob chi ra.
Tacan cuu,
ta quihin cuenda ra Esaú chi,
vati sanini xaan ra Jacob chi ra.
12 Ta cati ndico tucu ra Esaú chi ra ti:
―Cua cuhun yo vitin,
ta mai cua cuhun iti nuun ―cati ra.
13 Ta cati ra Jacob chi ra ti:
―Cha chito maun,
ra chahnu,
ti ni cuati xaan sehi,
ta inga ndico,
ti mbee yu chi chivu yu chi sundiquin yu sa chacoo tahan sehe ri ta ri,
ta tu cha cuaha xaan cua caca ri,
cua cuitatun ri,
ta cua cuvi ri ta ri.
14 Ta chacan cua yaha maun iti nuu,
ta cua cundicu tahan ndi chihun,
ta cuhva cha cuee cuee ni cua caca ndihi sehi chi ndihi sana yu.
Tacan cua cuhin,
ta cua nihin tahan ndico yo nda nu iyo cun ñuhun Seiir ―cati ra.
15 Ta cati ndico ra Esaú ti:
―Tu cha tacan cati cun,
cua ndoo uvi ñivi yu chihun,
vati cua tindee ñi chihun ―cati ra.
Ta nducahan ra Jacob,
ta cati ra chi ra ti:
―Ña saxini cun,
vati cha savaha xaun tu manini chihin yu ―cati ra.
16 Tacan cuu,
ta suvi ni quivi can cuahan ndico ra Esaú iti ñuhun Seiir.
17 Ta ra Jacob,
cuahan ra iti nu cuu chi Sucot,
ta ican sandaa ra vehe ñiin ra,
ta savaha ra tiahva nu chacoo sana ra,
ta chacan sacunani ra Sucot ican.
18 Ta cuhva can queta vaha ra nu cuahan ra cha quee ra ñuun Padan-aram,
ta queta ra ñuun Siquem cha iyo cuenda ñuhun Canaán.
19 Ican sata ra iin ñuhun chi ñivi iyo ican,
cha cuu sehe ra Hamoor,
sutu ra Siquem,
ta tiahvi ra yahvi chi cha cuu ituhun cientu xuhun cuichi,
ta ican sandaa ra vehe ñiin ra.
20 Ta savaha ra in altaar,
ta sacunani ra chi El-Elohee-Israel,
cha cuni cati chi ”Ra Ndioo sacahnu ra Israel”.