Nu nihin tahan ra Jacoob chi ra Esaú
32
Ta sanihin ra Jacob cuahan ra iti chi ndihi ñivi ra.
Ta ni ndehe ra cha tuvi xaan ra tatun Ndioo iyo nu yaha ra.
2 Ta quechaha cati ra Jacob ti:
―¡Nu iyo ra tatun Ndioo cuu tichi cuhu ya!
―cati ra.
Ta chacan sacunani ra Mahanaiim ican.
3 Ta tachi ra Jacob musu ra cuahan iti yucu Seiir nu cuu chi ñuhun Edom nu iyo ra Esaú yani ra.
4 Ta cati ra chi ra ta ra ti:
“Cuhva ya cua cati ndo chi ra:
‘Ra Jacob musu cun tachi chihin ndi,
ta chaha ra cuenda ti:
Chi ra Labán chacoo ra ndihi tiempu ya,
ta satiñu ra chi ra.
5 Ta vitin tuvi xaan sana ra iyo.
Iyo sundiquin ra chi burru ra chi mbee ra chi chivu ra chi musu rai chi musu ñahan iyo chihin ra,
ta tachi ra tuhun chihin cun,
yoho ra chahnu,
ta chica ra tu manini ti na cua quihin cuenda cun chihin ra chi ñivi ra’.
Tacan cua cati ndo chi ra”,
cati ra chi ra ta ra.
Ta quee ra ta ra,
ta cuahan ra.
6 Ta quivi cha queta ndico ra musu can ta ra cha chahan ra tiñu,
ta cati ra ta ra chi ra Jacob ti:
―Chahan ndi nuun ra Esaú yani cun,
ta cha vachi maan ra,
vachi ndehe ra chihin cun chi cumi cientu rai ―cati ra ta ra chi ra.
7 Ta chacan quechaha cuyuhvi xaan ra Jacob,
ta saxini xaan ra,
ta numi ni ra quechaha natahvi ra ñivi ra,
ta ni savaha ra uvi cuenda chi ñi.
Tacan ni natahvi tahan ra sana ra,
ri sundiquin chi ri mbee chi ri chivu chi ri camellu.
8 Ta quechaha saxini ra ti:
“Tu cua quichi ra yani yu,
ta cua cahni ra iin cuenda ñi,
soco inga cuenda ñi,
cua cunu xehe ñi,
ta cua cacu ñi”,
saxini ra.
9 Ta quechaha cahan ndahvi ra chi ra Ndioo,
ta cati ra chi ra ti:
“Maun cuu Ndioo ni sacahnu ra sutu chahnu yu Abraham,
ta suvi ni chi maun sacahnu ra Isaac suti,
ta maun cuu ra Jehová Ndioo ni cati chi cha na cua cuhun ndico yu ñuhun nu iyo ñivi yu,
ta cati cun ti cua tindee cun chihin yu.
10 Ta ndihi chaha savaha xaun tu manini chihin yu,
masi ña tahan chi,
vati main cuu musu cun.
Ta quivi cha ni yahi yuta Jordán ndicha cuii iin yutun ni nain,
soco vitin iyo ñivi yu chi sana yu,
ta cuaha xaan ndatiñu yu,
ta uvi cuenda ñivi cuu chi nu iyo yu vitin.
11 Ta chacan chica yu tu manini ti cua cumi cun chihin yu tu cha cua cani tahan ra Esaú yani yu chi,
vati yuhvi xain,
coto cua cahni ra chi ñi cuu ñasihi yu chi ndihi sehe cuati ndi,
12 vati maun cati ndicha chi cha cua savahun cha vaha chi,
ta tuvi xaan sehe yu chi ñivi yu cua coo cuhva cha iyo cuaha xaan yuti yuhu tañuhun,
ta yoni cua cuu cahvi chi ñi,
cati cun”,
cati ra Jacob chi ra Ndioo.
13 Ta chacuaa can ndoo ra quixi ra ican,
ta nu ndoyo ra,
ta sa nacachi ra quiti cuhu cha cua samani ra chi ra Esaú.
14 Ta quihin ra uvi cientu ri chivu sihi chi oco ri ii chi uvi cientu ri mbee sihi chi oco ri ii
15 chi oco uchi ri camellu sihi ndoo ni chi sehe ri chi uvi xico ri sundiquin sihi chi uchi ri ii chi oco ri burru sihi chi uchi ri ii.
16 Ta chaha cuenda ra chi ri ta ri chi ra cuu musu ra,
iin iin cuenda ri chi iin iin cuenda ra ta ra,
ta cati ra chi ra ta ra ti:
―Cuahan ndo iti nuu,
ta cua nacoo nuna ndo mahñu iin iin cuenda ri quiti cuhu can ―cati ra Jacob chi ra ta ra.
17 Chaha ra tiñu chi ra musu cha cuahan xihna cuii,
ta cati ra chi ra ti:
―Tu cua nihin tahan cun chi ra Esaú yani yu,
ta cua nducu tuhun ra chihun ‘¿Yoo chi iyo cun,
ta ndaa cuahan cun,
ta yoo chi cuu ri quiti cuhu ndaca cun?’,
cua nducu tuhun ra.
18 Ta cua cati cun ti:
‘Chi ra Jacob musu cun cuu ri,
ta chi maun samani ra chi ri,
ra chahnu,
ta vachi tahan ra iti chata yu’,
cua cati cun chi ra ―cati ra Jacob.
19 Tava tiñu ndico tucu ra chi ra musu uvi can,
tacan ni chi ra uni can chi ndihi ca ra ndaca iin iin cuenda ri quiti cuhu sana ra.
Ta cati ra chi ra ta ra ti:
―Tu cua tahan tahan ndo chi ra Esaú,
in ni cuhva cua cahan ndo,
20 ta cua cati ndo chi ra ti:
‘Ra musu cun Jacob,
cha vachi tahan ra iti chata ndi’ cua cati ndo ―cati ra Jacob chi ra ta ra.
Ta saxini ra Jacob ti:
“Cua ndehe ra ndihi cha samani yu,
ta cua nduvita ini ra.
Tacan,
ta hora cha cua ndehe ra chi cua cucahnu ini ra chihin yu”,
saxini ra.
21 Cuhva can tachi ra ndihi cha cua samani ra iti nuun,
ta chacuaa can quixi ra nu ndoo nuun ra.
22 Ta suvi ni chacuaa can ndoyo ra,
ta quihin ra nduvi tahan ñasihi ra chi nduvi musu ñi ta ñi chi ndihi uchi iin sehe ra,
ta sayaha ra chi ñi yuta cha nani Jaboc.
23 Ta nu ni ndihi ñi yaha savaha ra,
sayaha tahan ra ndihi ndatiñu ra.
Titahan ra Jacoob chi ra tatun Ndioo
24 Tacan cuu,
ta ndoo ituhun maan ca ra Jacob,
ta titahan xaan iin ra rai chihin ra nda cua nda cha cundichin,
25 soco hora cha nihin ra rai can cuhva cha ña cua cuu sacanaan ra chi ra Jacob,
cani ra nu tiin tahan iquin siqui xuu ra,
ta yaha tahan chi.
26 Ta cati ra rai can chi ra ti:
―Saña chi,
vati cha cuahin,
ti cha vachi cundichin ―cati ra.
Ta nducahan ra Jacob,
ta cati ra ti:
―Ña cua sañe chihun,
tu cha ña cua cuhva cun cha vaha chihin yu ―cati ra.
27 Ta nducu tuhun ra rai can chi ra Jacob ti:
―¿Ñaan nani cun?
―cati ra.
Ta nducahan ra,
ta cati ra ti:
―Jacob nani yu ―cati ra.
28 Ta cati ndico tucu ra rai can ti:
―Vitin ta iti nuun ñavi ca Jacob cua cuu sivi cun.
Israel cua cunani cun,
vati ni titahan xaan cun chi ra Ndioo ta chi ra ñuñivi,
ta sacanaan cun ―cati ra chi ra Jacob.
29 Ta nducu tuhun ra Jacob chi ra ti:
―Cati tahan ñaan nani cun chihin yu ―cati ra.
Ta nducahan ra rai can,
ta cati ra ti:
―¿Ñacu nducu tuhun cun sivi yu?
―cati ra.
Tacan cuu,
ta chaha ra cha vaha chi ra Jacob.
30 Ta chacan Penieel sacunani ra Jacob ican,
vati cati ra ti:
“Ihya ni satuvi nuun ra Ndioo chi ra chihin yu,
soco ni ndito yu”,
cati ra.