Quee xehe ra Jacoob nu iyo ra Labán
31
Tacan cuu,
ta chito ra Jacob cha cahan ndihi sehe ra Labán,
cha cati ra ta ra ti:
“Cha ndihi ndatiñu sutu yo quihin ra Jacob,
ta chacan cha cuca xaan ra vitin”,
cati ra ta ra.
2 Ta nihin ra Jacob cuhva cha tucu xaan quechaha iyo ra Labán chihin ra,
vati ña iyo mani ca ra chi ra cuhva xihna ca.
3 Tacan cuu,
ta cati ra Jehová Ndioo chi ra Jacob ti:
“Cuahan ndico ñuhun nu iyo sutu cun nu iyo ndihi ñivi cun,
ta main cua cuhun chihin cun”,
cati ra.
4 Tacan cuu,
ta tachi ra Jacob tiñu cha na cua cuhun ña Raquel chi ña Lea nu indi ra chiqui sacuenda ra sana ra,
5 ta cati ra chi ñi ti:
―Cha nihin yu cuhva cha tucu xaan iyo sutu ndo chihin yu,
soco ra Ndioo,
cha sacahnu suti,
iyo ra chi,
6 ta chito vaha maan ndo,
vati ndee xaan satiñu yu chi ra,
7 ta uchi chaha cha sama ra yahvi cha satiñu yu,
ta cha sandahyu ñahan xaan ra chi,
soco maan ra Ndioo,
ña chaha ra cha savaha ra ni iin cha ndavaha ni chi.
8 Ta cha cati ra Labán sutu ndo ti:
‘Ndihi ri pindu can cua cuu yahvi cun’,
ta mani ri mbee pindu quechaha cacu,
ta tu cati ra ti:
‘Ndihi ri ndecu raya can cua cuu chihin cun’,
mani ri ndecu raya sacacu sana ra.
9 Cuhva can quenda ra Ndioo ndihi ri cuu sana sutu ndo,
ta chaha ra chi ri ta ri chihin yu.
10 “Tiempu cha saa ri mbee chi ri chivu,
ni ndehi ñumahna cha ndaa ri chi tahan ri,
ta mani ri ndecu raya chi ri pindu ndaa chi ri sihi.
11 Ta cahan ra tatun Ndioo can sivi yu tichi ñumahna,
ta cati yu chi ra ti:
‘Ihya iyo yu’.
12 Ta cati ndico ra tatun Ndioo chihin ti:
‘Ndehe vaha,
vati ndihi ri ii cha chinu chi ri sihi can,
mani ri ndecu raya chi ri pindu cuu ri ta ri.
Tacan cati yu,
vati cha ni ndehi ndihi cha savaha ra Labán chihun.
13 Ta yuhu cuu Ndioo cha ni ndehe cun tichi ñumahna nu cuu chi Beteel nu ni chaqui ndaa cun iin yuu,
ta choso cun aceite chata chi,
ta ican cati ndicha cun chihin yu cha cua savaha cun.
Ta chacan vitin cua quee cun ihya,
ta cua cuhun cun ñuhun nu ni cacu cun’,
cati ra chi tichi ñumahna ―cati ra Jacob chi ñi ta ñi.
14 Nducahan ña Raquel chi ña Lea,
ta cati ñi ti:
―Ñahni ca cha cua nacoo sutu yo chihin yo na cua cuvi ra.
15 Ta vitin ndacu ra cha ña nacoto ca ra chihin yo.
Ta ndihi yahvi yo cha ni nihin ra cha xico ra chihin yo,
cha ndihi chi sanaan ra.
16 Ta maan ra Ndioo cha ni quenda ndihi ndatiñu sutu yo,
ta chacan chi maan yo chi sehe yo cuu ndihi chi ―cati ña Raquel chi ña Lea.
Ta cati ndico ñi chi ra Jacob ti:
―Savaha ndihi cha cati ra Ndioo chihin cun ―cati ñi chi ra.
17-19 Ta suvi ni quivi can,
cuahan ra Labán cua sata ra ixi mbee ra,
ta quihvi xehe ña Raquel tichi vehe sutu ña,
ta suhu ña ita niñu cuati cha sacahnu ñivi ña.
Ta ra Jacob,
tiso vaha ra ndihi ndatiñu cha cua cuhun chi ñi,
vati cua cuhun ndico ra iti ñuhun Canaán nu iyo ra Isaac sutu ra.
Tacan cuu,
ta sandaa ra chi ndihi sehe ra ta chi ndihi ñasihi ra siqui ri camellu.
Ta quihin ra ndihi ri quiti cuhu sana ra ta ndihi ndatiñu cha nihin ra cha satiñu ra ñuhun Padan-aram.
20 Cuhva can sandahyu ñahan ra Jacob chi ra Labán ra ñuhun Aram,
vati ña ni cati ra chi ra cha cua cuhun ra,
21 ta quihin ra ndihi ndatiñu ra,
ta chinu xehe ra,
ta yaha ra yuta cahnu cha nani Euufrate,
ta cuahan ra iti yucu nu cuu chi ñuhun Galaad.
Cha ndicu ra Labán chi ra Jacoob
22 Tacan cuu,
ta yaha uni quivi,
ta cati ñivi chi ra Labán cha cuahan xehe ra Jacob.
23 Chacan cuu cha sacuiti ra Labán ndihi ñivi ra,
ta cuahan ra ta ra chihin ra,
vati cua ndicu ra ta ra chi ra Jacob.
Ta ucha quivi chica ra ta ra,
ta sa ni tahan ra chi ra nu ndoo nuun ra nu cuu chi yucu Galaad.
24-25 Ta ican ndoo tahan ra Labán chi ndihi ra cuahan chi ra.
Ta chacuaa can cahan ra Ndioo chi ra tichi ñumahna,
ta cati ra chi ra ti:
“Cua cumi cun cuenda ti ña cua cahan yuhu cun chi ra Jacob”,
cati ra chi ra tichi ñumahna can.
26 Ta ra Labán,
cati ra chi ra Jacob ti:
―Ña vaha cha sandahyu ñahan cun chi,
ta quihun sehi,
ta vachi ñi chihun cuhva ñivi cha tiin tiñu nu chacoo cuati.
27 Ña vaha cha chinu xehe cun,
ta ña cati cun chi,
vati tu cha chite,
cua savahi iin vico,
ta cua coo yaa,
ta cua quee vaha cun chi cha vii.
28 Ta ni chi sehe yu ta ni chi seyani yu,
ña ni chaha cun cha tayuhi chi ñi,
ta saña tahan ndi.
¡Ña vaha cuii savahun!
29 Cuu sandoyo ñuhun yu chihin ndo tu cuni yu,
soco cuni ni cahan ra Ndioo sacahnu sutu cun chi tichi ñumahna,
ta cati ra chi ti:
‘Ña cua cahan yuhu cun chi ra Jacob’,
cati ra chi.
30 Ta tu cha cuni xaan cun cuhun cun vehe sutu cun,
¿ñacu suhu cun ndihi ita niñu cha sacahnu yu?
―cati ra Labán.
Ta ña chito ra Jacob cha ña Raquel suhu ña ita niñu cha sacahnu sutu ña.
31 Ta chacan cati ra Jacob chi ra ti:
―Cuyuhvi yu,
ta chacan ña sacote chihun,
vati saxini yu ti cua quenda ndico cun sehe cun chihin yu.
32 Ta cha cuenda ita niñu sacahnu cun,
yaha maun,
ta nanducu cun chi.
Tu cha cua nanihin cun ita niñu chitohun nu iyo ndatiñu yu,
cuu quihin ndico cun chi.
Ta tu cha iyo iin ñivi cha cumi ita niñu cha sacahnu cun ihya,
na cua cuvi ñivi can,
ta ndihi ñivi yu ndehe ñi cuenda chehe ―cati ra Jacob chi ra Labán.
33 Tacan cuu,
ta quihvi ra Labán tichi vehe ñiin nu iyo ra Jacob,
ta quechaha nanducu ra chi.
Ta quihvi tahan ra tichi vehe ñiin ña Lea,
ta sa quihvi tahan ra nu iyo ndihi uvi ñi cuu musu ñi,
ta quihvi tahan ra nu iyo ña Raquel,
soco ñahni cha nanihin ra,
34 vati cha ni tixehe ña chi tichi tayu ri camellu,
ta chacunda ña siqui chi.
Chacan ña nanihin ra Labán ita niñu cuati can,
masi nanducu xaan ra chi tichi nu iyo ña.
35 Ta cati ña chi sutu ña ti:
―Tata,
ña cua cuxaan cun chihin yu,
vati ña cuu cuinde iti nuun cun,
vati tundoho cha tahan maan ndi cha cuu ndi ñahan iyo chihin yu ―cati ña chi ra.
Ta sanihin ca ra Labán nanducu ra ita niñu cuati can,
ta ña nanihin ra chi.
36 Tacan cuu,
ta nduxaan ra Jacob,
ta cati ra chi ra Labán ti:
―¿Ñaan cha cumani yu,
ta ñaan cuati savahi cha vachi nanducu cun chi chi tisihi?
37 Cha nanducu cun ndihi nu iyo ndatiñu yu,
¿ta ñaan cha nanihin cun cha cuu chihin cun?
Caqui chi ihya iti nuun ndihi ñivi yo,
ta maan ñi cua cati ndaa yo ndicha.
38 Oco cuiya satiñu yu chihin cun,
ta ni iin chaha ña nuun sehe mbee cun,
ta ni iin chaha ña chachi yu sehe chivu cun.
39 Ta ni iin chaha ña cha ndaca yu ni iin ri mbee chihin cun cha chahni ri quiti cuhu xaan,
ta tiahvi yu chihun cuenda ri naan cha chinucahni ta chacuaa.
40 Cha chinucahni sandihi chi chihin yu cha ihni,
ta chacuaa ña quixi vahi cha vichin.
41 Cuhva can chacoi oco cuiya vehe cun,
vati uchi cumi cuiya satiñu yu chihin cun cha cuenda nduvi tahan sehe sihi cun,
ta inga iñu cuiya cumi yu sana cun,
ta uchi chaha sama cun yahvi yu.
42 Ta ña cuu quenda cun cha iyo chihin yu,
vati ra Ndioo sacahnu ñivi chahnu yu iyo chihin,
ra sacahnu ra Abraham sutu chahnu-i ta sacahnu tahan ra Isaac suti chihin ra.
Ta racan ndehe cha iyo yu chi tundoho,
ta ndehe ra ndihi tiñu cha ni savahi.
Chacan cuu cha cuxaan ra chihun cuni ―cati ra Jacob chi ra Labán.
Tiso vaha ra Jacoob tiñu chi ra Labán
43 Ta nducahan ra Labán,
ta cati ra chi ra Jacob ti:
―Ñi cuu ñasihi cun,
sehe main cuu ñi ta ñi,
ta ndihi ve cuati ya,
seyani yu cuu ve ta ve,
ta ndihi ri mbee ya chi ri chivu ya chi main cuu ri ta ri,
ta chi main cuu ndihi cha iyo ihya.
Chacan ña cuu savahi cha ña vaha chihin ñi ta ñi chi sehe ñi.
44 Ta chacan vitin cua tiso vaha yo tiñu,
vati tacan nacoto ñivi yo cuhva cha nduinuun yo ―cati ra Labán.
45 Tacan cuu,
ta quihin ra Jacob iin yuu,
ta chaqui ndaa ra chi cha cua cuu chi iin seña.
46 Ta cati ra chi ndihi ñivi ra ti:
―Sacuiti ndo cuaha ca yuu ihya ―cati ra.
Ta ndihi ni ñi sacuiti yuu ican,
ta cuu chi iin mondo,
ta suvi ni siqui chi ni chachi ñi ta ñi.
47 Ta ican sacunani ra Labán “Jegaar Sahaduta”,
ta ra Jacob sacunani “Galaad” chi.
48 Ta cati ra Labán chi ra Jacob ti:
―Vitin,
nu ndumondo yuu ya,
cua cuu chi iin seña cuhva cha ndoo inuun yo,
vati cua cucuhun ini yo cuhva cha tiso vaha yo tiñu ihya ―cati ra.
―Maan ra Jehová Ndioo na cua cumi chi yoho ta chi yuhu ndihi tiempu cha ña cua ndehe tahan ca yo ―cati ra.
50 Ta cati ndico tucu ra Labán ti:
―Tu cha cua sayaha cun tundoho chi sehe sihi yu,
a cua quihun inga ñi ñahan cua cuu ñasihi cun,
vasi yoni ñivi cua ndehe cha ndavaha ni cua savahun,
soco cucuhun ini cun ti ra Ndioo cha ndehe ra chi iin yo ta chi inga yo ―cati ra.
51 Ta cati ndico tucu ra Labán chi ra Jacob ti:
―Vitin ndehe nu chaqui ndaa yo yuu ya,
ta caa mondo ndihi ca chi,
vati chehe cuu iin seña cha cuenda nduvi tahan yo,
52 vati cua cuhva chi cuenda cha ndoo inuun yo,
vati ni yoho ta ni yuhu,
ña cua cuu yaha yo nu iyo seña ya,
ta cua savaha yo cha ña vaha chi tahan yo.
53 Na cua cati ra Ndioo ra Abraham,
ra ni sacahnu tahan ra Nacoor a ndicha yo a ña ndicha yo cha cahan yo chi tahan yo ―cati ra Labán.
Tacan,
ta cati tahan ra Jacob chi ra Labán iin cha ndicha ndicha cuenda ra Ndioo ra Isaac sutu ra.
54 Ta yaha chacan,
ta chahni xaan ra Jacob quiti cuhu sana ra,
ta sacahnu ra chi ra Ndioo siqui yucu can,
ta cana ra chi ndihi ñivi ra ti cua cachi ñi ta ñi,
ta suvi ni ican ndoo ñi chacuaa can.
55 Ta tuvi inga quivi,
nahan xaan ndoyo ra Labán,
ta tayuhu ra chi ndihi seyani ra ta chi ndihi sehe ra,
ta cahan vaha xaan ra chi ñi ta ñi,
ta sa cuahan ndico ra iti ñuun ra.