30
Ta nu ni chito ña Raquel cha ña cuu coo sehe ña chi ra Jacob,
quechaha ndutahñu cuni ña ndehe ña chi cuhvi ña,
ta cati ña chi ra Jacob ti:
―Cua cuvi yu,
tu cha ña cua cuhva cun sehi ―cati ña.
2 Ta quihin ra Jacob tisihi chi ña Raquel,
ta cati ra ti:
―¿Atu Ndioo cuu yuhu cha cati cun tacan?
Maan ra ña chaha chacoo sehe cun ―cati ra.
3 Ta nducahan ña Raquel,
ta cati ña ti:
―Quihin chi ña Bilha cha cuu musu yu,
ta cua coo cun chihin ña,
ta cua coo sehe ña,
ta vecan cua cuu sehi ―cati ña chi ra.
4 Tacan cuu,
ta chaha ña Raquel chi ña Bilha chi ra Jacob,
ta chacoo ra chihin ña.
5 Ta quetuvi ña cha ñuhun sehe ña,
ta chacoo ve cha cuu ve sehe ra Jacob.
6 Ta cati ña Raquel ti:
“Cha ni chini ra Ndioo cha cahan ndahvi yu chihin ra,
vati ni chaha ra iin sehi”,
cati ña.
Ta chacan sacunani ña Dan chi ve,
cha cuni cati chi ”savaha ra Ndioo cha vaha chi ña”.
7 Yaha chacan,
ta chacoo tucu inga sehe ña Bilha chi ra Jacob.
8 Ta cati ndico ña Raquel ti:
“Neftalí cua cunani ve,
vati ndee xaan cani tahin chi ña cuhvi yu,
ta sacanain chi ña”,
cati ña.
9 Ta nu ni chito ña Lea cha ña cuu ca coo sehe ña,
chaha tahan ña chi ña Zilpa ña cuu musu ña cha cua coo ra Jacob chi ña.
10 Tacan cuu,
ta quetuvi ña Zilpa cha ñuhun sehe ña,
ta cacu ve cha cuu ve sehe ra Jacob.
11 Ta cati ña Lea ti: ”
Gad cua cunani ve,
vati ndatu mai cuu ve”,
cati ña.
12 Yaha chacan,
ta chacoo tucu inga sehe ña Zilpa chi ra Jacob.
13 Ta cati ndico ña Lea ti: ”
Sii xaan cuni yu,
ta ndihi ñivi ñahan cua cati ñi ti sii cuu yu”,
cati ña.
Ta chacan sacunani ña Aser chi ve luhu can.
14 Ta tichi tiempu cha canihin tiñu chiti trigu chahan ra Rubén chiqui,
ta nanihin ra iin yutun numa cha chaha chiti mandraagora,
ta chanaan ra chi chi ña Lea sihi ra.
Ta ndehe ña Raquel,
ta cati ña chi ña Lea ti:
―Savaha tu manini chihin yu,
cuhva tahan iin chiti yutun numa cha ni nihin sehe cun chi ―cati ña.
15 Nducahan ña Lea,
ta cati ña ti:
―Cha ni quenda cun chi ra ii yu,
ta vitin cuni ndihi cun quenda cun chiti yutun cha ni nanihin sehi ―cati ña.
Ta cati ndico ña Raquel ti:
―Tu cha cua cuhva cun chiti yutun numa can chi,
cua cusu ra Jacob chihin cun chacuaa ya ―cati ña.
16 Ta cha vachi nuhun ra Jacob iti chiqui cha cha cua ini,
ta cha quihin iti ña Lea chihin ra,
ta cati ña chi ra ti:
―Chacuaa vitin cua cusu cun chihin yu,
vati cha ni chahi chiti yutun cha ni nihin sehi chi ña Raquel cuenda cun ―cati ña.
Ta chacan quixi ra chi ña Lea chacuaa can.
17 Ta quetuvi ña cha ñuhun sehe ña,
ta cacu ve,
ta vecan cuu uhun sehe ra Jacob cha chacoo chihin ña,
vati chini ra Ndioo cha ni cahan ndahvi ña chihin ra.
18 Ta cati ña Lea ti:
“Isacar cua cunani ve,
vati maan ra Ndioo samani inga sehi cuenda cha ni chahi chi ña cuu musu yu chi ra ii yu”,
cati ña.
19 Ta yaha chacan,
ta chacoo ndico tucu inga sehe ña,
ta vecan cuu iñu sehe ra Jacob cha chacoo chihin ña.
20 Ta cati ña Lea ti:
“Maan ra Ndioo samani cha cahnu xaan chihin yu,
ta chacan vitin cua cuni ra ii yu chihin yu,
vati cha chacoo iñu tahan sehi chi ra”,
cati ña.
Ta chacan sacunani ña Zabulón chihin ve.
21 Ta yaha chacan,
ta cacu inga sehe ña Lea.
Ta ñahan luhu cuu ve,
ta chacunani ve Dina,
ta vecan cuu ve sandihi.
22 Ta ni savaha tahan ra Ndioo tu manini chi ña Raquel,
vati chini ra cha cahan ndahvi ña cuenda cha na cuhva tahan ra sehe ña.
23 Cuhva can quetuvi ña cha ñuhun sehe ña,
ta cacu ve,
ta cati ña ti: ”
Quenda ra Ndioo ndihi tucanuun cha ni yahi”,
cati ña.
24 Ta chacan sacunani ña José chihin ve.
Ta cati ndico tucu ña ti:
“Na cua cuhva ndico ni ra Ndioo inga sehi”,
cati ña Raquel.
Sandahyu ñahan ra Jacoob chi ra Labán
25 Ta nu ni yaha cacu ra José,
cahan ra Jacob chi ra Labán,
ta cati ra ti:
―Cuhva ndatu chihin yu,
vati cua cuhun ndico yu ñuhun nu iyo ñivi yu.
26 Ta cua cuhva cun ndihi ñasihi yu chi ndihi sehi ti cua cuhun ñi chi,
vati cuenda maan ñi cha satiñu xaan yu chihin cun ―cati ra Jacob.
27 Ta cati ndico ra Labán ti:
―Cucahnu ini chihin yu,
ta savaha tu manini ta ña cuhun cun,
vati chito vahi cha cuenda maun chaha xaan ra Jehová Ndioo cha vaha chihin yu.
28 Ta chacan cati maun yoso yahvi cun,
vati cua tiahvi yu chihun ―cati ra Labán.
29 Ta nducahan ra Jacob,
ta cati ra chi ra ti:
―Chito vaha cun ti ndee xaan satiñu yu chihin cun cha cumi yu ndihi sana cun.
30 Ta quivi cha queta yu nu iyo cun ña tuvi ri iyo,
soco vitin tuvi xaan ca ri ta ri cha cuu,
vati maan ra Jehová Ndioo savaha cha quee vaha ndihi tiñu cun cha savahi,
ta chacan vitin tahan chi cha cua satiñu tahin cuenda ñivi yu ―cati ra Jacob.
31 Ta cati ra Labán chi ra ti:
―¿Ñaan cuni cun cha cua cuhva yu chihin cun vitin?
―cati ra.
Ta nducahan ra Jacob,
ta cati ra ti:
―Ñahni cha cua cuhva cun chihin yu.
Tu cha cua savaha cun cha cua cati yu,
cua cumi ndico tucu yu sana cun,
32 ta cua cuhva cun cha cua caca cui tañu ndihi ri ta ri chacuaa ya.
Ta cua tava ndaa yu ndihi ri mbee chi chivu pindu chi ndihi ri mbee tuun cuati,
rican ta ri cua cuu yahvi yu.
33 Ta cua ndehe cun tu cha ndicha cha cua savahi.
Cua cundehe cun nu iyo sana yu.
Tu cha cua nanihin cun mbee ta chivu cha ña pindu ri,
ta ña tuun ri,
cua coto cun tu suhu yu sana cun ―cati ra Jacob.
34 Ta cati ndico ra Labán ti:
―Vaha tu cha tacan cati cun.
Ndoi vaha ―cati ra Labán.
35 Ta suvi ni quivi can tixehe ra Labán ndihi ri chivu ndecu raya chi ri pindu chi ri saca cha cuichin chi ndihi ri mbee cha saca cha tuun,
ta chaha ra chi ri ta ri chi sehe rai ra cha cua cumi ra ta ra chi ri.
36 Ta cani xaan cha ndaca ra chi ndihi ri mbee can chi ri chivu can,
vati uni quivi chica ra ta ra,
ta queta ra nu cuahan ra.
Ta ra Jacob,
ndoo ra sacuenda ra ndihi ca mbee chi chivu sana ra Labán cha nandoo chihin ra.
37 Tacan cuu,
ta chahnda ra Jacob soco yutun álamo chi tulimendra chi castañu,
ta saquee ra soco chi cha na ndundichin raya cuichi chi.
38 Ta chaqui ndaa ra chi nu cha coho ri ta ri nduta.
Ta ican ndaa ri ta ri tahan ri.
39 Ta ndihi ri chahan nu tecu soco yutun can chacoo sehe ri cha ndecu raya,
chacoo ri pindu,
ta chacoo ri tuun.
40 Tacan cuu,
ta tava ndaa ra Jacob chi ndihi ri mbee chi chivu pindu chi ri ndecu raya chi mbee tuun,
ta tihi ra chi ri tichi corra maan ra.
Cuhva can savaha ra,
ta ndutuvi sana ra.
Tacan tava siin ra chi ri tuun cha cuu sana ra tichi corra ra Labán chiso ra.
41 Ta ndihi chaha cha ndaa ri ii chi ri sihi nahnu can,
cuahan ra Jacob chaqui ndaa ra soco yutun naquee can nuun ri ta ri,
42 soco ña savaha ra tacan chi ndihi ri cuehe.
Ta chacan ri nahnu ni cuu chi maan ra,
ta ri cuehe can cuu chi ra Labán.
43 Ta cuhva can nducuca xaan ra Jacob,
ta chacoo tuvi xaan sana ra,
mbee chi chivu chi camellu chi burru ra,
ta tuvi musu rai ta musu ñahan chacoo chi ra.