Satiñu ra Jacoob chi ra Labán cha cua tandaha ra chi ña Raquel
29
Yaha chacan,
ta quee ra Jacob,
cuahan ra nu iyo ñivi chiyo cana nicandi.
2 Queta ra ican,
ta ndehe ra in soco nu iyo nduta tichi cuhu,
ta nducuiti uni cuenda ri mbee chi chivu nu iyo soco can,
vati ican cha coho ri ta ri nduta,
ta ndasi in yuu cahnu yuhu soco can.
3 Ta nu cha cha nducuiti ndihi ri ta ri,
sachiyo ra sacuenda mbee can ta ra yuu yuhu soco can,
ta chihi ri ta ri nduta.
Yaha cha chihi ri,
ta sa chasi ndico ra ta ra yuhu soco can.
4 Ta cati ra Jacob chi ra ta ra ti:
―Yani xaa.
¿Ndaa ñuun ndo?
―cati ra.
Nducahan ra ta ra,
ta cati ra ti:
―Ra ñuun Haraan cuu ndi ―cati ra ta ra.
5 Tacan cuu,
ta nducu tuhun ra Jacob chi ra ta ra ti:
―¿An nacoto ndo chi ra Labán sehe ra Nacoor?
―cati ra.
Nducahan ra ta ra,
ta cati ra ti:
―Nacoto ndi chi ra ―cati ra ta ra.
6 Ta nducu tuhun ndico tucu ra Jacob,
ta cati ra ti:
―¿Ta ñaan caa iyo ra?
―cati ra.
Nducahan ra ta ra,
ta cati ra ti:
―Iyo vaha ra.
Ndehe,
ña ñahan vachi ndacan,
chivu chi mbee ra Labán ndaca ña,
ñacan cuu ña Raquel.
Ta sehe ra chi ña ―cati ra ta ra.
7 Ta cati ndico tucu ra chi ra ta ra ti:
―Ndehe ndo ti ni nahan xaan,
ta ña ta queta hora cha cua nducuiti ri mbee chi ri chivu.
Ta ña ta cuaa,
ta chacan cuhva ndo cha cua coho ri,
ta cundaca ndico ndo chi ri tichi cuhu nu cua cachi ca ri ―cati ra Jacob.
8 Nducahan ra ta ra,
ta cati ra ti:
―Ña cuu nuna ndi yuhu soco can,
vati cua nducuiti xihna ndihi ri mbee chi chivu,
ta sa cua nuna ndi,
ta cua cuhva ndi nduta coho ri ta ri icaa ni ―cati ra ta ra.
9 Ni vii ndatuhun ra Jacob chi ra sacuenda mbee can ta ra,
ta queta ña Raquel chi mbee chi chivu maan sutu ña,
vati maan ña sacuenda chi ri ta ri.
10 Cha cuu ña sehe ra Labán,
cuhva ña Rebeca,
sihi ra Jacob.
Nu ni ndehe ra Jacob chi ña Raquel chahan ra cha sachiyo ra yuu cha ndasi yuhu soco can,
ta tava ra nduta chihi ndihi ri mbee chi ri chivu can ta ri cha cuu chi ra Labán xito ra.
11 Ta yaha chacan,
ta chahan ra cha tayuhu ra chi ña Raquel,
ta ndahyu xaan ra.
12 Ta ndatuhun ra chihin ña cha ñivi ra chi sutu ña,
ta sehe ña Rebeca cuu ra,
ta nu ni chito ña chacan chinu xaan ña cuahan ña,
vati cua cati ña chi sutu ña.
13 Ta nu ni chito ra Labán cha tacan queta ra Jacob sehe cuhva ra,
chinu xaan ra cha quihin iti ra chi ra,
ta tayuhu ra chi ra,
ta quihin ra chi ra,
ta cuahan ra ta ra iti vehe ra,
ta ndatuhun ra cuhva cha cuu ñivi ñi.
14 Ta nducahan ra Labán,
ta cati ra ti:
“¡Ndicha ndicha ti ñivi yu chihin cun!”,
cati ra.
Ta ndoo nuun ra Jacob vehe ra ituhun yoo.
Sandahyu ñahan ra Labán chi ra Jacoob
15 Ta iin quivi cati ra Labán chi ra Jacob ti:
―Ñivi yo,
soco ña vaha cha cua satiñu cuatu cun chihin yu,
ta ña cua coo yahvi cun.
Chacan cati maun yoso cua tiahvi yu chihin cun ―cati ra chi ra.
16 Ta iyo uvi sehe sihi ra Labán,
ta ña chanihin nani Lea,
ta ña luhu ca nani Raquel.
17 Ta ña Lea,
ndahvi xaan caa titi nuun ña,
ta ña Raquel,
sii xaan caa nuun ña,
ta taqui xaan ca ñahan cuu ña.
18 Ta chi maan ña Raquel cuni xaan ra Jacob,
ta chacan cati ra chi sutu ña ti:
―Tu cha cua cuhva cun tandahi chi ña Raquel sehe nu cuu cun,
cua satiñu yu chihin cun ucha cuiya ―cati ra.
19 Ta cati ndico ra Labán ti:
―Vaha ca cha cua tandaha ña chi yoho,
ta ñavi ca chi inga rai cuu ni,
ta chacan cua ndoo cun chihin yu ―cati ra.
20 Tacan cuu,
ta ndoo ra Jacob chi ra Labán,
ta satiñu ra ucha cuiya cuenda ña,
ta yatin xaan yaha tiempu can cuni ra,
vati cuni xaan ra chihin ña.
21 Tacan cuu,
ta queta quivi,
ta cati ra Jacob chi ra Labán ti:
―Queta tiempu cuhva cha satiñu yu cuenda ña Raquel,
ta cua tandahi chihin ña ―cati ra.
22 Ta chacan sacuiti ra Labán chi ndihi ñivi cha iyo nu iyo ra,
ta savaha ra vico.
23 Ta chacuaa can cha naan ra Labán chi ña Lea chi ra Jacob,
ta chacoo ra chihin ña.
24 Ta chaha cuenda tahan ra Labán chi ña Zilpa chi ña Lea,
vati cua cuu ña musu ña.
25 Ta tuvi inga quivi can,
ta ndehe ra Jacob cha chi ña Lea quixi ra,
ta chacan cati ra chi ra Labán ti:
―Ña vaha cha savaha cun chihin yu cuhva ya.
Cuaha xaan tundoho satiñu yu cuenda cha cua tandahi chi ña Raquel.
Ta vitin sandahyu ñahan cun chi ―cati ra.
26 Ta nducahan ra Labán,
ta cati ra ti:
―Cuhva cha iyo maan ndi ñuun ndi cuu chacan.
Ña tahan chi cha cua tandaha xihna cuii ña luhu cuii ca,
vati maan ña chanihin ca tahan chi cha cua tandaha xihna cuii.
27 Ta chacan sacuinu yoho vico cha tandahun niniin vita ya chi ña Lea,
ta cua cuhve cha cua tandaha tahun chi ña Raquel,
tu cha cua satiñu cun chihin yu inga ucha cuiya ―cati ra.
28 Ta chacan sacuinu ra Jacob cuhva cha iyo vico tandaha can niniin vita can,
ta chaha cuenda ra Labán chi ña Raquel chihin ra,
ti cua cuu ñasihi ra chi ña.
29 Ta chaha tahan ra chi ña Bilha,
ti cua cuu tahan ña musu ña Raquel.
30 Ta chacoo tahan ra Jacob chi ña Raquel cuhva cha cuu ñasihi ra chi ña,
ta cuni xaan ca ra chi ñacan,
ta ñavi ca sa chi maan ña Lea,
ta chacan satiñu ra inga ucha cuiya cuenda ña.
Chacoo tuvi xaan sehe ra Jacoob
31 Ta ra chahnu Jehová Ndioo,
ndehe ra cha ña cuni vaha ra Jacob chi ña Lea,
ta chacan savaha ra Ndioo cha cua coo sehe ña,
ta ña Raquel ña cuu coo sehe ña,
32 soco ña Lea,
quetuvi ña cha ñuhun sehe ña,
ta cacu ve,
ta chacunani ve Rubén.
Tiso ña sivi ve cuhva can,
vati saxini ña ti:
“Maan ra Jehová Ndioo chito ti ndahvi cuni yu,
ta vasi vitin cua cuni ra ii yu chi”,
cati ña.
33 Inga chaha quetuvi ndico tucu ña cha ñuhun sehe ña,
ta cacu ve,
ta cati tucu ña ti:
“Maan ra Jehová Ndioo,
chito ra cha ña cuni vaha ra ii yu chihin,
ta chacan chaha ra inga sehi”,
cati ña.
Ta chacan sacunani ña Simeón chi ve.
34 Ta quetuvi ndico tucu ña inga chaha cha ñuhun sehe ña,
ta cacu ve.
Tacan cuu,
ta cati tucu ña ti:
“Vitin ndicha ra ii yu,
cua ndoo cuii ra chihin yu,
vati cha chacoo uni tahan sehi chi ra”,
cati ña.
Ta chacan sacunani ña Leví chi ve luhu can.
35 Inga chaha quetuvi ña cha ñuhun sehe ña,
ta chacoo ndico tucu inga ve,
ta cati tucu ña ti:
“Vitin cua sacahnu xain chi ra chahnu Jehová Ndioo”,
cati ña.
Ta chacan tiso ña sivi ve cha nani ve Judá.
Tacan cuu,
ta chacuita cha chacoo sehe ña.