28
Tacan cuu,
ta cana ra Isaac chi ra Jacob,
ta cahan vaha ra chi ra,
ta chaha ra tiñu chi ra,
ta cati ra ti:
“Ña cua tandaha cun chi ñi ñahan ñuhun Canaán.
2 Cua sanumi cun,
ta cua quee cun,
ta cua cuhun cun iti ñuhun Padan-aram,
nu iyo ra Betueel sutu chahnu cun cuenda sihi cun,
ta tican iyo tahan ra Labán xito cun,
ta cua tandaha cun chi sehe sihi ra.
3 Ta maan ra Ndioo cha iyo ndihi cuii tundee ini,
na cua cuhva ra cha vaha chihin cun,
ta na cua ndutuvi sehe cun chi seyani cun chi ndihi ñivi cun,
ta cua cuu cun sutu chi tuvi xaan ñivi.
4 Ta na cua cuhva ra cha vaha chihin cun chi ndihi sehe cun nu ñuhun nu chica ndahvi cun,
vati cuu chi ñuhun cha ni chaha ra Ndioo chi ra Abraham sutu yu”,
cati ra Isaac chi ra Jacob.
5 Tacan,
ta tachi ra Isaac chi ra Jacob iti ñuhun Padaam-araam nu iyo ra Labán xito ra.
Sehe ra Betueel ra ñuun Aram cuu ra.
Ta ra Labán can cuu cuhva maan ña Rebeca sihi ra Jacob chi ra Esaú.
6 Ndehe ra Esaú cuhva cha chaha ra Isaac cha vaha chi ra Jacob,
ta tachi ra chi ra cuahan ra iti ñuhun Padan-aram,
vati tican cua nducu ra ñasihi ra,
ta chito ra Esaú cha cati vaha sutu ra chi ra Jacob cha ña cua cuu tandaha ra chi ñi ñahan ñuhun Canaán.
7 Ta chito tahan ra cha tasoho ra Jacob chi sutu ra chi sihi ra,
vati cuahan ra iti ñuhun nu iyo ñivi ñi.
8 Ta chito ndico tucu ra Esaú cha ña tahan ini sutu ra chi ñi ñahan ñuhun Canaán can.
9 Ta cha iyo uvi tahan ñasihi ra,
soco chahan ra nu iyo ra Ismaeel xito ra,
ta quihin ra sehe sihi racan cha cua cuu ñasihi ra,
ta nani ña Mahalaat cha cuu cuhva ra Nebaioot.
10 Quee ra Jacob Beerseba,
ta cuahan ra iti ñuun Haraan.
11 Ta cha chiso ri nicandi,
ta queta ra inga nu queta ra.
Ta quihin ra ituhun yuu,
ta chaqui ra xini ra chata chi,
ta quixi ra.
12 Ndehe ra tichi ñumahna cha inda iin cuayu nu ñuhun,
ta queta xini chi nda cua nda andivi,
ta tuvi xaan ra tatun Ndioo,
ndaa ra ta ra,
ta nuun ra ta ra nuun chi.
13 Ta ndehe ra cha ra chahnu Jehová Ndioo,
inda ra iti xini cuayu can,
ta cati ra chi ra ti:
“Yuhu cuu ra Jehová Ndioo cha sacahnu ra Abraham sutu chahnu cun ta ra Isaac sutu cun.
Ta ñuhun nu caa cun vitin cua cuhve chi chi sehe cun chi ndihi seyani cun chi ndihi ñivi cun.
14 Ta tuvi xaan sehe cun cua coo,
vati sava ta cua cha iyo ñuhun ñaca cua cuu ñi.
Ta cua coo ñi nda iti xini ñuhun ya ta nda cua nda iti xuu chi ta nda cua nda iti chiyo cana nicandi ta nda cua nda iti chiso ri,
ta ndihi ñivi ñuñivi cua coo cha vaha chihin ñi cha cuenda maun chi cha cuenda sehe cun.
15 Ta mai cua coo chihin cun,
ta cua cumi yu chihin cun ndihi chiyo cua cuhun cun,
ta cua nduqui cha cua quichi ndico cun ñuhun nu iyo cun,
vati ña cua saña ndahi chihin cun,
ta cua sacuinu yu ndihi tiñu cha ni chahi chihin cun vitin”,
cati ra.
16 Ndoyo ra Jacob cha quixi ra,
ta cati ra:
“¡Jehová Ndioo,
iyo ndicha cun ihya,
ta ña chito yu!”,
cati ra.
17 Ta yuhvi xaan cuni ra,
ta cati ndico ra ti:
“¡Nu ii xaan cuu ñuhun ya!
Ihya cuu vehe ra Ndioo,
ta ihya cuu nu cua quihvi yo andivi”,
cati ra.
18 Ta inga quivi can,
nahan xaan ndoyo ra Jacob,
ta quihin ra yuu cha chacava xini ra,
ta chaqui ndaa ra chi,
vati cua cuu chi iin seña cha cua cucuhun ini ra,
ta choso ra aceite nuun chi,
ta sacu-ii ra chi chi.
19 Ñuun can,
chacunani chi Luuz xihna ca,
soco sama ra Jacob sivi chi,
ta sacunani ra Beteel chi.
20 Tacan,
ta cahan ra Jacob iin cha ndicha ndicha iti nuun ra Ndioo,
ta cati ra ti:
“Tu ra Ndioo cua coo chihin yu,
ta cua cumi ra chi nu cua cuhin,
ta cua cuhva ra cha cua cachi chi cha cua cundichin yu,
21 ta cua cuhva ra cha cua queta vaha ndico yu vehe suti,
tu cua cuhva ra ndihi chacan chi,
maan ra Jehová cua cuu Ndioo yu.
22 Ta nu sacuinda yu yuu ya cua cuu chi seña,
ta cua coo vehe ra Ndioo ihya.
Ta ndihi cha cua cuhva ra chihin yu,
cua tava yu uchi cuhva chihin chi,
ta cua cuhva ndico yu ituhun cuhva can chihin ra”,
cati ra.