Chaha ra Isaac ndatu ra Esaú chi ra Jacoob
27
Queta quivi nduchahnu xaan ra Isaac,
ta ña ndichin ca ndehe ra.
Cana ra chi ra Esaú,
vati sehe cha nihin ra cuu ra,
ta cati ra chi ra ti:
―Sehu ―cati ra.
―Ihya iyo yu ―cati ra Esaú.
2 Ta cati ndico ra Isaac chi ra ti:
―Ndehe chihin yu,
vati cha chahnu xain,
ta ña chito yu ama cua cuvi yu.
3 Ta chacan quihin nduva cun,
ta cua cunducu cun ituhun ri quiti cuhu luhu ti cua cachi yu.
4 Cua tiso vaha cun chi ri,
ta cua satihyo cun chi ri,
ta cua cuu ri calu cuhva cha tahan ini mai,
vati cua cachi yu chi,
ta cua cuhve cha vaha chihin cun,
ta cua cuvi yu ―cati ra Isaac.
5 Ta ndihi cha cahan ra ta ra chini ña Rebeca.
Tacan cuu,
ta cuahan ra Esaú,
cua nanducu ra ituhun ri quiti cuhu luhu ti cua cachi sutu ra.
6 Tacan,
ta cati ña Rebeca chi ra Jacob sehe ña ti:
―Ndehe xihna,
ti chini yu cha cahan sutu cun chi ra Esaú yani cun.
7 Ta cati ra ti:
‘Cua cunducu cun ituhun ri quiti cuhu luhu,
ta cua satihyo cun chi ri ti cua cachi yu chi ri,
ta cua cuhva yu ndatu chihin cun iti nuun ra chahnu Ndioo,
ta cua queta quivi cua cuvi yu’,
cati ra.
8 Ta chacan vitin cua savaha cun cuhva cha cua cati yu,
sehu.
9 Cua cuhun cun nu indi mbee chi chivu,
ta cua quihin cun uvi tahan chivu xahan cuati,
vati cua tiso vaha yu chi ri ta ri cuhva cha chachi maan sutu cun.
10 Ta cua cunaan cun chi ri ti cua cachi ra,
ta cua cahan vii ra chihin cun,
ta cua cuhva ra ndatu chihun,
ta cua cuvi ra ―cati ña Rebeca.
11 Tacan cuu,
ta cati ra Jacob chi ña Rebeca sihi ra ti:
―Ndehe,
yaa,
ti ra Esaú yani yu,
ixi xaan ra,
ta yuhu,
ñahni ixi yu.
12 Tu cua cati maan sutu yu ti cua tuhva yu chi ra,
ta cua nanducu ndaha ra chihin yu,
ta cua nihin ra cuhva cha sandahyu ñahan yu.
Ndavaha ni cua cahan ra chi yu,
ta ña cua ndoo yu chi cha vaha ―cati ra Jacob.
13 Tacan cuu,
ta cati ndico sihi ra chi ra ti:
―Ndihi cha ña vaha cua cahan sutu cun chihin cun,
na cua cuhun chi siqui mai,
ta vitin savaha cuhva cha cati yu.
Cua quihin chi ri chivu cuati can,
ta quichi naan cun chi ri ta ri chihin yu ―cati ña.
14 Tacan,
ta chahan ra Jacob cha quihin ra chi ri ta ri,
ta cha ndaca ra chi ri chi sihi ra,
ta satihyo ña chi ri,
ta asi xaan tihyo ri cuhva cha tahan ini maan ra Isaac.
15 Yaha chacan,
ta ña Rebeca,
quihin ña sahma vaha cha chacundichin ra Esaú sehe chanihin ña,
ta sacundichin ña chi chi ra Jacob,
sehe nu cuu ña.
16 Ta quihin tahan ña ñiin ri chivu can,
ta taa ña chi sucu ra chi sucu ndaha ra.
17 Ta chaha ña ndayu cha satihyo ña chi paan cha savaha ña.
18 Ta chanaan ra Jacob chi chi sutu ra,
ta cati ra chi ra ti:
―Tata ―cati ra Jacob.
―Ihya iyo yu ―cati ra Isaac―.
¿Ndaa sehi cuu yoho?
―cati ndico tucu ra.
19 Nducahan ra Jacob chi sutu ra,
ta cati ra ti:
―Ra Esaú,
sehe chanihin cun,
cuu yu.
Savahi cuhva cha ni chica cun chi,
ta vitin ndoyo,
ta cua cunda nuun cun ti cua cachi cun chi ri quiti cuhu luhu cha nihin yu cuenda maun,
ta cua cahan cun cha vaha chihin yu,
ta cua cuhva cun ndatu chi ―cati ra.
20 Tacan,
ta cati ra Isaac chi sehe ra ti:
―¿Yoso savaha cun cha yatin xaan ni nihin cun chi ri?
―nducu tuhun ra.
Ta nducahan ra Jacob,
ta cati ra ti:
―Maan ra Jehová Ndioo,
Ndioo cun tindee chi yu ―cati ra.
21 Ta cati ndico ra Isaac chi ra Jacob ti:
―Satuhva chihin cun iti nui,
sehu,
ta cua tiin ndahun,
vati cua cote a ndicha cha ra Esaú sehi cuu cun ―cati ra.
22 Tuhva ra Jacob chi sutu ra,
ta tiin ra soco ra,
ta cati ra ti:
“Ndusu cun,
cuhva cahan ra Jacob cuu chi,
ta ndaha cun,
ndaha ra Esaú cuu chi’’,
cati ra.
23 Ta ña nacoto ra Isaac chi ra,
vati ixi xaan ndaha ra cuhva caa ndaha maan ra Esaú.
Tacan cuu,
ta cahan vaha ra chi ra,
ta chaha ra ndatu chi ra.
24 Ta cati ra ti:
―¿An ndicha cha Esaú sehi cuu cun?
―cati ra Isaac.
Ta nducahan ra Jacob,
ta cati ra ti:
―Ndicha,
mai cui ―cati ra.
25 Ta cati ndico tucu ra Isaac chi ra ti:
―Cua quichi naan cun suhva cuñu cha satihyo cun ti cua cachi,
ta cua cuhva yu ndatu yu chihin cun ―cati ra.
Ta quichi naan ra Jacob cha cua cachi sutu ra,
ta chaha tahan ra nduta chiti uva cha cua coho ra.
26 Tacan,
ta cati ra Isaac chi ra ti:
―Nahan tihya,
ta tayuhu cun chi,
sehu ―cati ra.
27 Ta nu tuhva ra Jacob nu ndaa sutu ra,
cha cua tayuhu ra chi ra,
ta ra Isaac,
ni tahni ra sahma ndichin ra Jacob,
ta sa cahan vii ra chi ra,
ta chaha ra ndatu ra chi ra,
ta cati ra ti:
“Jihna,
xico ra sehi,
cuhva iyo xico tichi cuhu chahan nuun ra,
ta vaha xaan chi savaha ra Jehová Ndioo.
28 Maan ra Ndioo na cua cuhva cha cua cuun cachin iti siqui,
ta na cua cuhva ra ñuhun vaha nu cua coo cuaha chiti trigu,
ta na cua cuhva ra nduta chiti uva cha cua coho cun.
29 Ta na cua ndotiñu ndihi ñuun chihin cun,
na cua cahnu chiti ndihi ñivi ñuñivi iti nuun cun.
Na cua cundaca ñahan cun chi ndihi ñivi cuu ñivi cun,
ta na cua cahnu chiti ndihi tata sihi cun iti nuun cun,
ta ndihi ñivi cha cua cahan ndavaha ni chihun,
chi maan ñi na cua quichi tundoho,
ta na cua coo cha vaha chi ndihi ñivi cahan cha vaha cuenda cun”,
cati ra.
Cuhva can ni cahan vii ra Isaac sutu ra chi ra.
30 Ta hora ndihi cahan vii ra Isaac chi ra Jacob,
quee ra Jacob,
ta cuahan ndico ra.
Tacan,
ta sa queta ra Esaú chi ri quiti cuhu luhu cha cha nanducu ra tichi cuhu.
31 Ta tiso vaha tahan ra cha cha nanducu ra,
ta asi xaan savaha ra chi,
ta chanaan ra chi chi sutu ra,
ta cati ra chi sutu ra ti:
―Tata,
ndoyo ti cua cachi cun suhva cuñu cha cha nduqui,
ta cua cahan vii cun chihin yu,
ta cua cuhva cun ndatu cun chi ―cati ra.
32 Ta ra Isaac,
nducu tuhun ra chi ra:
―¿Yoo ra cuu cun?
―cati ra.
Nducahan ra Esaú,
ta cati ra ti:
―Yuhu cuu sehe chanihin cun ―cati ra.
33 Ta ra Isaac,
xaan quechaha cuni ra,
ta cati ra ti:
―¿Yoo ra ni quichi naan chi ri quiti cuhu luhu cha chachi yu chuhva?
Ta yoho sa vitin vachi cun.
Cati yu cuhva ya,
vati cha ni cahan vii yu chi ra ni quichi iti nui chuhva,
ta chahi ndatu yu chi ra.
Ta vitin cha nihin racan chi ―cati ra Isaac chi ra Esaú.
34 Ta nu ni chini ra Esaú cha tacan cuu chi,
ndahyu chaa xaan ra chi tisihi,
ta cati ra chi sutu ra ti:
―Tata,
cahan vii tahan chihin yu,
ta cuhva tahun ndatu cun chi ―cati ra.
35 Ta cati ra Isaac chi ra ti:
―Ra yani cun,
cha ni quichi ra,
ta sandahyu ñahan ra chihin yu,
ta quihin ra ndatu cha tahan chi maun ―cati ra.
36 Ta ra Esaú,
cati ndico ra ti:
―Cha tacan iyo ra.
Chacan tiso ndo sivi ra cha nani ra Jacob,
vati cha xihna cuii quenda ra ndatu cha cua coo chihin yu cha cui sehe chanihin cun,
ta cha uvi cuu chi vitin cha sandahyu ñahan ra,
ta quihin ra cha cahan vii cun cha tahan chi chihin yu ―cati ra.
Ta cati ndico ra chi sutu ra ti:
―¿Atu ñahni inga cha cua cahan vii tahun chihin yu?
―cati ra Esaú.
37 Nducahan ra Isaac,
ta cati ra chi ra ti:
―Cha ni chaha yu ndatu chi ra cha cua cundaca ñahan ra chihin cun chi ndihi sehe cun chi ndihi seyani cun chi ndihi ñivi cun,
ta cha chahi cuaha xaan chiti trigu cha cua cachi ra chi nduta chiti uva cha cua coho ra,
ta ndihi chacan cua nihin ra.
¿Ñaan ca cha cuu cha cua cuhve chihin cun vitin,
sehu?
―cati ra.
38 Tacan cuu,
ta cati ndico tucu ra Esaú chi sutu ra ti:
―¿Atu ñahni ñaan inga tuhun cha cahan cun chihin,
ta tata?
Cahan vii tahan chihin yu vitin ―cati ra Esaú,
ta quechaha ndahyu xaan ra.
39 Tacan cuu,
ta cati ndico ra Isaac ti:
“Ña cua coo cun nu ñuhun vaha,
ta ni ña cua coo vaha savi nu ñuhun cun,
ta ni ña cua quehni vaha ca cachin iti siqui andivi.
40 Ta cua coo cha cua cani tahan cun nu cua coo cun,
ta musu ra yani cun cua cuu cun,
soco cua queta quivi ña cua cundee ini cun,
ta ña cua cundaca ñahan ca ra chihin cun”,
cati ra Isaac.
Chinu ra Jacoob nu iyo ra Esaú
41 Tacan cuu,
ta chihi xaan ra Esaú tisihi ndehe ra chi ra Jacob yani ra cuenda cha ni cahan vii sutu ra chi ra Jacob ta chaha ra ndatu ra chi ra,
ta saxini ra Esaú chi anima ra ti:
“Cha yatin cua queta quivi cua cuvi suti,
ta cua coo cuihya ini ndi cuenda ra,
ta yaha chacan,
ta cua cahni yu chi ra Jacob yani yu”,
saxini ra.
42 Ta ña Rebeca,
chito ña cha tiso vaha ra Esaú tiñu cuhva cha cua savaha ra.
Tacan cuu,
ta cana ña chi ra Jacob,
ta cati ña chi ra ti:
―Ndehe,
ti ra yani cun,
cha tiso vaha ra tiñu cha cua cahni ra chihun.
43 Ta chacan vitin,
sehu,
taa vahun sohun cuhva cha cua cati yu chihin cun.
Cua cuhun cun iti ñuun Haraan nu iyo ra Labán cuhva yu.
44 Ta cua ndoo nuun cun suhva quivi tican nda cua yaha tisihi chi ra yani cun.
45 Ta cua naa ini ra cha savaha cun chi ra,
ta cua tachi ndico mai iin musu cua cu quihin chihin cun,
na cua yaha tisihi chi ra yani cun,
vati ña cuni yu cha in ni quivi cua ndoyo ñuhun nduvi tahan ndo ―cati ña.
46 Ta ña Rebeca,
cahan ña chi ra Isaac,
ta cati ña ti:
―Ña vaha cuni yu cuenda sehe sihi ñivi ñuun Het,
cuenda ñasihi ra Esaú.
Vaha ca na cuvi yu tu cua cuni ra Jacob tandaha ra chi ñi ñahan ñuun ihya ―cati ña.