Cuahan ra Isaac iti Geraar
26
Tacan cuu,
ta yaha tiempu,
ta chacoo tama nu ñuhun nu iyo ra Isaac cuhva cha ni chacoo chi tiempu maan ra Abraham.
Ta chacan quee ra Isaac,
cuahan ra iti ñuun Geraar nu iyo ra Abimeleec,
ra ndaca ñahan chi ñivi ñuhun Filistia.
2 Ta ican ni satuvi nuun ra chahnu Ndioo chi ra,
ta cati ra chi ra ti:
“Ña cua cuhun cun iti ñuhun Egipto.
Cua ndoo cun nu ñuhun cha cua cati mai nu cua coo cun.
3 Cua caca cuu ndahvi cun,
ta cua nanducu cun cha cua cachi sana cun,
ta mai cua coo chihin cun,
ta cua cuhve cha vaha chihin cun,
vati chi maun cua cuhve ñuhun ya chi sehe cun chi ndihi seyani cun chi ndihi tata cun,
vati cua sacuinu yu tiñu cha ni tiso vahi chi ra Abraham sutu cun.
4 Ta cua savahi cha cua coo tuvi xaan sehe cun cuhva cha iyo ri tiñu iti siqui andivi.
Ta chi maan ndo cua cuhve ñuhun ya,
ta ndihi ñivi ñuñivi,
cua coo vaha ñi cuenda sehe cun.
5 Tacan cua savahi,
vati ra Abraham sutu cun,
tasoho vaha xaan ra ndihi cha ni cati yu chihin ra.
Sacuinu ra ndihi tiñu cha ni cahin chi ra”,
cati ra Ndioo.
6 Tacan cuu,
ta queta ra Isaac ñuun Geraar,
ta ndoo ra ican.
7 Ta ra rai cha iyo ñuun can,
nducu tuhun ra ta ra chi ra cuenda ña Rebeca ñasihi ra,
ta cati ra chi ra ta ra ti cuhva yu chihin ña.
Tacan cati ra Isaac,
vati yuhvi ra cati ra cha ñasihi ra chi ña,
vati viu xaan ñahan cuu ña,
ta saxini ra ti cua cahni ra ta ra chihin ra,
ta cua quihin ra ta ra chihin ña.
8 Tacan cuu,
ta yaha iin tiempu cha iyo ñi ñuun can,
ta queta iin quivi,
ra Abimeleec cha cuu xini chi ñivi ñuhun Filistia,
inda ra yu vendana vehe ra,
ta ndehe ra cha savii xaan ra Isaac chi ña Rebeca ñasihi ra.
9 Chacan cuu cha cana ra Abimeleec chi ra Isaac,
ta cati ra chi ra ti:
―¡Ña vaha cha sandahyu ñahan cun chihin ndi cha cati cun cha cuhva cun chihin ña!
―cati ra Abimeleec.
Ta nducahan ra Isaac,
ta cati ra ti:
―Saxini yu ti tu cua cati yu chihin ndo,
cua cahni ndo chihin yu,
ta cua ndoo ndo chi ñasihi yu ―cati ra.
10 Ta cati ndico ra Abimeleec can ti:
―Ña vaha cha savahun tacan.
Tu cha ni quihin inga rai chi ña,
cuati maun cuu chi ―cati ra.
11 Ta chacan ra Abimeleec ni chaha ra tiñu chi ndihi ñivi ra,
ta cati ra ti:
―Tu cua sayani ndaha ñivi chi ra Isaac a chi ñasihi ra,
cua cuvi ndicha ñi ―cati ra.
12 Suvi ni tichi cuiya can tachi xaan ra Isaac chiti trigu,
ta cuaha xaan chi chacoo,
vati ra Jehová Ndioo,
ni savaha ra cha yaha ituhun cientu siqui cha ni tachi ra.
Ta ni canihin vaha ra chiti chi.
13 Ta nducuca xaan ra,
vati cuaha xaan ndatiñu ra chacoo.
14 Tuvi xaan mbee chi chivu sana ra chacoo,
ta tuvi xaan sundiquin ra,
ta chahnu vaha ndihi chiti tata cha tachi ra.
Chacan cuu cha ñivi ñuhun Filistia,
ndutahñu cuni ñi ndehe ñi chi ra Isaac.
15 Ta ndihi soco cha nañu musu ra Abraham sutu ra Isaac tiempu cha chacoo ra ñuñivi,
ndihi chi sandutu ta run.
16 Yaha chacan,
ta cati ra Abimeleec chi ra Isaac ti:
―Quee ihya,
ta cuahan,
vati iyo xaan ca tundee ini chihin cun ta ñavi ca chi maan ndi ―cati ra.
17 Tacan cuu,
ta quee ra Isaac ican,
ta cuahan ra iti nduhva Geraar,
ta chaqui ndaa ra vehe ñiin ra nu cuu chi nduhva can,
ta chacoo ra ican.
18 Tiso vaha ndico ra soco cha nañu ra Abraham sutu ra,
vati ndihi chi,
ni sandutu run ñivi ñuhun Filistia can ta run.
Ta ña sama ra sivi chi.
Ndoo chi cuhva cha cati sutu ra cha nani chi.
19 Ta iin quivi nañu musu ra Isaac iin soco tichi nduhva can,
ta tahan ra ta ra iti nduta vaha,
20 soco queta quivi cha ra sacuenda mbee ñuun Geraar,
cani tahan ra ta ra chi ra sacuenda sana ra Isaac,
ta cati ra ta ra ti:
“Nduta soco ya,
chi maan ndi cuu chi”,
cati ra ta ra.
Ta chacan sacunani ra soco can Eseek.
Ta cuni cati chi ”Soco nu ni cani tahan ra ta ra”.
21 Chacan ra cuu musu ra Isaac,
nañu ra ta ra inga soco,
ta cani tahan tucu ñivi can chihin ra,
ta sacunani ra chi Sitnaa.
Chacan cuni cati chi ”Soco cha cuxaan ini ñivi”.
22 Ni quee ra Isaac ican,
ta savaha ra inga soco,
ta yoni cani tahan chihin ra ican,
ta chacan sacunani ra chi Rehoboot.
Cha cuni cati chi ”Soco cha ndoo nuna”.
Ta cati ra ti:
“Vitin chaha ra Jehová Ndioo cha nuna chihin yo,
ta cua coo vaha yo nu ñuhun ya”,
cati ra.
23 Ta ican quee ra Isaac,
ta cuahan ra iti Beerseba.
24 Tacan,
ta chacuaa can cahan ra Jehová Ndioo chi ra,
ta cati ra chi ra ti:
“Yuhu cuu Ndioo ra Abraham sutu cun.
Ña cuyuhvi cun,
vati iyo yu chihin cun,
ta cua cuhve cha vaha chihin cun,
ta cua savahi cha cua ndutuvi xaan sehe cun chi seyani cun chi ndihi tata cun,
vati cuni xain chi ra Abraham musu yu”,
cati ra.
25 Tacan,
ta ni savaha ra Isaac in altaar,
ta sacahnu ra chi ra Jehová Ndioo,
ta sandaa ra vehe ñiin quiti cuhu ra ican,
ta ndihi ra cuu musu ra ni savaha ra ta ra inga soco.
26 Quichi ra Abimeleec iti ñuun Geraar,
ta cutahan ra Ahuzaat amigu ra chi ra.
Ta quichi tahan ra Ficool ra cuu xini chi sandadu ra.
Quichi ndehe ra ta ra chi ra Isaac.
27 Ta cati ra Isaac chi ra ta ra ti:
―¿Ñacu vachi nanducu ndo chihin yu?
Ta ndioho,
ña cuni mani ndo chihin,
ta sacunu ndo chihin yu nu iyo ndo ―cati ra Isaac chi ra ta ra.
28 Ta ni nducahan ra ta ra,
ta cati ra ta ra ti:
―Vitin chito vaha ndi cha ra chahnu Ndioo iyo chihin cun.
Ta cha cuenda chacan saxini ndi ti cua tiso vaha ndi tiñu chihin cun.
29 Cati cachi chi ndi ti ña cua savaha cun ndavaha ni chihin ndi cuhva cha ña savaha maan ndi ndavaha ni chihin cun.
Tava ndi chihin cun ñuhun nu iyo ndi,
soco chi cha vii tava ndi chihun,
vati chito ndi ti cha savaha ra chahnu Ndioo cha vaha chihin cun ―cati ra ta ra.
30 Tacan cuu,
ta ra Isaac,
ni savaha ra iin vico,
ta ndihi ra ta ra ni chachi icaa ni.
31 Ta nahan inga quivi can ndoyo ra ta ra,
ta tiso vaha ra ta ra tiñu cuhva cha cua ndoo vaha iin ra ta inga ra ta ra,
ta saña tahan ra ta ra chi ra Isaac,
ta cuahan ra ta ra chi cha vii.
32 Ta suvi ni quivi can ni quichi ra cuu musu ra Isaac,
ta chaha ra ta ra cuenda cha nañu ra ta ra inga soco,
ta cati ra ta ra ti:
―Na nihin ndi nduta ―cati ra ta ra.
33 Ta chacan Seba sacunani ra Isaac chi,
ta cuenda soco can chacunani ñuun can Beerseba.
34 Ta ra Esaú,
cha iyo ra uvi xico cuiya ra,
ta tandaha ra chi uvi ñi ñahan.
Iin ña nani Judiit cha cuu sehe sihi ra Beeri,
ta inga ña nani Basemaat cha cuu sehe sihi ra Elón,
ta mani sehe ñivi Het cuu ñi ta ñi.
35 Ta cha cuenda cha tandaha ra chi ñivi can,
ndahvi cuni ra Isaac chi anima ra.
Tacan ni maan ña Rebeca.