Ñivi cha cuu sehe ra Abraham chi ña Cetura ñasihi ra
25
Ta maan ra Abraham,
tandaha ndico ra chi iin ña nani Cetura.
2 Ta chacoo sehe ñi,
cha chacunani ra Zimran chi ra Jocsán chi ra Medán chi ra Madián chi ra Isbac chi ra Súa.
3 Ta sehe ra Jocsán can cuu ra Seba chi ra Dedán.
Ta tata ra Dedán cuu ñivi ra Asur chi ñivi ra Letus chi ñivi ra Leum.
4 Ta sehe ra Madián cuu ra Efa chi ra Efer chi ra Hanoc chi ra Abida chi ra Elda.
Ndihi ñivi ya cuu sehe ña Cetura can.
5 Ta ra Abraham,
chaha ra ndihi cha iyo chihin ra chi ra Isaac.
6 Ta chaha ra Abraham ndatu ndoo ra Isaac ñuhun nu iyo ra,
soco ndihi cuati suhva ni samani ra chi ndihi ca sehe ra.
Sehe ra chi ndihi ca ñi cuu ñasihi ra,
ta tachi ra chi ñi ta ñi inga ñuhun cani ca iti chiyo cana nicandi quivi cha ni iyo ndito ra Abraham.
Chihi ra Abraham, ta cuchi ra
7 Ta chacoo ra Abraham cientu uni xico chahun cuiya ra.
8 Ta cha chahnu xaan ra,
ta chihi ra,
ta nduvicaa ra chi ñivi chahnu ra,
chahnu vaha xaan ra.
9 Ta ra Isaac chi ra Ismaeel,
cuchi ra ta ra chi ra nu iyo yavi yuu nu cuu chi Macpela.
Ñuhun ra Efrón sehe ra Zohar ñivi ra Het ican iyo maan yavi yuu can yatin nu cuu chi Mamre.
10 Ta ñuhun ya ni sata maan ra Abraham chi ñivi Het.
Ta ican cuchi ra Abraham chi ña Sara ñasihi ra.
11 Tacan,
ta nu ni chihi ra Abraham,
savaha xaan ra Ndioo cha vaha chi ra Isaac sehe ra,
ta ndoo ra yatin nu iyo soco cha nani “Ra Ndioo ndito cha ndehe chihin yu”.
12 Ñivi ya cuu sehe ra Ismaeel cha cuu sehe ra Abraham chi ña Agaar.
Ta ñahan ñuhun Egipto cuu ña,
ta ñacan cuu musu ña Sara.
13 Ta chehe cuu ndihi sivi sehe ra Ismaeel cuhva cha ni cacu ra ta ra:
Ra xihna cuii cuu ra Nebaioot,
ta chacoo ra Cedaar chi ra Adbeel chi ra Mibsaam
14 chi ra Mismaa chi ra Duma chi ra Massa
15 chi ra Hadaar chi ra Tema chi ra Jetuur chi ra Nafiis chi ra Cedema.
16 Ndihi racan ta ra ni cuu sehe ra Ismaeel,
ta iin iin ñuhun ta ndihi ñuun nu chacoo ra ta ra,
chacunani chi sivi ra.
Ta ndihi uchi uvi ra ta ra cuu xini chi iin iin ñuun ra ta ra.
17 Ta maan ra Ismaeel,
chacoo ra cientu oco chahun uvi cuiya,
ta chihi ra,
ta nduicaa ra chi ñivi chahnu ra.
18 Ta ndihi sehe ra,
ndoo ñi iyo ñi,
nda nu cuu chi ñuhun Havilaa ta nda cua nda ñuhun Shuur iti xiin ñuhun Egipto ta nda cua nda iti ñuhun Asiria chiyo cana nicandi.
Ta chihi ra Ismaeel can nu iyo cuiti ndihi ñivi ra.
Cacu ra Esaú chi ra Jacoob
19 Ndihi ñivi ya cuu tata ra Isaac sehe ra Abraham.
20 Ta cha iyo ra Isaac uvi xico cuiya ra,
ta tandaha ra chi ña Rebeca,
sehe ra Betueel ñivi Aram cha iyo ñuhun Padan-aram,
ta cuhva ña cuu ra Labán ñivi Aram.
21 Ta ña Rebeca ñasihi ra,
ña cuu coo sehe ña,
ta chacan cahan ra Isaac chi ra Ndioo cuenda ña.
Ta tasoho ra Ndioo cha ni cahan ndahvi ra,
ta quetuvi ña cha ñuhun sehe ña.
22 Ta uvi tahan ve,
ta ca cani tahan xaan ve ta ve tichi ña,
ta quechaha saxini xaan ña,
ta nducu tuhun ña chi ra chahnu Ndioo ti:
“¿Ñacu tahan yu cuhva ya?”,
cati ña.
23 Ta nducahan ra chi ña,
ta cati ra ti:
”Uvi ñuun cuu cha ndiso tichi cun,
ta rai cuu ra ta ra.
Ta nduvi tahan ra cua cuu xini chi ñivi ñuun ra.
Ta ña cua cuu nduinuun ra ta ra.
Ta ñuun nihin cua cuu iin ra,
ta ñavi ca inga ra.
Ta ra chanihin ca cua cuu musu ra luhu cuii ca”,
cati ra Ndioo chihin ña.
24 Ni queta quivi cha cacu ve xinihin sehe ña Rebeca.
25 Cacu xihna cuii iin ve luhu,
ta cuaha xaan ñiin ve,
ta ixi xaan ve,
ta chacan sacunani ñi Esaú chi ve.
26 Tacan,
ta cacu tahan inga yani ve,
ta naa ra xuu chaha maan ra Esaú can,
ta chacan cuu cha chacunani ra Jacob.
Ta uni xico cuiya ra Isaac iyo ra quivi cha ni cacu ve ta ve.
27 Chahnu ve cuati can,
ta ra Esaú,
vaha xaan chahni ra quiti cuhu,
ta sii xaan ini ra caca cuu ra tichi cuhu,
ta ra Jacob,
iyo taxi maan ra vehe ni.
28 Cuni xaan ca maan ra Isaac chi ra Esaú,
vati chachi xaan ra cuñu ri quiti cuhu cha nihin ra,
ta maan ña Rebeca,
cuni xaan ca ña chi ra Jacob.
29 Ta iin quivi satihyo ra Jacob cha cua cachi ra,
ta queta ra Esaú cha chahan ra chiqui,
ta chitatun xaan ra.
30 Ta cati ra chi ra Jacob ti:
―Cuhva suhva calu nduti cuaha cha satihyo cun,
vati cua cachi ti chisoco xain ―cati ra.
Chacan cuu cha nani ra Esaú Edom.
31 Ta cati ndico ra Jacob chi ra ti:
―Xico ndatu cha cuu cun sehe xihna cuii sutu yo chihin yu ―cati ra.
32 Ta nducahan ndico ra Esaú,
ta cati ra ti:
―Cha cuni cuvi yu chi soco,
ta tu cha cua cuvi yu,
ñaan yahvi ndaa cha cuu yu ra chanihin ―cati ra.
33 Ta cati ndico tucu ra Jacob ti:
―Soco cati xihna tu cha cua cuhva cun ndatu cha cuu cun sehe xihna cuii chihin yu vitin quivi ya ―cati ra.
Tacan,
ta cati vaha ra Esaú chi ra,
ta cuhva can xico ra ndatu cha cuu ra sehe xihna cuii chi ra Jacob.
34 Tacan cuu,
ta sa chaha ra Jacob paan chi calu nduti,
ta chachi ra Esaú paan,
ta chihi ra calu can,
ta sa ndoyo ra,
ta cuahan ra.
Ta cuhva can ña tayahvi ra Esaú ndatu cha cuu ra sehe chanihin sutu ra,
ta saña ra chi chi.