Nducu ra Abraham ñasihi ra Isaac
24
Ta cha chahnu xaan ra Abraham,
vati cha cuaha cuiya cha iyo ra,
ta savaha ra Jehová Ndioo cha cuaha xaan ndatiñu ra chacoo.
2 Ta cahan ra Abraham chi musu chahnu ra,
vati maan ra cuu ra cha indi ndaha ndihi ndatiñu vehe ra,
ta ndaca ñahan ra chi ndihi musu ra,
ta cati ra ti:
―Taa ndaha cun nu sihin yu.
3 Ta cua cati cun iin cha ndicha cuenda ra Jehová Ndioo,
ra iyo iti siqui andivi ta ihya nu ñuhun ñuñivi,
vati ña cua nducu cun ñasihi sehi cha cuu sehe sihi ñivi ñuhun Canaán nu iyo yo ihya,
4 soco cua cuhun cun iti ñuhun nu chacoi nu iyo ñivi yu,
vati cua nducu cun ñasihi ra sehi Isaac tican ―cati ra Abraham.
5 Ta nducahan ra musu can,
ta cati ra chihin ra ti:
―¿Ñaan cua savahi tu ña ñahan can,
ña cuni ña nacoo ña ñuun ña,
ta cua quichi ña chihin yu?
¿Atu cua cundaca ndico yu sehe cun ñuun nu quee cun?
―cati ra musu can.
6 Ta cati ndico ra Abraham ti:
―Cua tiso cun cuenda ti ña cua cunaun sehi tican.
7 Ta ra chahnu Ndioo cha iyo iti siqui andivi,
tava ra chihin yuvehe suti,
ta tava ra chihin ñuhun nu cacui,
ta quichi ndaca ra chihin yu nu ñuhun ya,
ta ra Ndioo cati ti ñuhun ya cua cuhva ra chihin yu,
ta cua cuu chi chi ndihi ñivi yu.
Ta suvi ni maan ra cua tachi ra chi tatun ra,
vati cua cuhun ra chihin cun,
ta cua nanducu cun ñasihi sehi.
8 Ta tu cha ña ñahan can,
ña cua cuni ña quichi ña chihin cun,
cua ndoo nuna cun chi tiñu cha chahi chihun vitin,
soco ña cua cundaca cun sehi tican ―cati ra Abraham chi ra.
9 Tacan cuu,
ta ra musu chahnu can,
tiso ra ndaha ra nu sihin ra chahnu Abraham chitoho ra,
ta cuhva can quihin ra tiñu.
10 Tacan cuu,
ta ra musu can quihin ra uchi tahan camellu ra chitoho ra,
ta tivaha ra cuaha xaan cha taqui cha cua samani ra nu cuahan ra,
ta quee ra cuahan ra chi ndihi ra cutahan chi ra ñuun nu iyo ra Nacoor ñuhun Mesopotamia.
11 Ta cuaha xaan quivi chica ra ta ra,
ta queta ra yuhu ñuun can cha cha cua ini,
hora cha cha quihin ñivi ñahan tivaa nduta cuu chi.
Queta ra,
ta savaha ra cha chacuiñi chiti ri camellu can ta ri yatin nu iyo soco iti yuhu ñuun can.
12 Tacan cuu,
ta ra musu can cahan ra chi ra Ndioo,
ta cati ra ti: ”
Ra chahnu Ndioo,
ra sacahnu ra Abraham chitohi,
tu cua cucahnu ini maun,
savaha cha cua quee vaha tiñu cuahin.
Savaha tu manini chi ra Abraham chitohi vitin,
13 vati inda yu nu iyo soco ya,
ta ñivi ñahan ñuun ya cua quichi quihin ñi nduta.
14 Na cua quichi iin ña tivaa,
ta cua cati yu chi ña ti:
‘Na savahun tu manini,
ta cua sanuun cun quii cun,
vati cua cohi nduta’,
ta na cua cati ña ti:
‘Coho nduta,
ta cua cuhva tahin cha cua coho ri camellu sana cun’,
cua cati ña,
ta ñacan na cua cuu ñahan cha nacachi cun cha cua cuu ñasihi ra musu cun Isaac.
Ta cuhva can cua cote cha savaha cun cha vaha chi ra cuu chitohi,
vati cuni mani xaun chihin ra”,
cati ra chi ra Ndioo.
15 Ta xihna ca cha ndihi cahan ndahvi ra musu can chi ra Ndioo,
ta cha vachi ni iin ña tivaa nani Rebeca nu iyo soco,
yoso sucu ña iin quii.
Ta sehe sihi ra Betueel chihin ña,
ta ra Betuel cuu sehe ña Milca ñasihi vaha ra Nacoor,
yani ra Abraham.
16 Ñahan yoco viu xaan cuu ña,
ta ña ta nacoto ña chi ni iin rai.
Quihin ña nduta tichi soco can,
ta sacutu ña quii ña,
ta cha cua cuhun ndico ña.
17 Tacan cuu,
ta chinu xaan ra musu can cha satahan ra chihin ña,
ta cati ra chi ña ti:
―Savaha tu manini ti cua cuhva cun suhva nduta quii cun,
vati cua cohi ―cati ra.
18 Ta cati ndico ña Rebeca can ti:
―Coho nduta ya,
ra chahnu ―cati ña.
Ta numi xaan sanuun ña chi,
ta chaha ña nduta chi ra.
19 Ta ndihi chihi ra nduta,
ta cati ña chi ra ti:
―Cua tava tahin nduta cha cua coho ndihi camellu cun nda cua cha cua ndihi ri coho ―cati ña.
20 Ta chacan numi xaan ña coyo ña nduta quii ña nu chihi sana ñivi,
ta cuahan ña cua quihin ca ña nduta cha cua coho ri ta ri.
21 Ta taxi taxi ndaa ra ndehe ra,
vati cuni ra coto vaha ra cha cua savaha ra chahnu Ndioo cuhva cha ni chica ra,
ta cua quee vaha tiñu cuahan ra.
22 Ta nu ni ndihi chihi ri camellu can ta ri,
ta quihin ra iin xehe xuhun cuaan cha iyo iñu gramo chi uvi tahan tivi xuhun cuaan cha iyo cientu gramo,
ta chaha ra chi chihin ña.
23 Ta cati ra ti:
―¿Yoo cuu sutu cun?
¿Atu iyo nu nuna vehe sutu cun cha cua ndoo nuun yu chi ndihi ra cutahan chihin yu chi ndihi sana ndi vitin chacuaa ya?
―cati ra.
24 Ta nducahan ña Rebeca,
ta cati ña ti:
―Betueel nani suti,
ta sehe ña Milca chi ra Nacoor cuu ra ―cati ña.
25 Ta cati ndico tucu ña ti:
―Iyo nu nuna vehe suti,
ta iyo xaan ita cua cachi sana ndo,
ta iyo nu nuna nu cua cusu ndo ―cati ña.
26 Ta nu chini ra musu can cha tacan cuu chi,
ta chahnu chiti ra,
ta sacahnu ra chi ra Ndioo.
27 Ta cati ra ti:
“Cahnu xaan cuu ra chahnu Ndioo,
ra sacahnu ra Abraham chitoho yu,
vati cundahvi ini ra Ndioo chi ra,
ta chaha ra Ndioo cha ndicha chi ra,
ta sanahan ra iti nu iyo ñivi ra chihin yu”,
cati ra.
28 Tacan cuu,
ta chinu xaan ña Rebeca cuahan ña iti vehe sihi ña,
vati cua cati ña chi ñivi ña ñaan cha tahan ña.
29 Ta iyo iin cuhva ña cha nani Labán.
Chinu xaan ra cuahan ra cua ndehe ra nu inda ra musu ra Abraham nu iyo soco can.
30 Chini ra cha cahan ña,
ta ndehe ra cha indi xehe xitin ña,
ta indi sucu ndaha ña tivi xuhun cuaan can,
ta chacan tuhva ra nu inda ra musu can chi sana ra.
31 Ta cati ra chi ra ti:
―Nahan,
vati cha iyo vaha cun cuenda ra chahnu Jehová Ndioo.
Ña cua ndoo cun ican,
vati iyo nu cua cusu cun,
ta iyo nu cua coo sana cun ―cati ra.
32 Tacan cuu,
ta ra musu chahnu ra Abraham,
ndoo ra vehe ñi ta ñi.
Ta ra Labán tindee ra chi ra chi ri camellu ra,
ta chaha ra ita cha chachi ri ta ri.
Ta chaha tahan ra nduta chi ra cha cua ndoo chaha ra ta ra.
33 Yaha chacan,
ta tiso ra cha cua cachi ra musu chahnu ra Abraham,
soco cati ra chi ra ti:
―Ña cua cachi nahin,
vati cua ndatuhun xihne tiñu vachi ―cati ra.
Ta cati ra Labán chi ra ti:
―Ndatuhun yoho ñaan tiñu cuu chi ―cati ra.
34 Ta cati ndico ra musu can ti:
―Musu ra Abraham cuu yu.
35 Ta maan ra chahnu Ndioo chaha cuaha xaan cha vaha chihin ra,
ta cuca xaan ra.
Tuvi xaan mbee ra chi chivu ra chi sundiquin ra iyo.
Iyo xuhun cuaan ra,
ta iyo xuhun cuichin ra,
ta tuvi xaan musu ra,
rai ta ñahan,
iyo,
ta iyo tuvi xaan camellu ra chi burru ra.
36 Ta ña Sara ñasihi ra cha chahnu xaan ña,
ta chacoo ituhun sehe ña.
Ta ra Abraham chaha ra ndihi cha iyo chi ra chi sehe ra.
37 Ta ra chitoho yu savaha ra cha ndoo yu tiñu chihin ra.
Ta cati ra chihin yu ti:
‘Ña cua nducu cun chi ñi ñahan ñuhun Canaán cha cua cuu ñasihi sehi.
Tañu ñivi can iyo yo,
soco ña cua nducu cun chi ñican cha cua cuu ñasihi ra,
38 soco cha nini xaan cua cuhun cun nu iyo ñivi yu,
ta tican cua nducu cun ñasihi ra’,
cati ra chi.
39 Ta chacan cati yu chihin ra ti:
‘¿Ta ñaan cua savahi tu ña ñahan can ña cua cuni ña quichi ña chihin yu?’,
cati yu.
40 Ta cati ra chihin ti:
‘Musu ra chahnu Ndioo cui,
ta maan ra cua cuhun chihin cun,
ta cua quee vaha tiñu cuahun cha cua nducu cun ñasihi sehi nu iyo ñivi yu.
41 Tu cha cua cuhun cun ñuhun nu iyo ñivi yu,
ta ña cua cuni ñi cuhva ñi ñahan cua tandaha sehi.
Tacan sa cua ndoo nuna cun chi tiñu cha ni chahi chihin cun’,
cati ra.
42 “Ta chacan hora cha quete nu iyo soco can,
ta cahin chi ra Ndioo,
ta cati yu chi ra ti:
‘Ra chahnu Ndioo,
chi maun sacahnu ra Abraham chitohi.
Savaha cha na cua quee vaha tiñu vachi.
43 Ta vitin cha iyo yu yuhu soco nu quichi quihin ñivi nduta,
ta cua cahan yu chi iin ña tivaa ti:
Savaha tu manini cuhva cun suhva nduta quii cun ti cua cohi.
44 Ta maan ña na cua nducahan ña:
Coho yo nduta,
ta cua cuhva tahin nduta coho camellu sana cun,
cua cati ña.
Tacan,
ta cua cote ti ña ñahan can cuu ña nacachi cun cha cua cuu ñasihi sehe ra cuu chitoho yu’,
cati yu chi ra Ndioo.
45 Ta ña ta ndihi cahin chi ra Ndioo chi anima yu,
ta cha vachi ni ña Rebeca ndiso ña quii ña cha cua quihin ña nduta.
Ta cati yu chi ña ti:
‘Savaha tu manini cuhva suhva nduta cohi’,
cati yu chi ña.
46 Ta numi xaan sanuun ña Rebeca quii ña,
ta cati ña chi ti:
‘Coho nduta,
ta cua cuhva tahin nduta cha cua coho sana cun’,
cati ña.
Tacan cuu,
ta chihi yu nduta,
ta chaha tahan ña cha chihi sana yu.
47 Ta nducu tuhun yu chi ña ti:
‘¿Yoo cuu sutu cun?’
ta nducahan ña,
ta cati ña ti:
‘Ra Betueel cuu sutu yu cha cuu sehe ña Milca chi ra Nacoor’,
cati ña.
Ta chacan cuu cha chaha yu in xehe chi ña chi tivi cha cua cuindi sucu ndaha ña.
48 Ta yaha chacan,
ta chahnu chiti yu iti nuun ra chahnu Ndioo,
ta sacahnu yu chi ra,
ra sacahnu ra Abraham,
vati maan ra tindee chihin yu cuenda tiñu cha vachi cha cua nduqui ñasihi sehe ra,
cha cuu ñivi maan ra.
49 Ta chacan vitin cua cati ndo tu cua cuu savaha ndo tu manini,
ta cua cati ndicha ndo a cua coo vaha anima ndo chi ra chitoho yu a ña cua cuu,
vati tacan cua coto yu ñaan cha cua savahi”,
cati ra.
50 Ta ra Labán chi ra Betueel,
nducahan ra ta ra,
ta cati ra ta ra ti:
―Cutuni ini ndi,
ti cuenda maan ra chahnu Ndioo vachi tiñu ya,
ta chacan ñahni cha cuu cati ndi.
51 Ta cuu quihin cun chi ña Rebeca,
ta cuhun cun,
ta na cua tandaha ña chi sehe ra cuu chitoho cun,
vati na cua cuinu tiñu cuhva cha cahan ra chahnu Jehová Ndioo ―cati ra ta ra.
52 Ta nu ni chini musu ra Abraham cha cahan ra ta ra,
chahnu chiti ra nda nu ñuhun iti nuun ra chahnu Ndioo.
53 Tacan cuu,
ta tava ra ndihi cha ndiso ra.
Tava ra cha cua cuindi sucu ndaha ña.
Tava ra yuu taqui ndicha.
Tava ra cha cuu xuhun cuaan,
ta tava ra cha cuu xuhun cuichi,
ta tava ra ndihi sahma vaha,
ta chaha ra chi chihin ña Rebeca.
Ta chaha tahan ra ndihi ndatiñu cha ndayahvi xaan chi cuhva ña chi sihi ña.
54 Ta ra musu chahnu can chi ndihi ra cutahan chi ra,
chachi ra ta ra,
ta ndoo ra ta ra ican chacuaa can.
Ta nahan inga quivi can ndoyo ra ta ra,
ta cati ra musu chahnu can chi ñivi ña Rebeca ti:
―Vitin iyo cha cua cuhun ndico ndi iti nuun ra cuu chitoho ndi ―cati ra.
55 Ta ra cuu cuhva ña chi sihi ña cati ñi ta ñi ti:
―Cua cuatu nuun ndo tichi uchi quivi,
ta sa cua cuhun ña luhu can chihin ndo ―cati ñi ta ñi.
56 Ta nducahan ra musu can,
ta cati ra ti:
―Ña cua sanducuee ca ndo chihin yu,
vati quee vaha tiñu quichi yu savaha ra Ndioo,
ta chacan cua saña ndo cha na cua cuhun ndique nu iyo ra cuu chitoho yu ―cati ra.
57 Ta nducahan ndico ñi,
ta cati ñi ti:
―Cua cana xihna ndi chi maan ña tivaa can,
ta cua nducu tuhun tiñu chi ña yoso cua cati maan ña ―cati ñi ta ñi.
58 Ta cana ñi ta ñi chi ña Rebeca ta nducu tuhun ñi chi ña ti:
―¿Atu cuni cun cuhun cun chi rahya?
―cati ñi.
Ta cati ña ti:
―Cua cuhin chi ra ―cati ña.
59 Tacan cuu,
ta saña ñi cuahan ña Rebeca chi ra musu ra Abraham chi ndihi ra cutahan chi ra,
ta cuahan tahan ña ñahan sacuahnu chi ña Rebeca can.
60 Ta ñivi ña,
cahan vaha xaan ñi ta ñi chihin ña,
ta cati ñi ta ñi ti:
“Cuhva maan ndi chihin cun,
ta na cuhun vaha cun,
ta na cua coo tuvi xaan sehe cun chi seyani cun chi ñivi cun,
ta cua sacanaan ñi chi ñivi cuni cani tahan chi ñi”,
cati ñi ta ñi chi ña.
61 Tacan cuu,
ta ña Rebeca chi ndihi ñivi ñahan cha cuu musu ña,
chacoso ñi camellu,
ta quee ñi ta ñi cuahan ñi ta ñi chi musu ra Abraham.
62 Tacan cuu,
ta ra Isaac quichi ra nu iyo soco cha nani ”Ra Ndioo ndito cha ndehe chihin yu”,
vati ndoo nuun ra nu cuu chi Neguev.
63 Tacan,
ta quee ra cuahan ra tichi cuhu cha cha cua ini,
vati cua saxini ra suhva,
ta ndehe ra cha vachi ri camellu can ta ri.
64 Ta ña Rebeca can,
ndehe ña chi ra Isaac.
Ta nuun ña camellu ña.
65 Ta nducu tuhun ña chi ra musu chahnu can ti:
―¿Yoo ra vachi tichi cuhu ya,
ta cua satahan ra chihin yo?
―cati ña.
Ta cati ra musu can ti:
―Ra chitohi cuu ra ―cati ra.
Tacan cuu,
ta ña Rebeca,
chasi ña sahma ndiqui nuun ña.