Chihi ña Sara, ta cuchi tiñu chi ña
23
Chacoo ña Sara cientu oco ucha cuiya ña,
2 ta chihi ña nu cuu chi Quiriat-arba,
ñuun Hebrón,
nu cuu chi ñuhun Canaán,
ta quihvi ra Abraham nu caa ña ndii can,
ta ndahyu xaan ra,
ta chacoo cuihya ini ra cha cuenda ña.
3 Ta quee ra cha cahan ra chi ñivi cha cuu ñivi ra Het,
ta cati ra chi ñi ti:
4 ―Ñivi quichi inga ñuhun cui,
ta chica cuu ndahvi yu nanduqui cha cua cachi sane nu iyo ndo.
Tu cua cucahnu ini maan ndo,
cuhva ndo ñuhun chihin yu,
vati tacan cua cuu cuchi yu cuñu ñuhun ñasihi yu ―cati ra Abraham chi ra ta ra.
5 Ta nducahan ñivi can,
ta cati ñi chi ra Abraham ti:
6 ―Ra chahnu,
maun cuu iin ra chanihin cuenda ra Ndioo nu iyo ndi,
ta chacan iin ñuhun vaha xaan cua cuchi cun cuñu ñuhun ñasihi cun,
ta ni iin ndi ña cua cati ti na ña cuchi cun chi ña ―cati ñi.
7 Ta chacuinda ra Abraham,
ta chahnu chiti ra iti nuun ndihi ñivi cha cuu ñivi ra Het,
8 ta cati ra chi ñi ti:
―Vaha,
tu tacan cati ndo,
ta cuni ndo cha cua cuchi yu cuñu ñuhun ndii ñasihi yu.
Vitin cua cahan ndo cuenda yu chi ra Efrón sehe ra Zohaar,
9 vati na cuhva ra nu iyo yavi yuu cha nani Macpela chihin yu.
Cha iyo yuhu nu iyo ñuhun ra.
Ta cua sata yu chi chi cuhva yahvi chi,
vati cua cuu chi nu cua cuchi ñivi yu nu iyo ndo ―cati ra.
10 Ta ra Efrón can indi tahan ra tañu ñivi ñuun Het can,
ta nducahan ra chi ra Abraham nu nducuiti ndihi ñivi ñuun can chi ndihi ñivi cha yaha yuhu ñuun can,
ta cati ra ti:
11 ―Ña saxini cun,
ra chahnu,
vati cua cuhva yu ñuhun can chihin cun,
ta cua cuhva tahin yavi yuu cha iyo ican.
Iti nuun ndihi ñivi ñuun yu chahi chi,
ta cua cuchi cun cuñu ñuhun ndii ñasihi cun ―cati ra Efrón can.
12 Tacan cuu,
ta ra Abraham chahnu chiti ra iti nuun ndihi ñivi ñuun can.
13 Ta nducahan ra chi ra Efrón iti nuun ndihi ñivi ñuun can,
ta cati ra ti:
―Tu savahun tu manini,
cua cuatu nuun cun,
ta cua tasoho cun cha cua cahin,
vati cua tiahvi yu yahvi ñuhun cha cua cuhva cun chihin yu,
ta cua quihin cun chi cha cuenda yu,
vati ican cua cuchi yu cuñu ñuhun ña ndii ñasihi yu ―cati ra Abraham chi ra Efrón.
14 Ta nducahan ndico tahan ra Efrón can chi ra Abraham,
ta cati ra ti:
15 ―Ra chahnu,
tasoho cun chihin yu.
Cumi cientu cuu xuhun cuichi ndaa ñuhun ya,
soco ñahni cha saxini yo cuenda chacan.
Cuchi yoho chi ndii ñasihi cun ―cati ra.
16 Ta chacan tiso vaha ra Abraham tiñu chi ra Efrón,
ta ticuhva ra ta ra xuhun can cuhva cha ni cati ra Efrón iti nuun ndihi ra cuu ñivi ra Het.
Ticuhva ra cha cuu cumi cientu xuhun cuichi vaha cha chatiñu ra sata ta xico ra ta ra.
17 Tacan,
ndoo ñuhun ra Efrón chi ra Abraham,
cha cuu cuhu Macpela chiyo cana nicandi iti Mamre.
Ican ndoo tahan cha cuu yavi yuu chi ndihi yutun nahnu.
18 Ndihi chacan ndoo cha cuu chi ra Abraham,
ta iti nuun ndihi ñivi ra Het chi ndihi ñivi cha queta tichi ñuun can quihin cuenda ra chi.
19 Tacan cuu,
ta sa cuchi ra Abraham chi ña Sara ñasihi ra.
Yavi yuu nu iyo cuhu Macpela cuchi ra chi ña,
xiin nu iyo ñuhun Mamre chiyo cana nicandi.
Ta iyo chi cuenda ñuun Hebrón cuenda ñuhun Canaán.
20 Tacan ndoo ñuhun can chi yavi yuu can chi ra Abraham,
vati ican cua cuchi ndihi ñivi ra,
ta ñivi ra Het chaha chi chihin ra.