Tava tiñu ra Ndioo chi ra Abraham na cua samani ra sehe ra chi ra
22
Ta nu ni yaha chacan cuni ra Ndioo ndehe ra a cua tasoho ra Abraham chi ra.
Ta cati ra,
chi ra ti:
―Abraham ―cati ra.
Ta nducahan ra:
―Ihya iyo yu ―cati ra.
2 Ta cati ndico ra Ndioo ti:
―Vitin cua quihin cun chi ra Isaac,
ta ituhun racan cuu sehe cun,
ta cuni xaan cun chi ra,
ta cua cuhun ndo iti ñuhun Moriah,
ta cua samani cun chi ra iti nui ti cua cayu ra in xini yucu nu cua cati mai chihin cun ―cati ra Ndioo.
3 Tuvi inga quivi can,
ta nahan xaan ndoyo ra Abraham,
ta tihi ra tayu burru,
ta quihin ra uvi musu ra chi ra Isaac,
ta chahnda ra nducu cha cua cayu,
ta quee ra ta ra,
cuahan ra nu cati ra Ndioo chi ra.
4 Cha queta uni quivi cha chica ra ta ra,
ta ndehe ra Abraham yucu nu cuahan ra ta ra,
ta ni cani xaan iyo chi.
5 Ta cati ra chi musu ra ti:
―Cua cuatu ndo ihya chi ri burru sana yu,
ta mai chi ra luhu sehi cua cuhun ndi.
Cua cu sacahnu ndi chi ra Ndioo tican,
ta yaha chacan,
ta sa vachi ndico ndi ―cati ra Abraham.
6 Tacan cuu,
ta quihin ra Abraham nducu can,
ta tiso ra chi chi chata ra Isaac,
ta maan ra quihin ra cuchillu chi ñuhun cha cua cayu,
ta cuahan ra ta ra.
7 Ta nducu tuhun ra Isaac chi sutu ra,
ta cati ra ti:
―Tata ―cati ra.
Ta nducahan ra Abraham:
―Ihya iyo yu,
sehu ―cati ra.
Ta cati ndico ra luhu can ti:
―Iyo nducu chi ñuhun cha cua cayu ¿ta maan ri mbee luhu can,
ndaa iyo ri?
―nducu tuhun ra.
8 Ta cati ndico ra Abraham ti:
―Maan ra Ndioo cua cuhva chi ri mbee luhu cha cua cayu,
sehu ―cati ra chi ra.
Ta sanihin ra ta ra cuahan ra.
9 Ta queta ra ta ra nu cati ra Ndioo chi ra,
ta savaha ra Abraham in altaar,
ta tiso ra nducu nuun chi,
ta chuhni ra chi ra Isaac sehe ra,
ta tiso ra chi ra nuun nducu can.
10 Ta quihin ra Abraham cuchillu cha cua cahni ra chi ra Isaac.
11 Ta quii xaan cahan ra tatun ra Jehová Ndioo chi ra,
ta cati ra ti:
―Yoho Abraham,
yoho Abraham ―cati ra.
―Ihya iyo yu ―cati ra Abraham.
12 Ta cati ndico ra tatun ra Jehová Ndioo chi ra ti:
―Ña sayani ndaha cun chi ra luhu can,
vati cha nacote cha chinu ndicha ini cun chi ra Ndioo,
vati ña saxini xaan cun,
ta chahun chi ituhun sehe cun ―cati ra.
13 Ta cani nuun ra Abraham iin chiyo,
ta ndehe ra iin mbee ii cha chicu ndiqui ri nu yutun iñu,
ta tiin ra chi ri,
ta chahmi ra chi ri tiñu nuun sehe ra.
14 Chacan tiso ra sivi chi cha nani chi “Maan ra Jehová Ndioo cua cuhva ndihi cha chini ñuhun yo.”
Ta chacan nda cua nda vitin nani yucu can cuhva can.
15 Inga chaha cahan ndico tucu ra tatun ra Jehová Ndioo iti siqui andivi chi ra Abraham.
16 Ta cati ra ti:
―Cha cati ra Jehová Ndioo cuenda suvi ni maan ra:
‘Cuenda cha ni sacuinu cun cha cati yu,
ta ñahni cha saxini cun,
ta chaha cun ituhun sehe cun cha cua cuvi ra iti nui.
17 Cati ndicha yu chihin cun ti tata cun cua cuu ñi cuhva iyo ri tiñu iti siqui andivi.
Ta cuhva cha iyo yuti yuhu tañuhun cua cuu ñi,
ta yoni cua cuu cahvi chihin ñi.
Ta ndihi ñivi cha cua cuu tata cun,
cua sacanaan ñi chi ñivi cha cua cani tahan chihin ñi.
18 Ta cua coo vaha xaan ndihi ñivi ñuñivi cha cuenda ñivi cuu tata cun,
vati ni savaha cun cuhva cha ni cati yu chihin cun’,
cati ra Ndioo ―cati maan ra tatun ra Jehová Ndioo.
19 Yaha chacan,
ta cuahan ndico ra Abraham nu ndoo musu ra,
ta ican quee ra ta ra,
ta cuahan ra ta ra iti ñuun Beerseba,
ta ni ndoo ra ta ra ican.
20 Yaha ndihi chacan,
ta queta tuhun nuun ra Abraham cha chacoo sehe ra Nacor yani ra chi ña Milca.
21 Ra Uz cuu sehe xihna cuii ñi,
ta sa chacoo tahan ra Buz,
ta chacoo tahan ra Kemuel ra cuu sutu ra Aram
22 chi ra Quesed chi ra Hazo chi ra Pilda chi ra Jidlaf chi ra Betuel.
23 Ta ra Betuel can cuu sutu ña Rebeca.
Una sehe rai ña Milca ñasihi vaha ra Nacor ni chacoo cha cuu yani ra Abraham.
24 Tacan ni ña Reúma cha cuu ñasihi ra,
chacoo tahan sehe ra chi ña cha nani Teba chi ra Gaham chi ra Tahas chi ra Maca.