Queta quivi cha ni cacu ra Isaac
21
Ta ni satuvi nuun ra Jehová Ndioo chi ña Sara,
ta savaha ra cuhva cha ni cati ra chihin ña,
2 vati quetuvi ña cha ñuhun sehe ña,
ta masi cha chahnu xaan ra Abraham chacoo sehe ñi.
3 Ta sacunani ra Isaac chi ve luhu can.
4 Ta nu ni queta ve una quivi ve,
ta chahnda ra ñiin xini xuu ve cuhva cha chaha ra Ndioo tiñu chihin ra.
5 Ta cha iyo ra Abraham cientu cuiya ra,
ta chacoo ve.
6 Ta cati ña Sara ti:
“Iin cha cuacu yo savaha ra Ndioo chihin yu,
ta ndihi ñivi cha cua coto cha tahan yu vitin,
cua cuacu xaan tahan ñi ta ñi”,
cati ña Sara.
7 Ta cati ndico tucu ña ti: ”
Saxini ra Abraham cha ña cua coo iin sehe ndi,
soco vitin cha chacoo iin ve,
masi cha chahnu xaan ra”,
cati ña.
Tava ra Abraham chi ña Agaar chi ra Ismaeel vehe ra
8 Tacan cuu,
ta chahnu ve Isaac,
ta quenda ve ndica,
ta savaha ra Abraham iin vico cahnu xaan quivi can.
9 Suvi ni hora can ndehe ña Sara cha chacu nahan xaan ra Ismaeel sehe ña Agaar ndehe ra chi ra Isaac.
10 Chacan cuu cha cati ña Sara chi ra Abraham ti: ”
Sacunu chi ña musu yu chi sehe ña,
vati ñahni ndatu cha cua nihin sehe ña cha tahan chi cha cua cuu chi ra Isaac sehi”,
cati ña.
11 Ndahvi cuni ra Abraham,
vati suvi ni sehe ra cuu ra Ismaeel.
12 Tacan cuu,
ta cati ra Ndioo chi ra Abraham ti:
“Ña saxini xaan cun cuenda sehe cun chi ña musu cun.
Savaha cuhva cha cati ña Sara chihin cun,
vati cuenda maan ra Isaac cua cunu tata cun,
13 vati cua sandutuvi tahin ñivi cun chi sehe ña musu cun,
vati sehe cun chihin ra”,
cati ra Ndioo.
14 Ta nahan inga quivi can ndoyo ra Abraham,
ta quihin ra paan chi iin ñiin nu indi nduta,
ta taa ra chata ña,
ta quihin tahan ra chi ra luhu can chaha ra chi ña Agaar,
ta cati ra chi ñi na cuhun ñi.
Tacan cuu,
ta ña Agaar cuahan ña chi sehe ña iti nu cuu chi nduhva Beerseba.
15 Ta nu ni ndihi nduta cha naan ña,
ta nacoo ña chi ra luhu nu iyo iin yutun vati.
16 Ta quee ndaa ña,
ta chacunda chica ña,
ta saxini ña ti ña cuni ña ndehe ña nu cua cuvi sehe ña.
Ican ndaa ña,
ta quechaha ndahyu ra luhu can.
17 Ta chini ra Ndioo cha ndahyu xaan ra luhu can,
ta nuun ra tatun Ndioo iti siqui,
ta cahan ra chi ña,
ta cati ra ti:
“Agaar ¿ñaan tahan cun?
Ña cuyuhvi cun,
vati ra chahnu Ndioo,
cha chini ra cha ndahyu sehe cun.
18 Ndoyo,
ta quihin chi ra luhu can,
ta cua cundaca vaha cun chihin ra,
vati cha cuenda maan ra cua sandutuvi yu sehe ra chi seyani ra,
ta tuvi xaan ñivi ra cua coo”,
cati ra tatun Ndioo can.
19 Tacan cuu,
ta chaha ra Ndioo cha ndehe ña iin soco nu iyo xaan nduta,
ta chahan ña,
ta sacutu ña ñiin nu chacuindi nduta,
ta chaha ña chi na coho ra luhu can.
20 Ta cumi ra Ndioo chi ra nda cua nda quivi ni chahnu ra.
Ta ndoo ra nduhva iti can.
Tican cutuhva ra tuchi ra chi nduva.
21 Tacan,
ta chacoo ñi nduhva iti cha nani Parán,
ta nducu sihi ra iin ña ñahan ñuhun Egipto cha cuu ñasihi ra.
Tiñu cha tiso vaha ra Abraham chi ra Abimeleec
22 Ta suvi ni tiempu can quichi ra Abimeleec chi ra Ficool,
ra cuu xini chi ndihi sandadu ra,
ta quichi ndehe ra ta ra chi ra Abraham,
ta cati ra chi ra Abraham ti:
―Maan ra Ndioo iyo chihin cun chi ndihi tiñu savaha cun.
23 Ta vitin chica yu chihin cun iti nuun ra Ndioo ti ña cua savaha cun ndavaha ni chihin yu ni chi sehi ta ni chi ndihi ñivi yu.
Cuhva cha savaha mai tu manini chihin cun cha queta cun ñuhun nu iyo yu,
cuhva can cua savaha tahun tu manini chihin yu nu ñuhun nu iyo ndahvi cun ―cati ra Abimeleec.
24 Ta nducahan ra Abraham,
ta cati ra ti:
―Tacan na cua cuu chi ―cati ra.
25 Tacan cuu,
ta cahan ra Abraham chi ra Abimeleec cuenda iin soco cha savaha ra,
vati musu ra Abimeleec ni quenda ra ta ra soco can chi ra.
26 Ta cati ra Abimeleec chi ra ti:
―Ña chito yu yoo ni savaha tacan,
ta ni maun ña sacoto chihin yu,
ta sa vitin chite chehe ―cati ra.
27 Tacan cuu,
ta samani ra Abraham mbee,
chivu,
sundiquin chi ra Abimeleec,
ta ndoo vaha tiñu chi ra ta ra.
28 Ta tava siin ra inga ucha tahan ri mbee sihi cuati.
29 Ta quechaha nducu tuhun ra Abimeleec chi ra Abraham ti:
―¿Ñaan cuni cati cha tava ndaa cun ucha ri mbee sihi cuati can?
―cati ra.
30 Ta nducahan ra Abraham,
ta cati ra ti:
―Ucha ri mbee cuati ya cua cuhve chihin cun,
vati rican ta ri cua cuu iin seña cha yuhu nañu soco ya ―cati ra.
31 Ta chacan sacunani ra ta ra Beerseba ican,
vati ican tiso vaha ra ta ra tiñu.
32 Yaha cha tiso vaha ra ta ra tiñu nu cuu chi Beerseba,
ta cuahan ndico ra Abimeleec chi ra Ficool iti vehe ra nu cuu chi ñuhun Filistia.
33 Ta tachi ra Abraham iin yutun ticuahndi,
ta ican sacahnu ra chi ra Jehová Ndioo ra iyo ndihi ndoo tiempu.
34 Ta tichi ñuhun ñivi ñuhun Filistia can chacoo ra cuaha xaan quivi.