Tiso vaha ra Abraham tiñu chi ra Abimeleec
20
Tacan cuu,
ta ni quee ra Abraham,
ta cuahan ra iti ñuhun Neguev,
ta chacoo ra nu cuu chi xahñu ñuun Cade chi ñuun Shur.
Ni chica cuu ndahvi ra,
nanducu ra cha cua cachi sana ra ñuhun Geraar can.
2 Ta cati maan ra Abraham can chi ñivi cha iyo ican cuenda ñasihi ra ti:
“Cuhva yu chihin ña”.
Ta ra Abimeleec cha cuu ra ndaca ñahan chi ñivi ñuhun Geraar can,
tachi ra tiñu cha quihin chi ña Sara ti cua cuu ña ñasihi ra,
3 soco ra Ndioo ni cahan ra chi ra Abimeleec can tichi ñumahna iin chacuaa,
ta cati ra chi ra ti:
“Vitin cua cuvi cun cha cati ña ñahan cha ni quihin cun,
vati ña iyo ii cuu ñacan”,
cati ra Ndioo chi ra,
4 soco ra Abimeleec can ña ta coo ra chihin ña,
ta cati ra ti:
“Ra chahnu,
ña cua cahni cun chihin yu,
vati ñahni cuati savahi.
5 Maan ra Abraham cati ti cuhva ra chihin ña,
ta cati tahan ña ti cuhva ña chihin ra.
Ta yuhu savahi chi chi anima vahi,
ta ñahni cha ndavaha ni saxini yu”,
cati ra.
6 Tacan,
ta cati ndico ra Ndioo chi ra tichi ñumahna ti:
“Chite ti cha vaha ini cun savaha cun chi.
Ta chacan ña chahi cha cua savaha cun cha ña vaha iti nui cha cua coo cun chihin ña.
7 Ta vitin cuhva ndico chihin ña chi ii ña,
vati ra cahan cuenda yu cuu ra,
ta racan cua cahan chihin yu cuenda cun,
ta cua coo ndito cun.
Tu ña cua cuhva cun chihin ña,
cati ndicha yu chihin cun ti cua cuvi cun,
ta ndihi ñivi cun cua cuvi tahan ñi”,
cati ra Ndioo.
8 Tacan cuu,
ta ra Abimeleec hora ndoyo ra cha nahan can,
ta cana ra chi ndihi musu ra,
ta cati tuhun ra chi ra ta ra ñaan cha cuu cha ni ndehe ra tichi ñumahna,
ta yuhvi xaan quechaha cuni ra ta ra.
9 Tacan cuu,
ta cana ra Abimeleec chi ra Abraham,
ta cati ra chi ra ti:
―Ña vaha cha ni savaha cun chihin ndi.
Ñahni cha ña vaha savahi chihin cun cha ni quichi naan cun iin cuati cahnu chihin yu chi ñuun yu.
Ña tahan chi savaha cun cuhva can chihin yu ―cati ra.
10 Ta cati ndico tucu ra Abimeleec chi ra Abraham ti:
―¿Ñaan saxini cun cha savaha cun cuhva can?
―cati ra.
11 Ta cati ra Abraham ti:
―Saxini yu ti yoni sacahnu chi ra Ndioo ihya,
ta cua cahni ra ta ra chihin yu,
vati ñasihi yu chihin ña,
12 soco tahan ndicha yu chihin ña,
vati sehe suti chi ña,
soco tucu sihi ña,
ta chacan quihin yu chihin ña cuu ñasihi yu.
13 Ta quivi cha ni quee yuvehe suti,
cati yu chihin ña ti: ”
Savaha tu manini chihin yu,
vati ndihi nu cua queta yo cua cati cun ti cuhva cun chihin yu,
cati yu chihin ña”,
cati ra Abraham.
14 Tacan,
ta ni quihin ra Abimeleec can mbee chi chivu chi sundiquin chi musu,
rai ta ñahan,
ta chaha ra chi ra Abraham,
ta chaha ndico ra chi maan ña Sara ñasihi ra.
15 Ta cati ndico ra Abimeleec ti:
―Ihya iyo ñuhun nu cuu coo cun,
cuu coo cun ndaa iti cuni maun ―cati ra.
16 Ta cati ra chi ña Sara ti:
―Ihya chahi iin mil xuhun cuichi chi ra cuhva cun,
vati maan ra cua cahan vaha cuenda cun chi ndihi ñivi cha ndehe chihin cun,
ta cua coto ndihi ñivi cha ñahni cuati savaha cun ―cati ra chi ña Sara.
17 Tacan cuu,
ta ra Abraham cahan ndahvi ra chi ra Ndioo,
ta ni sanduvaha ra Ndioo chi ra Abimeleec chi ñasihi ra chi ndihi musu ra,
ta ni chacoo ndico sehe ñi,
18 vati nu quichi quivi ni chasi ra Jehová Ndioo cha chacoo sehe ñi ñahan iyo vehe ra Abimeleec,
vati ni quihin ra chi ña Sara ñasihi ra Abraham.