Ndatuhun ra tatun Ndioo chi ra Lot
19
Ta cha cua ini ca queta nduvi tahan ra tatun Ndioo can ñuun Sodoma.
Ta ndaa ra Lot can yuhu ñuun can,
ta ndehe ra cha vachi ra ta ra.
Ta cha quihin iti ra chi ra ta ra,
ta chahnu chiti ra ta taa ra nuun ra nda ñuhun cuhva cha iyo tahan maan ra cha cua quihin cuenda ra chihin ra ta ra.
2 Ta cati ra chi ra ta ra ti:
―Ndioho ra chanihin,
savaha ndo tu manini chi ti cua ndoo nuun ndo vehi,
vati iyo nduta ndoo chaha ndo,
ta iyo nu cua cava tatun nuun ndo.
Ta yutaan nahan cua cuhun ndico ndo ―cati ra Lot.
Ta cati ra ta ra ti:
―Tiahvi ndioo chihin cun,
soco iti ni cua ndoo ndi cha cuaa ya ―cati ra ta ra,
3 soco cha sanini xaan ra Lot chi ra ta ra.
Chacan cuu cha cuahan ra ta ra chihin ra,
ta ni ndoo ra ta ra vehe ra.
Ta chaha ra cha cuxini ra ta ra ndayu vaha chi paan ña ndaa.
4 Ta ni cua cusu ra ta ra,
ta ca queta ndihi run rai cha iyo ñuun can,
run chanihin ta run tivaa,
ta ticuta ta run vehe ra Lot.
5 Ta cana run ta run chi ra,
ta cati run chi ra ti:
―¿Ndaa iyo ra ni queta nu iyo cun chacuaa ya?
Tava chi ra ta ra,
vati cua coo ndi chihin ra ta ra ―cati ta run.
―In ni ñivi cuu yo,
amigu,
ta chacan chica yu chihin ndo ti ña cua savaha ndo ndavaha ni chi rahya ta ra.
8 Ndehe ndo ti iyo uvi tahan sehe sihi yu cha ña ta nacoto ñi ni iin rai.
Cua cuhve chi ñi chihin ndo.
Ta ndehe maan ndo ñaan cua savaha ndo chihin ñi,
soco ña cua sayani ndaha ndo chi ra ni queta vehi,
vati ndaa ica cha cua cumi yu chihin ra ta ra ―cati ra Lot.
9 Ta cati ndico run ta run ti:
―¡Cuachiyo nuun!
―cati run ta run―.
¿Ta rahya,
ñaan tahan ra?
Ra queta ni cuu ra,
ta cuni ra cati ra ñaan cua savaha yo nu iyo yo ―cati run ta run―.
¡Ta vitin cahnu ca tundoho cua yaha cun,
ta ñavi ca ñivi ni queta vehe cun!
―cati run ta run.
Ticuta ta run chi ra Lot cha cua cani ta run chi ra,
ta tuhva ta run cha cua cahnu cuati ta run yuvehe,
10 soco quii xaan ni tava ra tatun Ndioo can ndaha ra,
ta xita caa ra ta ra chi ra Lot tichi vehe,
ta chasi ndico ra.
11 Ta savaha ra tatun Ndioo cha nducuaa nuun ndihi run chanihin ta run tivaa,
ta ña nanihin ca run ta run yuvehe.
Sanaan ra Ndioo chi ñivi ñuun Sodoma chi ñivi ñuun Gomorra
12 Ta cati ndico ra tatun Ndioo can chi ra Lot ti:
―Tu iyo ca ñivi cha cuu ñivi cun ihya,
casa cun,
sehe rai cun ta sehe sihi cun,
quihin chi ñi,
ta quee ndo ñuun ya,
13 vati ra chahnu Ndioo ndehe ra ndihi cha ndavaha ni savaha ñivi iyo ihya,
ta chacan tachi ra chihin ndi cha cua sanaan ndi ñuun ya ―cati ra ta ra.
14 Ta ra Lot quee ra cha ndehe ra chi ra cua cuu casa ra,
ta cati ra chi ra ta ra ti:
―¡Ndoyo ndo,
ta cua quee ndo tichi ñuun ya,
vati ra chahnu Ndioo cua sandoyo ñuhun ra chi!
―cati ra.
Ta racan ta ra ña chaa ini ra cha ni cahan ra.
15 Ta cha vachi cundichin,
ta sanumi ra tatun Ndioo chi ra Lot,
ta cati ra chi ra ti:
―Ndoyo,
ta quihin ñasihi cun ta nduvi tahan sehe sihi ndo,
vati tu ña cua sanumi ndo,
cua ndoyo ñuhun tahan ndo tichi ñuun ya ―cati ra tatun Ndioo chi ra.
16 Nu ni ndehe ra tatun Ndioo cha ña sanumi ra Lot,
ta tiin ra ta ra ndaha ñi ta ñi,
ta xita caa ra ta ra chi ñi,
maan ra ta ñasihi ra chi sehe ñi,
ta tava ra ta ra chihin ñi tichi ñuun can,
vati ra Ndioo cundahvi ini ra chihin ñi ta ñi.
17 Ta hora cha cha quee ñi iti chata,
ta iin ra tatun Ndioo can cati ra ti:
―¡Tu cha ña cuni ndo cuvi ndo,
cunu xaan ndo!
Ta ña cua ndehe ndo iti chata ndo.
Ña cua ndoo ndo tichi nduhva ya.
¡Cuahan ndo iti siqui yucu nu cua cacu ndo!
―cati ra chi ñi.
18 Ta cati ra Lot chi ra ta ra ti:
―Ña cuu,
ra chahnu.
19 Masi rai ndahvi cui,
soco maan ndo cha savaha ndo tu manini chihin yu,
ta cundahvi ini ndo chihin ndi cha cua cacu cha ndito ndi,
soco saxini yu ti ña cua cundei quete nda siqui yucu can,
ta cua cuvi yu ―cati ra ―.
20 ¡Jihna ican!
Yatin ni iyo iin ñuun luhu nu cuu cacu ndi.
Chacan chique chihin ndo ti na cua cuhva ndo cuhun ndi ican ni ―cati ra Lot.
21 Ta cati ndico ra tatun Ndioo can ti:
―Vaha.
Cua savahi cuhva cha chica cun chihin ndi.
Ña cua sanaan yu ñuun can,
22 soco cunumi ni ndo,
ta cuhun ndo tican,
vati ña cua sandoyo ñuhun nahin ñuun can nda cua nda cha cua queta ndo tican ―cati ra tatun Ndioo.
Ta ñuun Zoaar chacunani chi,
ta cuni cati chi ti luhu xaan chi.
23 Ta cha vachi cundichin inga quivi can,
ta queta ra Lot ñuun Zoaar can.
24 Tacan cuu,
ta ra chahnu Ndioo sacuun ra ñuhun xaan iti siqui andivi,
ta cayu ñuun Sodoma chi ñuun Gomorra.
25 Cuhva can ni naan ñuun can chi ndihi ñivi cha chacoo ican chi ndihi cuhu cuii chacoo nu nduhva can.
26 Ta maan ñasihi ra Lot can ni ndehe ña iti chata ña.
Chacan cuu cha cuu ña iin yuu ñii.
27 Ta maan ra Abraham nahan ni ndoyo ra,
ta cuahan ra nu ni ndatuhun ra chi ra chahnu Ndioo.
28 Ta ndehe ra iti nu iyo nduhva nu caa ñuun Sodoma chi ñuun Gomorra,
ta ndehe ra cha quee xaan yuhma nu ñuhun can.
Cuhva cha quee yuhma tichi iin chitun quee chi.
29 Cuhva can sandoyo ñuhun ra Ndioo ndihi ñuun cha iyo nduhva can,
ta chacuhun ini ra cuhva cha ni cati ra chi ra Abraham,
ta cuhva can sacacu ra Ndioo chi ra Lot tichi tundoho can.
Chacoo ra Lot chi nduvi tahan sehe sihi ra
30 Quee ra Lot chi nduvi tahan sehe sihi ra ñuun Zoaar,
vati yuhvi cuni ñi cha iyo ñi ican.
Chacan cuu cha cuahan ñi iti nu iyo xaan yucu,
ta chacoo ñi iin yavi yuu.
31 Ta iin quivi cati ña chanihin chi ña luhu cuii ca ti:
―Cha chahnu xaan sutu yo,
ta ñahni rai iyo ihya cha cua tandaha chi yo cuhva cha ndacu ñivi ñuñivi.
32 Cua sacoho yo nduxi uva cha cha nduxaan chi ra,
ta cua cuni ra,
ta cuhva can cua cuhun iin yo,
ta cua cava yo xiin ra,
ta cua coo yo chi ra,
vati cuhva can ña cua naan tata yo cha cuenda sutu yo ―cati ña.
33 Sacoho ñi chi chi ra chacuaa can,
ta ni chini xaan ra.
Ta maan ña chanihin can chacoo ña chi ra,
soco ña ni chaha ra cuenda chi ra hora cha chacava ña xiin ra,
ta ni hora cha ndoyo ndico ña.
34 Tacan,
ta inga quivi can cati ndico tucu ña chanihin can chi ña cuhvi ña ti:
―Cuni chacoi chi sutu yo.
Ta chacan vitin cua sacoho tucu yo chi ra,
ta cua coo tahun chihin ra,
vati tacan ña cua naan tata ra ―cati ña.
35 Ta chacuaa can sacoho ndico tucu ñi chi ra,
ta chini xaan ra.
Ta ña tivaa can chacoo tahan ña chi sutu ña,
ta in ni cuhva ña ni chaha ra cuenda chi ra hora cha ni cuu chi ta ni hora cha ni ndoyo ndico ña.
36 Cuhva can ni cha cuñuhun sehe nduvi tahan ñi cha cuenda sutu ñi.
37 Queta quivi ni cacu sehe ña chanihin can,
ta sacunani ña Moaab chi ra luhu can.
Racan cuu sutu ñivi ñuun Moaab cha iyo nda cua nda vitin.
38 Ta ña cuhvi ña cacu tahan sehe ña,
ta sacunani ña Ben-amii chi ra.
Racan cuu sutu ndihi ñivi ñuhun Amón cha iyo tahan ñi nda cua nda vitin.