Cati ra Ndioo chi ra Abraham cha cua coo sehe ra
18
Tacan cuu,
ta satuvi nuun ra Jehová Ndioo chi ra Abraham nu ndaa ra yuvehe ra tichi cuhu Mamre nu iyo xaan tundii,
ta iin hora ihni cuu chi.
2 Ta ndehe ra cha vachi uni tahan rai,
ta quii xaan cha satahan iti ra chihin ra ta ra.
Ta chahnu chiti ra nda nu ñuhun cuhva cha iyo tahan maan ra.
Cuhva can quihin cuenda ra chi ra ta ra.
3 Ta quechaha cati ra ti:
―Ra chahnu,
vitin tu cha cuu savaha cun tu manini chihin yu,
vati musu cun cui,
na cua cuatu nuun cun suhva,
4 vati cua quihin yu suhva nduta cha cua ndoo chaha ndo,
ta cua cunda tatun nuun ndo chaha yutun vati ya.
5 Ta cua quihin tahin uxu cha cua cachi ndo.
Tacan cua nihin ndico ndo tundee ini,
ta sa cua cuhun ndico ndo.
Vaha ti ndoo nuun ndo cha chica yu chihin ndo ―cati ra Abraham chihin ra ta ra.
Ta cati ra ta ra ti:
―Savaha cuhva cha cati cun.
6 Tacan cuu,
ta quihvi ra Abraham nu indi ña Sara,
ta cati ra chi ña ti:
―Cunumi ni,
ta tiso vaha cun oco kilu yuti paan vaha,
ta satihyo cun chi,
vati cua cachi ra ta ra ―cati ra chi ña.
7 Ta numi ni cha quihin tahan ra iin ri sundiquin yoco taqui xaan,
ta chaha cuenda ra chi ri chi iin musu ra cha na cua satihyo ra chi ri.
8 Ta quihin ra xahan nu lechi chi cuñu cha tiso vaha ra,
ta chaha ra chi chihin ra ta ra na cua cachi ra ta ra,
ta ndoo tahan ra ican ni,
ndatu ra ñaan ca cha cua cuni ra ta ra.
9 Ta nducu tuhun ra ta ra chi ra ti:
―¿Ta ña Sara ñasihi cun?
―cati ra ta ra.
Ta cati ra Abraham ti:
―Ndacan indi ña tichi vehe ―cati ra.
10 Ta quechaha cati iin ra ti:
―Cha ndicha cati yu chihin cun.
Tichi iin cuiya cua quichi tucu yu.
Ta ña Sara cha iyo sehe ña tacan ―cati ra.
Chini ña cha cahan ra,
vati iti chata ra inda ña yuvehe.
11 Ta ra Abraham chi ña Sara,
cha chahnu xaan ñi.
Ña cuu ca coo sehe ña,
vati ña tahan ca ña cuhva cha tahan ndihi ñi ñahan.
12 Ta chacan quechaha chacu nahan ña,
ta saxini ña ti:
“Ña cua cuu ca coo sehe ndi,
vati cha chahnu xaan ndi,
ta ña sii ca cuni ndi”,
saxini ña.
13 Ta cati ra Jehová Ndioo chi ra Abraham ti:
―¿Ñacu chacu nahan ña Sara,
ta saxini ña cha ña cua cuu coo sehe ña,
vati cha chahnu xaan ña?
14 ¿An saxini ndo cha iyo iin cha ña cuu savaha yu?
Ta tichi iin cuiya cha cua quichi yu nu iyo ndo cha iyo iin sehe luhu ña tacan ―cati ra.
15 Ta cuyuhvi cuni ña Sara,
ta cati ña ti:
―Ña ndicha cha chacu yu ―cati ña.
Ta cati ndico ra chi ña ti:
―Chito vahi ti chacu nahan cun ―cati ra chi ña.
Cahan ndahvi ra Abraham chi ra Ndioo cuenda ñivi ñuun Sodoma chi ñivi ñuun Gomorra
16 Yaha chacan,
ta quee ra ta ra,
cuahan ra iti ñuun Sodoma,
ta cuahan tahan ra Abraham cha cua saña tahan ra chihin ra ta ra.
17 Ta iti cuahan ra ta ra saxini ra Jehová Ndioo ti:
“Ña cua tixehi chi ra Abraham cha cua savahi,
18 vati racan cua cuu sutu chi iin ñuun cahnu,
ta cua coo xaan tundee ini chi ñivi ñuun can,
ta cuenda maan ra cua coo vaha ndihi ñivi ñuñivi,
19 vati mai nacachi chihin ra.
Cha cua sanahan ra chi ndihi sehe ra chi ndihi ñivi ra,
ta ña cua quee ndaa ñi iti cha sanahin chihin ñi,
ta cua tasoho ñi cha cua savaha ñi cha vaha chi cha cuiti,
ta cua sacuinu tahin ndihi cha vaha ni cati yu cha cuenda maan ra Abraham”,
saxini ra Ndioo.
20 Tacan cuu,
ta cati ra Jehová Ndioo chi ra ti:
―Tiso cuati xaan ñivi chi ñivi ñuun Sodoma chi ñivi ñuun Gomorra,
vati cha yaha cuhva savaha ñi cuati.
21 Chacan cuahin vitin,
vati cua cote a ndicha cuhva cha ndacu ñivi can cuhva cha chini sohi cha ña vaha savaha ñi ―cati ra.
22 Ta quee uvi tahan ra,
ta cuahan ra ta ra iti ñuun Sodoma,
soco ndoo ra Ndioo chi ra Abraham.
23 Ta tuhva yatin ra Abraham chi ra Ndioo,
ta cati ra chi ra ti:
―¿Atu cua sandoyo ñuhun cun chi ñivi ndacu cha vaha chi ñivi ndacu cha ndavaha ni?
24 ¿An cua sandoyo ñuhun cun chi ñivi can tu iyo uvi xico uchi ñi ndacu cha vaha ñuun can?
¿An ña cua cuu cucahnu ini cun chi ñivi can cha cuenda uvi xico uchi ñi ndacu cha vaha?
25 Chite ti ña cua savaha cun chi.
Ña cua tachi tuni cun chi ñivi ndacu cha vaha chi ñivi ndacu cha ña vaha,
ta cua ndehe ñi tundoho icaa ni.
Ra chahnu,
maan cun cuu ra tachi tuni chi ñivi ñuñivi iin cha cuiti ndicha ―cati ra Abraham.
26 Ta nducahan ra Jehová Ndioo,
ta cati ra ti:
―Tu cha cua nanihin yu uvi xico uchi ñivi cha ndacu cha vaha,
cua cucahnu ini yu,
ta ña cua sanaan yu chi ñivi ñuun can ―cati ra Jehová Ndioo.
27 Ta cati ndico ra Abraham ti:
―Vitin cahan ndahvi ndico tucu yu chihin cun,
ra chahnu.
Masi yuhma ñuhun cuu yuhu ra ndahvi,
28 chica ndahvi ndico tucu yu a ña cucahnu ini cun chi ñivi can tu cha queta uvi xico uhun tahan ñi.
¿An cua sandoyo ñuhun cun chi ñi masi cumani uhun tahan ñi?
―cati ra Abraham.
Ta cati ndico ra Ndioo ti:
―Ña cua savahi chi tu cha iyo uvi xico uhun ñivi ndacu cha vaha ―cati ra Ndioo.
29 Ta cati ndico ra Abraham ti:
―¿An cua sanaan cun chi ñi tu uvi xico ni ñivi iyo ñuun can?
―cati ra Abraham.
Ta cati ra Ndioo ti:
―Ña cua savahi chi tu cha iyo uvi xico ñi ―cati ra Ndioo.
30 Ta cati tucu ra Abraham ti:
―Inga tu manini cuni yu ndaque chihin cun,
soco ña cua quihin cun tisihi chihin yu.
Masi oco uchi tahan ñivi iyo cha ndacu cha vaha ñuun can ―cati ra Abraham.
Ta cati ndico ra Ndioo ti:
―Ña cua savahi chi tu cha iyo oco uchi ñi ―cati ra.
31 Nducu tuhun ca ra Abraham,
ta cati ra ti:
―Ra chahnu,
masi cha cuaha xaan chaha cahan yu chihin cun,
soco chica ndico tucu yu tu manini.
¿Atu cua sanaan cun chi ñivi can tu cha iyo oco tahan ni ñi ndacu cha vaha?
―cati ra Abraham.
―Ña cua savahi chi ―cati ra Ndioo.
32 Ta cati ndico ra Abraham chi ra Ndioo ti:
―Ra chahnu,
ña cua nduxaan cun chihin yu.
Masi cua nducu tuhun yu chihin cun inga chaha,
tu cha iyo uchi tahan ni ñivi ndacu cha vaha.
¿Atu cua sanaan cun chi ñivi ñuun can?
―cati ra Abraham.
―Ña saxini cun.
Ña cua savahi chi,
vati cuni mani yu chi uchi ñican ―cati ra Ndioo.
33 Ndihi ndatuhun ra ta ra,
ta cuahan ra Jehová Ndioo,
ta cuahan tahan maan ra Abraham iti vehe ra.