Seña cuhva cha ndoo vaha tiñu chi ra Abraam
17
Cha iyo ra Abraam cumi xico chahun cuiya ra,
ta satuvi nuun tucu ra Jehová Ndioo chihin ra,
ta cati ra chi ra ti:
―Yuhu cuu ra Ndioo iyo ndihi cuii tundee ini.
Na cua tasoho vaha cun chihin yu,
ta na cua coo ii ndicha cun iti nui.
2 Ta cua ndoo vaha tiñu chihin cun cua savahi,
vati cua sandutuvi yu ndihi tata cun nu cuahan quivi ―cati ra Jehová Ndioo.
3 Ta ra Abraam ni chahnu xini ra nda nu ñuhun hora cha ni cahan ra chahnu Ndioo chi ra:
4 ―Vitin cha ndoo vaha tiñu chihin cun savahi,
vati cua cuu cun sutu chi tuvi xaan ñivi.
5 Ñavi ca Abraam cua cuu sivi cun.
Vitin cua cunani cun Abraham,
vati cha ni tiso yu chihin cun cha cua cuu cun sutu chi tuvi xaan ñivi ñuñivi.
6 Cua savahi cha cua satata cun,
vati tacan cua savaha ñivi cun cuaha xaan ñuun,
ta tuvi xaan sehe cun cua cuu tahan xini chi iin iin ñuun.
7 Cuhva ya cua ndoo tiñu chihin cun ta chi sehe cun cha cua coo iti nuun ca,
cuhva cha cua cunu tata cun,
ta cuu chi iin tuhun ndicha ndihi ndoo tiempu,
main cua cuu Ndioo cun,
ta suvi ni main cua cuu Ndioo ndihi sehe cun chi ndihi seyani cun cha cua coo iti nuun.
8 Chi maan cun ta chi ndihi ñivi cun,
cua cuhve ndihi ñuhun nu iyo cun vitin cha cuu ñuhun Canaán,
vati cua cuu chi chihin ndo ndihi ndoo tiempu,
ta main cua cuu Ndioo ndo ―cati ra.
9 Ta cati ndico tucu ra Ndioo chi ra Abraham ti:
―Cua cucumi vaha cun ndihi tiñu cha ni chahi chihin cun,
maun ta ndihi ñivi cha cua cuu tata cun.
10 Chehe cuu iin tuhun vaha cha chahi chihin cun ta chi ndihi sehe cun chi ndihi seyani cun.
Na cua sacuinu ndo chi,
ndihi rai cha cuu ñivi cun cua tahnda ñiin xini xuu ra ta ra.
11 Chacan cuu cha cua savaha ndo,
vati cua cuu chi iin seña cha cua ndoo chi chi cuñu ndo cuenda tiñu cha chahi vitin.
12 Chacan cuu cha ndihi ve cuati cha cuu sehe rai ndo,
una quivi cha cacu ve ta cua tahnda ñiin xini xuu ve ta ve.
Chacan cua savaha ndo chi ndihi sehe ndo ndihi quivi cha cua coo ndo nu ñuhun ñuñivi ya.
Tacan ni cua savaha ndo chi ndihi ve rai cuati cua cacu vehe ndo ta chi ndihi rai cha cuu musu cuatu cua sata ndo inga ñuhun,
masi ñavi sehe ndo cuu ra ta ra.
13 Cua savaha ndo cuhva can chi ra cuati sehe ndo ta chi ra cua sata ndo.
Cua coo seña can chi cuñu ra ta ra.
Chehe cuu tiñu cha cua ndoo chihin ndo ndihi ndoo tiempu.
14 Ta ndihi ra rai cha ña cua savaha cuhva cha tiso yu tiñu ya chihin ndo,
cha cua ndoo seña yu chi cuñu ra,
cua sacunu ndo chi ra,
ta ña cua cuu ca ra ñivi ndo,
vati ña sacuinu ra tiñu cha ni chahi chihin ndo ―cati ra.
15 Ta ni vii cahan ra chi ra Abraham,
ta cati ra ti:
―Ta ña cuu ñasihi cun,
ña cua cunani tahan ca ña Saraii,
Sara cua cuu sivi ña,
16 vati cua savaha yu iin cha vaha chihin ña,
ta cua cuhva tahin iin sehe cun chihin ña.
Tacan cua cuu chi,
vati cua savahi cha vaha chihin ña,
ta sihi tuvi xaan ñivi cua cuu ña,
ta tuvi ñivi cha cua cuu tata ña cua cundaca ñahan chi ñuun nahnu ―cati ra.
17 Tacan cuu,
ta ra Abraham ni chahnu xini ra nda nu ñuhun,
ta quechaha chacu cuehe ra,
ta saxini ra chi anima ra ti:
“Ña cuu coo sehe iin rai cha iyo ra cientu cuiya ra,
ta ña Sara cumi xico uchi cuiya ña,
ña cuu coo sehe ña”,
saxini ra.
18 Ta cati ra Abraham chi ra Ndioo ti:
―Vaha ca tu cha cua cuhva cun tiñu ya chi ra Ismaeel ―cati ra.
19 Nducahan ndico ra Ndioo chi ra,
ta cati ra ti:
―Cha ndicha cuu chi,
vati ña Sara ñasihi cun,
cua cacu iin sehe ña,
ta cua sacunani cun Isaac chi ve,
ta chi racan cua savahi cha vaha,
ta ndihi tiñu cha ni chahi chihin cun,
chi racan cua cuu chi,
ta chi ndihi tata ra cha vachi iti nuun ca.
20 Ta cha cuenda ra Ismaeel cha chini sohi cha cahan cun cuenda ra.
Ta cua savahi cha vaha chihin ra,
ta cua cuhve cha cua ndutuvi tahan tata ra.
Cua cuu ra sutu chi uchi uvi rai cha cua cundaca ñahan ra chi tuvi xaan ñuun cua savahi,
21 soco chi ra Isaac cua ndoo vaha tiñu,
cha cuu ra sehe ña Sara cha cua cacu tichi iin cuiya ―cati ra Ndioo.
22 Ndihi cahan ra tiñu ya chi ra Abraham,
ta cuahan ndico ra.
23 Tacan cuu,
ta quihin ra Abraham chi ra Ismaeel sehe ra,
ta ndihi musu cha cacu vehe ra ta musu cha sata ra chi ndihi ra rai cha iyo satiñu vehe ra Abraham chahnda ra ñiin xini xuu ra ta ra.
Suvi ni quivi cha ni tava tiñu ra Ndioo chihin ra savaha ra chacan.
24 Cha iyo ra Abraham cumi xico chahun cumi cuiya ra quivi cha ni savaha ra cha ni cati ra chahnu Ndioo chihin ra.
25 Ta ra Ismaeel iyo ra uchi uni cuiya ra quivi cha savaha sutu ra chi ra cuhva can.
26 Nduvi tahan ra ta ra savaha chi in ni quivi.
27 Ta ni cuhva tahan ndihi ra cuu musu ra Abraham chi ndihi sehe racan ta ra cha cacu vehe ra ta chi ndihi ra sata ra inga ñuun,
chahnda tahan ra ñiin xini xuu ra ta ra suvi ni quivi can.