Cha cacu ra Ismaeel sehe ña Agaar
16
1-3 Ta cha queta uchi cuiya cha iyo ra Abraam ñuhun Canaán.
Ta ña Saraii ñasihi ra,
ña cuu coo sehe ña,
ta iyo iin ña ñahan ñuhun Egipto cha cuu musu ña cha nani Agaar.
Ta chacan ña Saraii,
cati ña chi ra Abraam ti:
―Cha ndehe cun ti maan ra chahnu Ndioo savaha cha ña cuu coo sehi.
Chacan cati vahi chihin cun ti na cua coo cun chi ña cuu musu yu,
ta cua coo sehe ña,
ti cua cuu sehi ―cati ña Saraii.
Ni ndoo ra Abraam vaha cuhva cha ni chica ña Saraii.
Ta chaha cuenda ña chi ña Agaar ña ñahan Egipto chihin ra.
4 Ta ni chacoo ñi chi tahan ñi,
ta quetuvi ña cha ñuhun sehe ña,
ta nu ni chito ña cha tacan cuu chi,
ta quechaha ndehe ña vaha ña chi ña Saraii.
5 Tacan cuu,
ta cati ña Saraii chi ra Abraam ti:
―Tucanuun cha tahin siqui maun ndaa chi,
vati chaha vahi chi ña cuu musu yu cha cua coo cun chihin ña,
ta nu ni chito ña cha ñuhun sehe ña.
Vitin ndehe ña vaha ña chihin yu.
Maan ra Jehová Ndioo na cua ndehe ndaa yo iyo cuati ―cati ña.
6 Nducahan ra Abraam,
ta cati ra chi ñasihi ra ti:
―Musu maun cuu ña.
Tichi ndaha cun iyo ña.
Savaha chihin ña yoso cuhva cuni maun ―cati ra Abraam.
Ta quechaha ña Saraii sayaha ña tundoho chihin ña,
ta chacan ni chinu ña Agaar.
7 Ta nanihin ra tatun Ndioo chi ña tichi cuhu nu iyo ndohyo iti cuahan Shur.
8 Ta cati ra tatun Ndioo chi ña Agaar ti:
―Yoho Agaar,
musu ña Saraii cuu cun.
¿Nda iti vachi cun ta nda iti cuahan cun?
―cati ra.
Ta cati ña chi ra ti:
―Chinu xehe yu nuun ña Saraii chitoho yu ―cati ña.
9 Ta cati ndico ra tatun ra Ndioo can ti:
―Cuahan ndico nu iyo ña cuu chitoho cun,
ta cua tasoho cun ndihi tiñu cha cua tava tiñu ña chihin cun ―cati ra tatun Ndioo can.
10 Ta cati ndico ra tatun Ndioo can chihin ña ti:
“Tacan cua savahun,
vati cua sandutuvi yu chi sehe cun ta chi seyani cun,
ta yoni cua cundee cahvi chi ñi cha tuvi xaan ñi cua coo”,
cati ra tatun Ndioo can.
11 Ta cati ndico tucu ra ti:
“Vitin cha ñuhun sehe cun,
ta cua cacu ve,
ta Ismaeel cua cunani ra,
vati cha ndehe ra Jehová Ndioo cha yaha xaun tundoho.
12 Ta rai xaan xaan cua cuu sehe cun.
Cua cuinda cuati ra chi ndihi ñivi.
Ta cua cuinda cuati tahan ndihi ñivi chihin ra.
Ta cua coo ra nu iyo ñivi ra,
masi ña cuni ñi cha cuhun ra ican”,
cati ra chihin ña.
13 Tacan,
ta cana chaa ña sivi ra Ndioo,
ti cahan ra chi ña,
ta sacunani ña sivi ra:
“Yoho cuu ra Ndioo cha ndehe chihin yu”,
cati ña.
Ta cati ndico tucu ña ti:
“Ña ndehi chi ra ni ndehe chihin yu”,
cati ña.
14 Yaha ndihi chacan,
ta sacunani ña soco can: ”
Soco ra Ndioo ndito cha ndehe chihin yu”,
cati ña.
Ta soco can ndoo chi mahñu nu cuu chi ñuun Cade chi ñuun Bereed.