Ni cati ra Ndioo cha cua coo iin sehe ra Abraam
15
Tacan cuu,
ta ndehe ra Abraam iin cuhva,
ta cahan ra Jehová Ndioo chi ra,
ta cati ra ti:
―Ña cuyuhvi cun Abraam,
vati yuhu cuu ra cumi chihin cun,
ta cua samani yu iin cha cahnu xaan cahnu xaan chihin cun ―cati ra.
2 Nducahan ra Abraam,
ta cati ra ti:
―Ra chahnu Ndioo ¿ñaan cha cuu cha cua cuhva cun chihin yu,
vati ñahni ni ituhun sehi?
Ta ra Eliezeer cha cuu xini chi ndihi musu yu,
ra ñuun Damasco cuu ra ―cati ra.
3 Ta cati ndico tucu ra Abraam ti:
―Ndehe ti ni ituhun sehi ña ta cuhva cun.
Chacan iin musu yu cha cacu vehi cua ndoo chi ndihi ndatiñu yu ―cati ra.
4 Ta cati ndico tucu ra Jehová Ndioo chi ra ti:
―Ñavi musu cun cua ndoo chi ndihi ndatiñu cun,
vati iin sehe maun cua nihin ndihi cha iyo chihin cun ―cati ra Jehová Ndioo.
5 Ta cha ndaca ra chihin ra iti nuquehe,
ta cati ra chi ra ti:
―Ndehe iti siqui andivi,
ta cahvi ndihi tiñu cha iyo ican,
tu cha cuu cahvi cun chi ri.
Cuhva can cua coo tuvi xaan sehe cun ―cati ra chi ra.
6 Ta chinu ini ra cuhva cha cati ra Jehová Ndioo chi ra,
ta quee vaha ra iti nuun ra.
7 Ta cati ndico tucu ra Ndioo chi ra ti:
―Yuhu cuu ra Jehová Ndioo cha tava chihin cun tichi ñuun Uur,
ñuhun Caldeo,
vati cua cuhva yu ñuhun ya chihin cun chi sehe cun chi seyani cun ―cati ra.
8 Ta nducahan ra Abraam,
ta cati ra ti:
―Ra chahnu Jehová ¿yoso cuhva cua cote cha cua nihin yu ñuhun ya?
―nducu tuhun ra.
9 Ta cati ra Ndioo chi ra ti:
―Cua quichi ndaca cun iti nui iin sundiquin sihi chi iin chivu sihi chi iin mbee cha iyo ri ta ri uni cuiya ri chi iin ri lucu chi iin ri ndivi ―cati ra.
10 Tacan cuu,
ta tiso ra sava sava ri quiti cuhu can iin chiyo ta inga chiyo,
soco ri lucu chi ri ndivi can,
ña natahvi ra chi ri ta ri,
11 soco quichi tachii cha cuni cachi ri ta ri cuñu can,
ta ra Abraam sacunu ra chi ri.
12 Nu cha cua cunahan,
ta quichi ñumahna nuun ra Abraam,
ta quichi cha yuhvi xaan cuni ra,
ti ndunaan nu caa ra.
13 Ta cahan tucu ra Jehová Ndioo chi ra,
ta cati ra chi ra ti:
―Cha ndicha cati yu chihin cun,
vati ñivi cha cuu sehe cun cua coo ndahvi ñi inga ñuhun,
ta cua cuu ñi musu cuatu cumi cientu cuiya,
ta cuaha xaan tundoho cua yaha ñi,
14 soco ñuhun nu cua cuu ñi musu cuatu cua tachi tuni mai chi ñivi can,
ta yaha cha cua ndehe ñi tundoho,
ta cua quee ndico ñi ican chi cuaha xaan ndatiñu ñi.
15 Ta cha chahnu xaan cun,
ta cua cuvi cun,
ta cua nduiin cun chi ñivi chahnu cun,
ta cua cava tatu tahun.
16 Ta cua yaha cumi cientu cuiya,
ta sa cua quichi ndico ñi ihya,
vati ñivi amorreo ña ta yaha cuhva savaha ñi cha ña vaha ―cati ra Jehová Ndioo.
17 Tacan cuu,
ta nu ni ndunaan ca ndehe ra Abraam cha iyo iin chitu,
ta quee xaan yuhma,
ta ndehe tahan ra iin yutun tuiti cha cayu chi,
ta yaha chi mahñu nu natahvi cuñu ri ta ri.
18 Ta quivi can tiso vaha ra Jehová Ndioo tiñu chi ra Abraam,
ta cati ndico tucu ra chi ra ti:
―Chi ñivi cuu sehe cun chi seyani cun cua cuhva yu ñuhun ya nda nu cuu chi yuta cha iyo ñuhun Egipto ta nda cua nda nu cuu chi yuta Euufrate cahnu.
19 Cua cuhve cha cuu ñuhun ñivi ceneo chi ñuhun ñivi Ceneez chi ñuhun ñivi Cadmon
20 chi ñuhun ñivi Het chi ñuhun ñivi Ferez chi ñuhun ñivi refaíta
21 chi ñuhun ñivi amorreo chi ñuhun ñivi Canaán chi ñuhun ñivi Gerges chi ñuhun ñivi Jebús.
Ndihi ñuhun can cua cuhve chihin ñi ―cati ra Jehová Ndioo chi ra Abraam.