Sacacu ra Abraam chi ra Lot
14
Ta tiempu can iyo iin ra rey nani Amrafeel,
ta maan ra chacundaca ñahan chi ñuhun Sinaar,
ta iyo inga ra rey Ariooc cha chacundaca ñahan chi ñuhun Elasaar,
ta iyo tahan inga ra rey Quedorlaomeer cha chacundaca ñahan ra chi ñuhun Elam,
ta iyo inga ndico tucu ra rey Tidaal cha chacundaca ñahan ra chi ñuhun Goiim.
2 Cha cuinda cuati ra ta ra chi ra Bera cha chacundaca ñahan chi ñuun Sodoma chi ra Birsa cuenda ñuun Gomorra chi ra Sinaab cuenda ñuun Adma chi ra Semebeer cuenda ñuun Zeboiim chi ra ndaca ñahan ñuun Bela cha cuu chi Zoaar.
3 Ndihi uhun ra ta ra,
nducuiti ra chi ndihi sandadu ra tichi nduhva Sidiim,
ta nani tahan chi Tañuhun Uhva.
4 Uchi uvi cuiya ndo tiñu ndihi ra rey can ta ra chi run Quedorlaomeer,
ta nu quihvi uchi uni cuiya,
ta ña tasoho ca ra ta ra chi run.
5 Ta nu quihvi uchi cumi cuiya,
ta quichi run Quedorlaomeer can chi ndihi run ndaca ñahan cha cutahan chi run,
ta cani tahan run ta run.
Ta sacanaan run chi ñivi refaíta cha iyo ñuun Astarot Karnaiim chi ñivi Zuza cha iyo ñuun Haam chi ñivi Emiit cha iyo ñuun Save-quiriataiim,
6 ta nda siqui yucu Seiir cha sacanaan run chi ñivi ñuun Hoor,
ta nda cua nda nu cuu chi nduhva Parán nu ñahni ca cuhu,
vati nduhva iti cuu chi,
ta cha ndicu run ta run chi ra ta ra.
7 Yaha chacan,
ta cha vachi nuhun ndico run Quedorlaomeer can chi run cha tindee chi run.
Ta queta run ta run nu cuu chi En-mispaat cha cuu ñuun Cade,
ta cani tahan run ta run chi ñivi ñuhun Amalec chi ñivi amorreo cha iyo ñuun Hazezontamaar can.
8 Ta ndihi ra rey cha ndaca ñahan chi iin iin ñuun,
ñuun Sodoma,
Gomorra,
Adma,
Zeboiim,
Bela cha cuu ñuun Zoaar,
ta cani tahan ra ta ra chi run ta run nu cuu chi nduhva cahnu Sidiim.
9 Cani tahan ra ta ra chi run rey Quedorlaomeer run ndaca ñahan chi ñuhun Elam chi run Tidaal cha ndaca ñahan chi ñuhun Goiim chi run Amrafeel cha ndaca ñahan chi ñuhun Sinaar chi run Ariooc cha ndaca ñahan chi ñuhun Elasaar.
Cumi run ta run cani tahan chi uhun ra ta ra,
10 soco nduhva Sidiim can cuaha xaan soco sucha quixi iyo,
ta nu ni chinu ra ndaca ñahan chi ñivi ñuun Sodoma chi Gomorra chi ndihi sandadu ra,
tuvi xaan ra ta ra quehni cava ican,
ta ndihi ca ra ta ra chinu xehe ra ta ra,
cuahan ra ta ra tichi cuhu.
11 Ta ndihi cha vaha cha cuu ndatiñu ñivi ñuun can chi ndihi cha chachi ñi quihin run Quedorlaomeer,
ta cuahan run.
12 Quihin tahan run chi ra Lot cha cuu sachin ra Abraam chi ndihi ndatiñu ra,
vati iyo ra Lot ñuun Sodoma can.
Chacan quihin run chi ra,
ta cuahan run.
13 Queta iin ra chinu xehe nuun ra Abraam hebreo,
ta chaha ra cuenda cha ni tahan ra ta ra.
Queta ra nu iyo ra tichi cuhu ra Mamre ra amorreo,
ta yani ra Mamre can chi ra Escol chi ra Aneer,
ta iyo inuun ra ta ra chi ra Abraam.
14 Cuhva can chito ra Abraam cha tiin tiñu chi sachin ra,
ta chacan sacuiti ra chi ndihi musu ra cha cacu vehe ra.
Queta uni cientu chahun uni ra ta ra,
ta quee ra ta ra,
cuahan ra iti nu cuu chi Dan cua ndicu ra ta ra chi run ta run.
15 Ta iin chacuaa ca quihvi ra ta ra nu iyo ñivi cha quihin chi ra Lot,
ta cani tahan ra ta ra chi ñivi can,
ta sacanaan ra ta ra,
ta cha ndicu ca ra ta ra chi run ta run nda nu cuu chi ñuun Hoba iti xini ñuun Damasco.
16 Cuhva can sacacu ra chi ra Lot sachin ra chi ndihi ndatiñu ra,
ta sacacu tahan ra chi ndihi ca ñivi,
rai ta ñahan cha quihin run Quedorlaomeer can.
Sacu-ii ra Melquisedee chi ra Abraam
17 Tacan sacanaan ra ta ra chi run rey Quedorlaomeer chi ndihi run cutahan chihin run,
ta ra rey ndaca ñahan chi ñivi ñuun Sodoma,
quichi satahan ra chi ra Abraam nu cuu chi Nduhva Save,
ta nani tahan chi Nduhva Rey.
18 Ta ican queta tahan ra Melquisedee cha ndaca ñahan chi ñivi ñuun Saleem,
ta cuu ra sutu cuenda ra Ndioo cahnu,
ta chaha ra nduta uva chi paan chi ra Abraam.
19 Ta sacu-ii ra chi ra Abraam,
ta cati ra chi ra ti:
“Vitin na sacu-ii ra Ndioo iyo ndihi cuii tundee ini chihin cun,
vati racan ni savaha andivi ta ñuhun ñuñivi.
20 Cahnu xaan ca na cuu ra chahnu Ndioo,
vati chaha cuenda ra chi ñivi cuxaan ini chihin cun tichi ndaha cun”,
cati ra Melquisedec.
Tacan,
ta tava ra Abraam uchi cuhva chi ndihi cha ni nihin ra,
ta quihin ra ituhun cuhva can,
ta chaha ra chi chi ra Melquisedee can.
21 Tacan cuu,
ta ra rey ndaca ñahan chi ñivi ñuun Sodoma,
cati ra chi ra Abraam ti:
―Cuhva cuenda chi ndihi ñivi yu,
ta cuu ndoo cun chi ndihi ndatiñu can ―cati ra.
22 Ta nducahan ra Abraam,
ta cati ra ti:
―Iti nuun ra Jehová Ndioo ra savaha andivi ta ñuhun ñuñivi cati yu chihin cun ti:
23 Ña cua quihin yu ni ituhun chi,
ni iin yuhva luhu ta ni iin ñiin ndicha cun,
vati ña cua cati cun queta quivi ti:
“Yuhu sanducuca chi ra Abraam”.
24 Ta chacan ndicha cuii cha chachi ñivi ni yu cua quihin,
ta cua cuhva cun suhva cha cua cuu chi ra chanihin cha cha cutahan chi.
Cua cuhva cun suhva chi ra Aneer chi ra Escol chi ra Mamre ―cati ra Abraam.