Cuhva cha ni quee ndaa ra Abraam chi ra Lot
13
Quee ndico ra Abraam iti Egipto,
ta cuahan ndico tucu ra chi ñasihi ra chi ndihi cha iyo chihin ra iti Neguev,
ta cuahan tahan ra Lot chi ñi.
2 Cha cuca xaan ra Abraam,
vati cuaha xaan sundiquin chi xuhun cuichi chi xuhun cuaan iyo chi ra.
3 Chacan cuu cha quee ndico ra chi ñivi ra iti ñuhun Neguev,
ta cuahan ra nda nu cuu chi Beteel nu cuu xahñu ñuun can chi Hai nu ni chacoo xihna cuii ñi.
4 Queta ñi nu cha ni savaha ra iin altaar,
ta ican sacahnu ra Abraam chi ra Jehová Ndioo.
5 Tacan ni ra Lot,
tuvi xaan mbee ra chi chivu ra chi sundiquin ra chi vehe ra chacoo,
vati chi maan ra Abraam chica cuu icaa ra,
6 soco ña cahnu maan ñuhun can cha cua coo nduvi tahan ra ta ra,
vati tuvi xaan sana ra ta ra iyo,
ta chacan ña cua cuu coo ra ta ra icaa ni.
7 Queta iin quivi quechaha cani tahan ra sacuenda mbee ra Abraam chi ra sacuenda sana ra Lot,
ta tiempu can ñivi ñuhun Canaán chi ñivi Ferez iyo tahan ican.
8 Ta quechaha cati ra Abraam chi ra Lot ti:
“Ña cua cani tahan yo ta ni ra sacuenda sana yo,
vati ñivi yo.
9 Ndehe cun ti cuaha ñuhun iyo,
ta chica yu chihin cun,
ti cua quee ndaa cun chihin yu.
Tu cua cuhun cun iti chiyo ndaha sati,
mai cua cuhun iti chiyo ndaha cuaha,
soco tu iti chiyo ndaha cuaha cua cuhun cun,
cua cuhin iti chiyo ndaha sati”,
cati ra Abraam.
10 Ta ndehe ra Lot ti cuii xaan cuhu iyo nduhva yuta Jordán nda cua nda nu cuu chi Zoaar,
vati mani ñuhun cachin cuu chi cuhva caa nu taqui cha savaha ra Jehová Ndioo cha xihna cuii,
ta cuhva caa ñuhun Egipto caa nduhva can.
Cuu chi tiempu cha ña ta sandoyo ñuhun ra Jehová Ndioo ñuun Sodoma chi ñuun Gomorra.
11 Tacan cuu,
ta canihin ra Lot can nu cuu chi nduhva yuta Jordán,
ta cuahan ra iti chiyo cana nicandi.
Cuhva can quee ndaa ra ta ra.
12 Ta ndoo ra Abraam iti chiyo nu cuu chi ñuhun Canaán,
ta ra Lot chacoo ra iti nduhva yuta Jordán,
ta savaha ra vehe ra yatin ñuun Sodoma,
13 soco ñivi iyo ñuun Sodoma can,
mani ñivi xaan cuu ñi,
ta mani cha ndavaha ni cuni ñi savaha ñi iti nuun ra Jehová Ndioo.
14 Tacan cuu,
ta cahan ndico ra chahnu Ndioo chi ra Abraam tiempu cha cha ni quee ndaa ra Lot chi ra,
ta cati ra ti:
“Ndehe niniin cahnu iti xini ta iti xuu,
ta iti cana nicandi ta iti chiso ri.
15 Ñuhun cha ndehe cun cua cuhve chi chihin cun ta chi ndihi tata cun ndihi ndoo tiempu.
16 Ta cua savahi cha ndihi ñivi cun cua cuu ñi cuhva iyo yuti ñaca,
vati yoni cua cuu cahvi chi ñi ti tuvi xaan ñi cua cuu.
17 Vitin ndoyo,
ta cua ndehe niniin cahnu ñuhun can,
vati chi maun cua cuhve chi”,
cati ra Ndioo chi ra Abraam.
18 Tacan cuu,
ta ra Abraam chani ra vehe ra,
ta cuahan ra iti yucu Mamre nu inda yutun tundii nu cuu chi Hebrón,
ta chacoo ra ican.
Ta savaha ra iin altaar,
ta sacahnu ra chi ra Jehová Ndioo.