Nacachi ra Ndioo chi ra Abraam
12
Ta ra Jehová Ndioo,
cahan ra chi ra Abraam,
ta cati ra chi ra ti: ”
Quee ñuhun nu iyo cun chi ñivi cun,
vehe sutu cun,
ta cuahan inga ñuhun nu cua sanahan mai chihin cun,
2 vati cua savahi cha cua ndutuvi tata cun,
ta cua cuu ñi iin ñuun cahnu xaan,
ta cua cuhve cha vaha chihin cun,
ta cua savahi cha cua tayahvi ndihi ñivi chihun,
ta cua cuhva maun cha vaha chi ndihi ñivi.
3 Ñivi cha cua savaha cha vaha chihin cun,
cua cuhva mai cha vaha chi ñi,
ta chi ñivi cha cua cahan ndavaha ni chihun suvi ni ndavaha ni,
cua tahan ndico maan ñi,
ta cua coo vaha ndihi ñivi ñuñivi cha cuenda maun”,
cati ra Ndioo.
4 Tacan cuu,
ta quee ra Abraam cuahan ra cuhva cha ni cati ra Jehová Ndioo chi ra,
ta cuahan tahan ra Lot chi ra.
Cha iyo ra Abraam uni xico chahun cuiya ra quivi quee ra,
ñuun Haraan can.
5 Quihin ra chi ña Saraii ñasihi ra chi ra Lot sachin ra chi ndihi ndatiñu ñi,
ta ndihi musu ra cha nihin ra ñuun Haraan.
Cuhva can quee ñi,
cuahan ñi ta queta ñi ñuhun Canaán.
6 Yaha ra Abraam yuhu ñuhun can,
ta cuahan ra iti Siquem,
ta queta ra nu cuu chi More nu inda yutun tundii cahnu.
Tiempu can mani ñivi ñuhun Canaán iyo ican.
7 Tacan cuu,
ta satuvi nuun ra Jehová Ndioo chi ra Abraam,
ta cati ra chi ra ti:
“Ñuhun ya cua cuhva yu chi ndihi tata cun”,
cati ra.
Chacan cuu cha sacuiti ra yuu,
ta savaha ra iin altaar,
ta sacahnu ra chi ra Jehová Ndioo,
vati ican ni cahan ra chi ra.
8 Ta ican quee ra,
ta cuahan ra iti xuu,
ta queta ra nu iyo xaan yucu chiyo cana nicandi nu cuu chi Beteel,
ta ican savaha tucu ra inga altaar,
ta sacahnu ra chi ra Jehová Ndioo,
ta savaha tahan ra vehe ñiin quiti cuhu ra,
ta chacoo ra ican,
ta ndoo Beteel can chiyo chiso nicandi,
ta ndoo ñuun Hai can chiyo cana ri.
9 Yaha iin tiempu,
ta sa quee ra,
ta cuahan ra cuee cuee ni iti nu cuu chi Neguev.
Cuahan ra Abraam iti ñuhun Egipto
10 Ta quivi can chacoo tama nu ñuhun can,
ta chacan quee ra,
ta cuahan ra iti ñuhun Egipto,
ti cua coo ra tican,
vati cahnu xaan tundoho chacoo quivi can.
11 Ta ni cumani cha cua quihvi ra ñuhun can,
ta quechaha cati ra chi ñasihi ra ti:
“Chito yu cha viu xaan ñahan cuu cun,
12 ta ndihi ra rai ñuhun Egipto cua ndehe chihin cun,
ta cua cati ra ta ra ti:
‘Ñasihi ra chi ña’,
ta cua cahni ra ta ra chihin yu,
ta chi maun cua nacoo ra ta ra.
13 Ta chacan vitin cua cati cun ti cuhva cun chihin yu,
vati tacan ña cua cahni ra ta ra chi,
ta cua coo vaha yu cha cuenda cun”,
cati ra Abraam.
14 Tacan cuu,
ta quihvi ra Abraam ñuhun Egipto,
ta ndehe ndihi ra iyo ñuhun can ta ra chi ña Saraii cha viu xaan ñahan cuu ña.
15 Ndehe tahan ndihi ra cuu musu ra faraón can chi ña,
ta chaha ra ta ra cuenda chi ra cha taqui xaan ñahan cuu ña,
ta tachi ra faraón tiñu cha quihin chihin ña cha na cua cuhun ña vehe ra.
16 Ta cha cuenda maan ña samani xaan ra chi ra Abraam,
ta chacan chacoo cuaha xaan mbee ra chi chivu ra chi sundiquin ra chi burru ra chi camellu ra chi musu rai chi musu ñahan cha satiñu chi ra.
17 Yaha ndihi chacan,
ta savaha ra Jehová Ndioo cha quichi cuaha xaan cuehe vehe ra faraón can cha cuenda ña Saraii.
18 Chacan cuu cha cana ra faraón can chi ra Abraam,
ta cati ra chi ra ti:
“Ña vaha cha ni savaha cun chihin yu,
vati ña cati cun chihin yu cha ñasihi cun chihin ña.
19 Ña vaha cha cati cun chihin yu cha cuhva cun chihin ña,
vati saxini yu cha cua quihin yu chihin ña cha cua cuu ña ñasihi yu.
Vitin quihin ñasihi cun,
ta cuahan”,
cati ra faraón chi ra Abraam.
20 Chaha ra faraón tiñu chi ñivi ra cha na cua tava ñi chi ra Abraam tichi ñuhun Egipto can,
ta cuahan ra chi ñasihi ra chi ndihi ndatiñu ra.