Cha cuu torre Babeel
11
Tiempu can in ni tuhun cahan ndihi ñivi ñuñivi.
2 Chacan cuu cha quee ñivi can,
ta cuahan ñi iti chiyo cana nicandi,
ta queta ñi ta ñi iin nduhva ñuhun Sinaar,
ta ican ni sañuun ñi ta ñi.
3 Ta cati ñi chi tahan ñi ti:
“Cua savaha yo ndoho,
ta cua cahmi yo chi chi,
ta chacan cua cuu sava ta cua yuu,
ta cua cuatiñu yo sucha quixi cha cua cuu sava ta cua ndahyu caca”,
cati ñi.
4 Ta cati ndico tucu ñi ti:
“Cua savaha yo iin ñuun cahnu xaan,
ta cua savaha tahan yo iin torre sucun xaan cha cua queta nda andivi.
Tacan cua coto ndihi ñivi ti nditi xaan yo,
ta tacan ña cua cuita cuati yo nu ñuhun ñuñivi ya”,
cati ñi.
5 Tacan cuu,
ta ndehe ra Jehová Ndioo ndihi cha cuu ñuun can,
ta ndehe tahan ra torre cha cuahan savaha ñivi can ta ñi.
6 Ta cati ra ti:
“Ñivi ya,
in ni ñuun cuu ñi,
ta in ni tuhun cahan ñi,
ta cha quechaha satiñu ñi cuhva ya,
ta ndihi cha cua savaha ñi,
yoni cua cuu casi cha ndacu ñi saxini ñi.
7 Vitin cua savaha yo cha cua sama tuhun cahan ñivi ya ta ñi,
ta ni iin ñi ña cua cutuni ca ini tuhun cahan tahan ñi”,
cati ra.
8 Tacan savaha ra Jehová Ndioo chi ñivi can,
ta chita cuati ñi niniin cahnu nu ñuhun ñuñivi,
ta saña ñi cha savaha ñi torre can.
9 Chacan cuu cha chacunani ñuun can Babeel,
vati ican ni sama ra Jehová Ndioo tuhun cahan ñivi iyo nu ñuhun can,
ta ican savaha ra cha chita cuati ndihi ñivi niniin cahnu nu ñuhun ñivi.
Ñivi cha cuu tata ra Sem
10 Ndihi ñivi ya cuu tata ra Sem.
Cha ni yaha uvi cuiya cha chacoo savi xaan,
ta queta ra Sem cientu cuiya ra,
ta chacoo sehe ra cha chacunani Arfaxad.
11 Ta cha yaha cacu ra Arfaxad,
ta chacoo ra inga uhun cientu cuiya,
ta tuvi ca sehe ra chacoo rai ta ñahan.
12 Queta ra Arfaxad oco chahun cuiya ra,
ta chacoo sehe ra cha chacunani Sala.
13 Ta chacoo ra inga cumi cientu uni cuiya cha yaha cacu ra Sala,
ta tuvi ca sehe ra chacoo rai ta ñahan.
14 Queta ra Sala oco uchi cuiya ra,
ta chacoo sehe ra cha chacunani Heber.
15 Ta chacoo ra inga cumi cientu uni cuiya cha yaha cacu ra Heber,
ta tuvi ca sehe ra chacoo rai ta ñahan.
16 Queta ra Heber oco uchi cumi cuiya ra,
ta chacoo sehe ra cha chacunani Peleg.
17 Ta chacoo ra inga cumi cientu oco uchi cuiya cha yaha cacu ra Peleg,
ta tuvi ca sehe ra chacoo rai ta ñahan.
18 Queta ra Peleg oco uchi cuiya ra,
ta chacoo sehe ra cha chacunani Reuu.
19 Ta chacoo ra inga uvi cientu iin tahan cuiya cha yaha cacu ra Reuu,
ta tuvi ca sehe ra chacoo rai ta ñahan.
20 Queta ra Reuu oco uchi uvi cuiya ra,
ta chacoo sehe ra cha chacunani Seruug.
21 Ta chacoo ra inga uvi cientu ucha cuiya cha yaha cacu ra Seruug,
ta tuvi ca sehe ra chacoo rai ta ñahan.
22 Queta ra Seruug oco uchi cuiya ra,
ta chacoo sehe ra cha chacunani Nacoor.
23 Ta chacoo ra inga uvi cientu cuiya cha yaha cacu ra Nacoor,
ta tuvi ca sehe ra chacoo rai ta ñahan.
24 Queta ra Nacoor oco iin tahan cuiya ra,
ta chacoo sehe ra cha chacunani Taré.
25 Ta chacoo ra inga cientu chahun cumi cuiya cha yaha cacu ra Taré,
ta tuvi ca sehe ra chacoo rai ta ñahan.
26 Queta ra Taré uni xico uchi cuiya ra,
ta chacoo uni sehe ra cha chacunani Abraam chi ra cha chacunani Nacoor chi ra chacunani Haraan.
Ñivi cha cuu tata ra Taré
27 Ndihi ñivi ya cuu tata ra Taré.
Cacu ra Abraam,
ta cacu tahan ra Nacoor,
ta cacu tahan ra Haraan.
Rahya ta ra cuu sehe ra.
Ta ra Haraan can cuu sutu ra Lot.
28 Ta xihna ca ra Haraan chihi nu ni cacu ra ñuun Uur cha iyo tichi ñuhun Caldea,
ta ndoo ra Taré sutu ra.
29 Tandaha ra Abraam chi ña Saraii,
ta ra Nacor tandaha chi ña Milca cha cuu sehe ra Harán,
ta chacoo inga sehe ra cha chacunani Isca.
30 Ta ña Saraii ña cuu coo sehe ña.
31 Quee ra Taré ñuun Ur cha iyo cuenda ñuhun Caldea,
ta cuahan ra iti ñuhun Canaán,
ta quihin ra chi ra Abraam sehe ra chi ra Lot sehe yani ra chi ña Saraii chanu ra,
ta queta ñi nu cuu chi ñuun Haraan,
ta ican ni ndoo ñi.
32 Ta chacoo ra Taré uvi cientu uhun cuiya,
ta chihi ra nu ndoo ñi ñuun Haraan can.