Cuhva cha quichi tata ra Noé
10
Cuhva quichi tata ra Noé chi ndihi sehe ra,
ra Sem ra Cam chi ra Jafet,
ta nu yaha chacoo savi xaan,
chacoo tuvi xaan sehe ra ta ra.
2 Ta ndihi rahya ta ra cuu sehe ra Jafet ra Gomeer chi ra Magoog chi ra Madaii chi ra Javaan chi ra Tubaal chi ra Meseec chi ra Tiraa.
3 Ta ndihi sehe ra Gomeer cuu ra Askenaaz chi ra Rifaat chi ra Togarma.
4 Ta sehe ra Javaan cuu ra Elisaa chi ra Tarsis chi ra Quitiim chi ra Dodaniim.
5 Ndihi ñivi can,
sañuun ñi iti chiyo nu cuu chi tañuhun,
ta chacoo ñi iin iin ñuun cuhva tuhun cahan ñi.
6 Ta ndihi rahya ta ra cuu sehe ra Cam:
ra Cuus chi ra Misraiim chi ra Fuut chi ra Canaán.
7 Ta ndihi sehe ra Cuus cuu ra Seba chi ra Havilaa chi ra Sabtaa chi ra Ramá chi ra Sabtecaa.
Ta sehe ra Ramá cuu ra Seba chi ra Dedán.
8 Ta chacoo ndico tucu inga sehe ra Cus cha chacunani Nimrod,
ta racan cuu iin rai nihin xaan cha chacundaca ñahan ra chi ñivi chacoo quivi can.
9 Ta iti nuun ra Jehová Ndioo cuu ra iin rai vaha xaan chahni quiti cuhu,
ta chacan cuu cha cati ñivi cuenda ra ti:
“Vaha xaan chahni ra Nimrod quiti cuhu,
vati maan ra Ndioo chaha ndatu chihin ra”,
cati ñi.
10 Ta chacundaca ñahan racan chi ñivi ñuun Babeel chi ñivi ñuun Ereec chi ñivi ñuun Acaad chi ñivi ñuun Calnee,
ta ndihi ñuun can chacoo tichi ñuhun Sinaar.
11 Ta quee ra ñuhun nu ndaca ñahan ra,
ta cuahan ra iti ñuhun Asiria,
ta ican savaha ra ñuun Nínive chi ñuun Rehoboot chi ñuun Calaa,
12 ta mahñu ñuun Nínive chi Calaa savaha ra inga ñuun cha nani Reseen,
ta ñuun can cahnu xaan chi cuu.
13 Ta ra Mizraim cuu sutu ra Ludim,
ra Anamim,
ra Lehabim,
ra Naftuhim,
14 chi ra Patrusim chi ra Casluhim chi ra Caftorim.
Ta ican quichi tata ñivi ñuhun Filistia.
15 Ta chacoo sehe xihna cuii ra Canaán cha chacunani ra Sidón,
ta chacoo inga sehe ra cha chacunani Het.
16 Ta tata ra Canaán cuu ñivi Jebús chi ñivi amorreo chi ñivi Gerges
17 chi ñivi Hev chi ñivi Araac chi ñivi Siin
18 chi ñivi Arvaad chi ñivi Zemaar chi ñivi Hamaat.
Tacan,
ta nu yaha quivi,
ta chita cuati ndihi ñivi cha cuu tata ra Canaán.
19 Cahnu xaan nu chacoo ñivi ra Canaán.
Queta ñi nda cua nda ñuun Sidón ta nda cua nda ñuun Geraar ta nda cua nda ñuun Gaza ta nda cua nda ñuun Sodoma chi ñuun Gomorra,
ta queta ñi nda cua nda ñuun Adma chi ñuun Zeboiim ta nda cua nda ñuun Lasa.
20 Ndihi ñivi ya cuu ñivi ra Cam,
ta siin siin tuhun cahan ñi ta ñi,
ta siin siin ñuun chacoo ñi ta ñi.
21 Ta chacoo tahan sehe ra Sem.
Racan cuu sutu chahnu ndihi sehe ra Heber,
ta maan ra cuu ra chanihin chi ra Jafet yani ra.
22 Ta ndihi sehe ra Sem cuu ra Elam chi ra Asur chi ra Arfaxad chi ra Lud chi ra Aram.
23 Ta ndihi sehe ra Aram cuu ra Uz chi ra Hul chi ra Geter chi ra Mas.
24 Ta ra Arfaxad can cuu sutu ra Sala,
ta ra Sala can cuu sutu ra Heber.
25 Ta ra Heber can chacoo uvi tahan sehe rai ra.
Iin ra chacunani Peleg,
vati quivi can natahvi ñuhun nu iyo ra ta ra,
ta inga ra cuu yani ra chacunani Joctaan.
26 Ta ra Joctaan can chacoo tahan sehe ra,
ta nani ra Almodaad chi ra Seleef chi ra Hazar-maveet chi ra Jera
27 chi ra Adoraam chi ra Uzaal chi ra Dicla
28 chi ra Obaal chi ra Abimaeel chi ra Seba
29 chi ra Ofiir chi ra Havilaa chi ra Jobaab.
Ndihi racan ta ra cuu sehe ra Joctaan.
30 Ta chiyo nu chacoo ra ta ra quechaha chi nda ñuhun Mesa ta nda cua nda ñuhun Sefaar ta nda cua nda nu cuu chi yucu chiyo cana nicandi.
31 Ndihi racan ta ra cuu sehe ra Sem chi ndihi ñivi ra,
ta siin siin tuhun cahan ñi ta ñi,
ta chacoo ñi ñuhun nu savaha ñi ñuun ñi.
32 Ta ndihi ñivi ya cuu sehe ra Noé cuhva cha quichi tata ñi ta ndihi ñuun nu chacoo ñi,
ta cuhva can chita cuati ndihi ñivi ya niniin cahnu nu ñuhun ñuñivi cha ni yaha cha chacoo savi xaan.