Tiso vaha ra Ndioo tiñu chi ra Noé
9
Ta sacu-ii ra Ndioo chi ra Noé chi sehe ra,
ta cati ra chi ra ta ra ti:
“Na cua satata ndo,
ta cua ndutuvi ndo nu ñuhun ñuñivi.
2 Ta ndihi ri quiti cuhu cha iyo nu ñuhun ñuñivi,
cua cuyuhvi ri ta ri ndehe ri ta ri chihin ndo.
Cua cuyuhvi ri saa cha iyo iti siqui,
ta cua cuyuhvi ndihi ri chica chi tichi nu ñuhun,
ta cua cuyuhvi ndihi ri tiaca cha iyo tichi tañuhun chihin ndo.
Ta tichi ndaha ndo chaha cuenda yu chi ri ta ri.
3 Ta cua cuu cachi ndo ndihi nuun ri quiti cuhu chi ndihi nuun cha cuu yahmi vaha chi ndihi nuun yucu numa vaha,
chaha yu ti cua cachi ndo,
4 soco ituhun ni cha ña cua cuu cachi ndo.
Ña cua cachi ndo niñi ri quiti cuhu,
ta ni ña cua cachi ndo cuñu ri tu ña cua too vaha niñi ri,
vati chi niñi ri iyo ndito ri.
5 Cha ndicha cati yu,
vati cua coo cuati ñivi ñuñivi tu cha cua cahni ñi chi tahan ñi,
ta nda cua nda ri quiti cuhu cua coo tahan cuati tu cua cahni ri ñivi.
Tu cua cahni ñivi chi tahan ñi,
cua ndaca yu cuenda chihin ñi cuenda cuati cha savaha ñi”,
cati ra Ndioo chi ñi.
Ta cati ndico tucu ra Ndioo chi ñi ti:
6 “Tu cua cahni iin ñivi chi tahan ñi,
suvi ni cuhva can cua cahni ndico inga ñivi chihin ñi,
vati maan ra Ndioo savaha chi ñivi ñuñivi
cuhva caa maan ra.
7 Ta maan ndo,
na cua satata ndo,
ta na cua ndutuvi xaan ndo,
ta na cua coo sehe ndo niniin cahnu nu ñuhun ñuñivi ya”,
cati ra Ndioo chihin ñi.
8 Ta cati ndico ra Ndioo chi ra Noé chi ndihi sehe ra ti:
9 “Vitin quivi ya cua tiso vahi tiñu chihin ndo chi ndihi tata ndo cha vachi iti nuu.
10 Ta tiso vaha tahin tiñu chi ndihi ri quee chihin ndo tichi tundoo can chi ndihi ri saa chi ndihi ri quiti cuhu sana ndo chi ndihi ri iyo tichi cuhu.
11 Vitin ndoo vaha tiñu ya chihin ndo,
vati ña cua sanaan ca yu ni inga ca chaha ndihi cha ndito iyo nu ñuhun ñuñivi chi savi xaan”,
cati ra.
12-13 Ta cati ndico tucu ra chahnu Ndioo ti:
“Cua tiso yu iin cuyohndi iti nu vico,
vati cua cuu chi iin seña ndihi tiempu cha vachi iti nuu,
vati cha ni tiso vahi tiñu chihin ndo chi ndihi cha ndito iyo nu ñuhun ñuñivi.
14 Cua ndehe ndo cuyohndi can hora cha cua coo vico savi nu ñuhun ñuñivi.
15 Ta cua cucuhun ini yu tiñu cha tiso vahi chihin ndo chi ndihi cha iyo ndito nu ñuhun ñuñivi,
vati ña cua coo ca savi xaan cha cua sanaan chi ndihi cha iyo ndito nu ñuhun ñuñivi.
16 Ta cha cua cunda cuyohndi can iti nu vico,
ta cua ndehi chi,
ta cua cucuhun ini yu tiñu cha ni tiso vahi chi ndihi ñivi ñuñivi chi ndihi cha ndito iyo nu ñuhun.
17 Chacan cuu seña cuenda tiñu cha ni tiso vahi chi ndihi ñivi,
ta chi ndihi quiti cuhu cha iyo ndito nu ñuhun ñuñivi”,
cati ra Ndioo chi ra Noé.
Chihi ra Noé nduxi uva cha cha nduxaan, ta chini ra
18 Ta ndihi sehe ra Noé cha quee tichi tundoo can,
cuu ra Sem chi ra Cam chi ra Jafet,
ta ra Cam can cuu sutu ra Canaán.
19 Nduni tahan ra ta ra cuu sehe ra Noé,
ta cuenda maan ra ta ra ndutuvi ndico ñivi ñuñivi.
20 Tacan cuu,
ta quechaha satiñu ra Noé nu ñuhun,
ta tachi xaan ra yoho uva.
21 Ta chihi xaan ra nduxi uva cha cha nduxaan,
ta chini xaan ra,
ta nda cua ni quee sahma ra,
ta caa ra mahñu tichi vehe ñiin ra.
22 Ta ra Cam cha cuu sutu ra Canaán,
ni ndehe ra cha ñahni ca sahma ndichin sutu ra,
ta cha cati ra chi uvi ca yani ra cha iyo iti nuquehe.
23 Tacan cuu,
ta ra Sem chi ra Jafet quihin ta ra sahma,
ta yoso sucu ra ta ra chi,
ta chica chata ra ta ra,
ta queta ra ta ra nu caa sutu ra,
soco inga chiyo ndehe ra ta ra,
ta chasi ra ta ra chi ra,
vati ña cuni ra ta ra ndehe ra cha cuiti ndaha sutu ra ta ra.
24 Tacan cuu,
ta nandoto ndico ra Noé cha ni chini ra,
ta chito ra cha ni savaha sehe ra,
ra luhu ca,
25 ta cati ra Noé ti:
“Iin cha ndavaha ni cua quichi siqui ra Canaán,
vati musu cuatu nduvi tahan yani ra cua cuu ra”,
cati ra.
26 Ta cati ndico tucu ra Noé ti:
“Na cua savaha ra Jehová Ndioo cha cua coo vaha ca ra Sem,
ta na cua cuu ra Canaán musu cuatu ra.
27 ¡Na cua sanducahnu ca ra Jehová Ndioo chi ra Jafet,
ta na cua coo tahan ra nu iyo vehe ñiin ra Sem,
ta musu cuatu ra ta ra cua cuu ra Canaán!”,
cati ra Noé.