Cha cuiñi cha cuun savi xaan
8
Ta chacuhun ini ra Ndioo chi ra Noé chi ndihi ri quiti cuhu cha iyo chi ra tichi tundoo can,
ta savaha ra Ndioo cha yaha tati nu ñuhun,
ta nanuun nduta can.
2 Ta cuhva can ni chacundasi nu cahndi nduta tichi ñuhun,
ta nu coyo cahnu chi nduta iti siqui andivi,
ta chacuiñi cha cuun savi can.
3 Ta quechaha nanuun nduta can suhva suhva nu ñuhun ñuñivi,
ta cuu chi cientu uvi xico uchi quivi,
ta ndoco nduta can nu ñuhun.
4 Ta ndoo tundoo can siqui yucu cahnu Araraat quivi chahun uvi nda yoo ucha.
5 Ta nu quihvi uchi yoo cha cuahan ca ndoco nduta can.
Ta quivi xihna cuii suvi ni tichi yoo can ndundichin siqui ndihi yucu sucun.
6 Ta nu queta uvi xico quivi,
ta nuna ra Noé vendana tundoo cha savaha ra,
7 ta saña ra iin ri ticaca,
ta cuahan ri tati ri iin chiyo ta inga chiyo,
vati ña nihin ri nu coso ri,
vati ndatu ri cha na cua ndoco nduta nu ñuhun ñuñivi.
8 Ta yaha chacan,
ta sacuhun ndico tucu ra iin ri ndivi,
vati cuni ndehe ra a cha iti nu ñuhun ñuñivi,
9 soco ri ndivi can ña nanihin ri nu coso ri.
Chacan cuu cha queta ndico ri nu caa tundoo can,
ta tiin ra Noé chi ri,
ta tihi ndico ra chi ri nu iyo ra,
vati ni caa xaan nduta nu ñuhun.
10 Chacan cuu cha chatu ra inga ucha quivi,
ta sa ni sacuhun tucu ra chi ri ndivi can,
11 soco cha cha cua ini can ni queta ndico ri ndivi can,
ta indi yuhu ri iin ndaha numa yutun olivu,
ta cuhva can nihin tuni ini ra Noé cha cha vachi ndu iti nu ñuhun ñuñivi.
12 Ta chatu ra inga ucha quivi,
ta sa sacuhun tucu ra chi ri ndivi can,
soco ñahni ca ri queta nu indi ra.
13 Ta iyo ra Noé iñu cientu ituhun cuiya ra,
ta chacoo ndihi chacan.
Ta quivi ituhun ndaa yoo xihna cuii nuna ra xini tundoo can,
ta ndehe ra cha cha ndu iti nu ñuhun ñuñivi.
14 Ta quivi oco ucha ndaa yoo uvi can,
ni neti vaha ca nu ñuhun ñuñivi.
15 Tacan cuu,
ta ni cahan ndico tucu ra Ndioo chi ra Noé,
ta cati ra ti:
16 ”Quee tichi tundoo can chi ñasihi cun chi ndihi sehe cun chi ñasihi ra ta ra.
17 Ta cua quee tahan ndihi ri quiti cuhu cha iyo chihun ican chi ndihi ri saa chi ndihi ri chica chi tichi nu ñuhun.
Cua quee ri ta ri icaa ni chihun,
ta na cua cuhun ri ta ri nu ñuhun ñuñivi,
ta na cua satata ri ta ri,
ta na cua ndutuvi ri ta ri nu ñuhun ñuñivi”,
cati ra Ndioo chi ra Noé.
18 Tacan cuu,
ta quee ra Noé tichi tundoo can chi ñasihi ra chi ndihi sehe ra chi ñasihi ra ta ra.
19 Ta quee ndihi ri quiti cuhu ta ndihi ri cuu sana ñivi,
quee ri chica chi tichi,
quee ndihi ri saa,
ta quee ndihi ri chica cuu nu ñuhun,
iin iin tata ri ta ri ca quee tichi tundoo can.
20 Ta savaha ra Noé in altaar iti nuun ra Jehová Ndioo,
ta ni quihin ra in in nuun ri quiti cuhu vaha chi ndihi ri saa vaha,
ta samani ra chi ri chi ra Ndioo,
vati cua cayu ri nu altaar can iti nuun ra.
21 Ta nu ni queta xico vixin yuhma ri quiti cuhu cha cayu iti nuun ra Jehová Ndioo,
saxini ra chi anima ra ti:
“Ña cua tachi tuni que ndihi cha ndito iyo nu ñuhun cha cuenda cha ndavaha ni savaha ñivi ñuñivi,
vati nda ni tivaa ñi,
ta saxini ñi ndavaha ni chi anima ñi,
ta chacan ña cua sanaan que ndihi cha iyo cuhva cha ni savahi vitin”,
saxini ra Ndioo.
22 “Ta chacan cuu cha ndihi quivi cha cua coo ñuhun ñuñivi ya,
ña cua cucuita cha cua tachi ñivi ndihi tata,
ta cua canihin tiñu chiti chi,
ta ña cua cucuita quivi vichin ta quivi ihni,
tiempu savi ta tiempu cahni,
ta ni ña cua cundihi chinucahni ta chacuaa”,
cati ra Ndioo.