Ni cuun savi xaan
7
Ta nu ni ndihi savaha ra tundoo can,
ta cati ra Jehová Ndioo chi ra Noé ti: ”
Quihvi chi ndihi ñivi cun tichi tundoo can,
vati ituhun yoho iyo cuiti vaha cuhva cuni yu,
ta ñavi ca ndihi ñivi ñuñivi.
2 Ta ndihi ri quiti cuhu cha cuu cachi ndo cua quihvi ucha ri ii ta ucha ri sihi,
ta ituhun ni ri ii chi iin ri sihi cha ña cuu cachi ndo.
3 Ta ni cuhva cua quihin ndo ndihi nuun ri saa cha tati iti siqui.
Cua quihin cun ucha ri ii ta ucha ri sihi,
vati tacan na cua cuina ndico ri,
ta ña cua naan tata ri nu ñuhun ñuñivi ya.
4 Tacan cua savahun,
vati cumani ucha quivi ca,
ta cua savahi cha cua cuun savi xaan.
Uvi xico quivi ta uvi xico chacuaa cua cuun chi,
vati cua sanain ndihi ñivi cha iyo ta ndihi cha savahi nu ñuhun ñuñivi ya”,
cati ra chi ra Noé.
5 Ta ni savaha ra Noé ndihi cuhva cha tava tiñu ra Jehová Ndioo chi ra.
6 Ta iñu cientu cuiya ra Noé iyo ra,
ta quechaha cuun savi nu ñuhun ñuñivi.
7 Tacan cuu,
ta quihvi ra Noé chi ñasihi ra chi ndihi sehe rai ra ta chi ndihi chanu ra tichi tundoo can,
vati cua cacu ñi.
8 Ta quihvi tahan ndihi ri quiti cuhu vaha chi ri quiti cuhu cha ña cuu cachi ñi,
ta quihvi tahan ndihi ri saa chi ri quiti cuhu chica chi tichi nu ñuhun.
9 Uvi uvi ri ta ri ca quihvi tichi tundoo can chi ra Noé.
Ri ii ta ri sihi ni quihvi cuhva cha ni tava tiñu ra Ndioo chi ra.
10 Ta nu ni queta ucha quivi can,
chitu nduta niniin cahnu nu ñuhun ñuñivi.
11 Ta quivi chahun uvi ndaa yoo uvi can,
queta ra Noé iñu cientu cuiya ra.
Ta suvi ni quivi can ni cahndi nduta cha iyo tichi ñuhun,
ta nuna cahnu tahan chi nduta iyo iti siqui andivi.
12 Ta cuun savi can uvi xico quivi ta uvi xico chacuaa.
13 Ta quivi quechaha cuun savi can,
quihvi ra Noé chi ñasihi ra tichi tundoo can chi nduni tahan sehe rai ra,
ra Sem chi ra Cam chi ra Jafet,
chi ñasihi ra ta ra.
14 Quihvi ñi ta ñi,
ta quihvi tahan ndihi nuun ri quiti cuhu cha iyo tichi cuhu chi ndihi ri cuu sana ñivi cuhva iyo iin iin tata ri,
ta chi ndihi ri quiti cuhu chica chi tichi nu ñuhun,
ta quihvi tahan ndihi ri saa cuhva iyo iin iin tata ri ta ri.
15 Cuhva can quihvi uvi uvi nuun ri quiti cuhu can chi ra Noé tichi tundoo can.
16 Ri ii ta ri sihi ni quihvi chihin ra cuhva cha ni tava tiñu ra Ndioo chi ra,
ta chasi ra Jehová Ndioo yuhu tundoo can.
17 Tacan cuu,
ta cuun savi xaan uvi xico quivi nu ñuhun ñuñivi ya.
Ta quechaha nandaa nduta,
ta chacan nandaa tahan tundoo can nu nduta can.
18 Ta nandaa ca nduta nu ñuhun ñuñivi,
ta suta tundoo can nu nduta cahnu can.
19-20 Ta cuahan ca nandaa nduta can,
ta yaha chi inga ucha metru siqui ndihi yucu sucun cha iyo nu ñuhun ñuñivi ya.
21 Ta cuhva can ni chihi ndihi cuii ñivi cha iyo nu ñuhun ñuñivi chi ndihi ri saa chi ndihi ri cuu sana ñivi,
ta chihi tahan ndihi ri quiti cuhu iyo tichi cuhu chi ndihi ri quiti cuhu cuati cha iyo nu ñuhun.
22 Cuhva can chihi ndihi cha iyo ndito ta xita tati chi nu ñuhun ñuñivi.
23 Tacan ni sanaan ra Ndioo ndihi cha iyo ndito,
ta ituhun ni maan ra Noé chi ñivi ra ni cacu cha indi ñi tichi tundoo can chi ndihi ri quiti cuhu cha canihin vaha ra.
24 Ta cientu uvi xico uchi quivi caa nduta can nu ñuhun ñuñivi.