Cuaha xaan cha ndavaha ni savaha ñivi ñuñivi
6
Tacan cuu,
ta cha nducuaha xaan ñivi nu ñuhun ñuñivi ya,
ta tuvi xaan sehe sihi ñivi can chacoo,
2 ta sehe ra Ndioo ndehe ra ta ra cha taqui xaan sehe sihi ñivi ñuñivi,
ta nacachi ra ta ra chi ñican cuu ñasihi ra ta ra.
3 Ta quechaha cati ra Jehová Ndioo ti:
“Ña cuni yu cha ndihi ni tiempu cua cahan yuhi chi ñivi ñuñivi,
vati tati cuu yu,
ta ñivi ñuñivi iquin cuñu cuu ñi,
ta chacan cua coo ñi ituhun ni cientu oco cuiya nu ñuhun ñuñivi ya”,
cati ra Ndioo.
4 Ta natahan ñivi cha cuu sehe ra Ndioo chi sehe sihi ra ñuñivi,
ta chacoo sehe ñi cha nahnu ta sucun xaan.
Ta rahya ta ra cuu ra nihin xaan tiempu can,
ta ndihi ñivi chito cha rai cahnu xaan cuu ra ta ra.
5 Ta ndehe ra Jehová Ndioo ti mani cha ña vaha ndacu ñivi can nu ñuhun ñuñivi,
ta mani cha ndavaha ni saxini ñi cha cua savaha ñi.
6 Ta ndahvi cuni ra Ndioo,
ta uhvi xaan cuni ra chi anima ra cha savaha ra chi ñivi nu ñuhun ñuñivi ya.
7 Tacan,
ta cati ra ti:
“Cua sanaan yu chi ñivi nu ñuhun ñuñivi cha ni savahi,
ta cua sanain chi ndihi ri quiti cuhu,
ta cua sanain chi ndihi ri chica chi tichi,
ta cua sanaan tahin chi ndihi ri saa tati iti siqui”,
ta cati ndico ra Ndioo ti:
“Vaha ca,
tu ña savaha cuii ni yu ndihi chacan”,
cati ra.
8 Ta ituhun ni maan ra Noé nihin tu manini iti nuun ra Jehová Ndioo.
Savaha ra Noé iin tundoo
9 Cuhva ya quichi tata ra Noé.
Ta cuu ra iin rai cuiti,
ta vaha xaan tasoho ra chi ra Ndioo,
ta ituhun ni maan ra Noé savaha cuhva cuni ra Ndioo.
10 Ta chacoo uni tahan sehe ra,
ra Sem chi ra Cam chi ra Jafet.
11 Ta mani cha ndavaha ni ndacu ñivi ñuñivi,
ta mani cha ca cani tahan ñi cuni ñi iti nuun ra Ndioo.
12 Ta ndehe ra Ndioo cha tivi nu ñuhun ñuñivi,
vati mani cha ndavaha ni cuni ñivi savaha ñi.
13 Ta cati ra chi ra Noé ti:
“Cha saxini yu cha cua sanain chi ndihi ñivi ñuñivi,
vati mani cha ca cani tahan ñi cuni ñi.
Chacan cuu cha cua cahni yu chi ñican,
ta cua sanain chi ndihi ñivi ñuñivi,
vati cuati maan ñi cuu chi.
14 Ta chacan cua savahun iin tundoo.
Chi vitu yuchan nani gofer,
ta cua savahun cuaha cuartu chi,
ta cua casi cun ticu vitu can chi sucha tuiti.
Iti tichi chi ta iti chata chi cua casi cun.
15 Ta cuhva ya cua savahun tundoo can.
Ituhun cientu oco chahun metru cha cani chi,
ta oco uvi metru yoso sava cha quihin chi,
ta uchi uni metru yoso sava cha sucun chi.
16 Ta cua savahun iin vendana,
ta cua ndoo chi sava metru sucun tundoo can,
ta cua taa cun iin yuvehe iti xiin chi,
ta cua coo uni toto chi,
17 vati cua savahi cha cua cuun savi xaan,
ta cuaha xaan nduta cua ndoo nu ñuhun ñuñivi ya,
ta cua cuvi ndihi ñivi chi ndihi cha ndito cha iyo nu ñuhun ñuñivi ya.
18 Ta chi maan cun cua ndoo vaha tuhun cahan yu,
vati cua quihvi ndihi ndo tichi tundoo can.
Cua quihvi maun,
cua quihvi ñasihi cun,
cua quihvi nduni tahan sehe cun,
ta cua quihvi tahan ñasihi ra ta ra.
19 Ta cua quihvi uvi uvi ri quiti cuhu iyo nu ñuhun ñuñivi cuhva iin iin tata ri,
vati tacan ña cua cuvi ri ta ri.
Cua quihvi iin ri ii,
ta iin ri sihi chihin cun.
20 Ta cua cundaca cun ndihi nuun ri quiti cuhu cha iyo nu ñuhun ñuñivi ya tichi tundoo can,
ta cua cundaca tahun ndihi ri saa chi ndihi ri quiti cuhu cha cuu sana ñivi,
iin ri ii ta iin ri sihi,
ta tacan cua coo ndito tahan ri ta ri cuhva iin iin tata ri.
Tacan ni ri quiti cuhu chica chi tichi iin iin tata ri,
ta uvi uvi ri ta ri cua quihvi chihun,
vati tacan ña cua cuvi ri.
21 Ta ndihi cha cuu cachi cun cua canihin vaha cun chi,
ta cua tivahun chi tichi tundoo can,
vati chacan cua cachi cun ta cua cachi tahan ndihi ri quiti cuhu cua coo chihun ican”,
cati ra Ndioo chi ra Noé.
22 Ta savaha ra Noé ndihi tiñu cha chaha ra Ndioo chi ra.