Cuhva cha chinu tata ra Adaan
5
Tutu ya chaha chi cuenda cuhva vachi tata ra Adaan.
Cha saquetuvi ra Ndioo chi ñivi ñuñivi.
Cuhva cha iyo maan ra ni savaha ra chi ñi.
2 Rai ta ñahan ni savaha ra Ndioo quivi cha ni saquetuvi ra chi ñi ta ñi,
ta ni chaha ra cha vaha chihin ñi cha cuu ñi ñivi ñuñivi.
3 Ta iyo ra Adaan cientu oco uchi cuiya ra,
ta ni chacoo in sehe ra cuhva caa maan ra,
vati quee xaan ve chihin ra,
ta tiso ra sivi ve luhu can,
cha nani ve Seet.
4 Cha ni yaha cacu ra Seet,
ta ni chacoo ra Adaan inga una cientu cuiya,
ta tuvi xaan ca sehe ra chacoo.
5 Queta iin tahan cientu oco uchi cuiya ni chacoo ra Adaan ñuñivi,
ta ni chihi ra.
6 Ta iyo ra Seet cientu uhun cuiya ra,
ta chacoo in sehe ra cha nani Enoos.
7 Tacan,
ta ni chacoo ra Seet inga una cientu ucha cuiya,
ta tuvi xaan ca sehe ra chacoo.
8 Ta iin tahan cientu uchi uvi cuiya ni chacoo ra Seet,
ta ni chihi ra.
9 Ta iyo ra Enoos can cumi xico uchi cuiya,
ta chacoo sehe ra cha nani Cainaan.
10 Ta cha yaha cacu ra Cainaan,
ta chacoo ra Enoos inga una cientu chahun cuiya,
ta tuvi xaan ca sehe ra chacoo.
11 Tacan,
ta ni chacoo ra Enoos ñuñivi iin tahan cientu uhun cuiya,
ta ni chihi ra.
12 Ta iyo ra Cainaan uni xico uchi cuiya ra,
ta cacu in sehe ra nani Mahalaleel.
13 Tacan,
ta ni chacoo ra Cainaan inga una cientu uvi xico cuiya,
ta tuvi xaan ca sehe ra ni chacoo.
14 Ta chacoo ra Cainaan iin tahan cientu uchi cuiya,
ta ni chihi ra.
15 Ta iyo ra Mahalaleel uni xico uhun cuiya ra,
ta cacu in sehe ra cha nani Jareed.
16 Tacan,
ta chacoo ra Mahalaleel inga una cientu oco uchi cuiya,
ta tuvi xaan ca sehe ra ni chacoo.
17 Ta chacoo ra inga una cientu cumi xico chahun cuiya,
ta ni chihi ra.
18 Ta iyo ra Jareed ituhun cientu uni xico uvi cuiya ra,
ta chacoo iin sehe ra cha nani Enoc.
19 Ta cha ni yaha cacu ra Enoc can,
ta chacoo ra Jareed inga una cientu cuiya,
ta tuvi xaan ca sehe ra chacoo.
20 Ta ni chacoo ra Jareed iin tahan cientu uni xico uvi cuiya,
ta ni chihi ra.
21 Ta iyo ra Enoc uni xico uhun cuiya ra,
ta ni chacoo iin sehe ra cha nani Matusalén.
22 Ta sacahnu ra Enoc chi ra Ndioo ndihi ni quivi,
ta ni chacoo ra Enoc can inga uni cientu cuiya,
ta tuvi xaan ca sehe ra chacoo.
23 Tacan,
ta ni chacoo ra Enoc inga uni cientu uni xico uhun cuiya.
24 Ta savaha ra Enoc cuhva cha cuni ra Ndioo,
ta canihin ra Ndioo chi ra,
ta ña ni chihi ra.
25 Ta iyo ra Matusalén ituhun cientu cumi xico ucha cuiya ra,
ta chacoo iin sehe ra cha nani Lamec.
26 Tacan,
ta ni chacoo ra Matusalén inga ucha cientu cumi xico uvi cuiya,
ta tuvi xaan ca sehe ra chacoo.
27 Ta ni chacoo ra Matusalén iin tahan cientu uni xico iin tahan cuiya,
ta ni chihi ra.
28 Iyo ra Lamec ituhun cientu cumi xico uvi cuiya ra ta chacoo iin sehe ra,
29 ta chacunani ve Noé,
ta cati ra Lamec ti:
“Cha cati ra Ndioo ti cua satiñu yo chi tundoho,
ta cua tachi yo itu nu ñuhun ñuñivi ya,
soco ra luhu ya na cua cuahnu ra,
ta cua tindee ra chihin yo”,
cati ra.
30 Ta ni chacoo ra Lamec inga uhun cientu cumi xico chahun cuiya,
ta tuvi sehe ra chacoo.
31 Ta ni chacoo ra Lamec inga ucha cientu uni xico chahun uvi cuiya,
ta chihi ra.
32 Ta cha queta ra Noé uhun cientu cuiya ra,
ta chacoo uni tahan sehe ra,
ta iin ra nani Sem,
ta inga ra nani Cam,
ta inga ra nani Jafet.