Cuhva chacoo ra Caín chi ra Abel
4
Tacan cuu,
ta chacoo ra Adaan chi ña Eva ñasihi ra,
ta cha cuñuhun sehe ña,
ta queta quivi cacu in sehe ña cha nani ra Caín,
ta cati ña ti:
“Maan ra chahnu Ndioo cuni cha na cua coo in ra luhu sehi”,
cati ña.
2 Yaha in tiempu,
ta chacoo ndico tucu inga sehe ña,
ta chacunani ve Abel.
Ta ra Abel can cuu in ra sacuenda mbee chi chivu,
ta ra Caín can cuu in ra satiñu tichi cuhu.
3 Tacan cuu,
ta yaha in tiempu,
ta quichi ndaca ra Caín cha cua samani ra chi ra Ndioo.
Cha samani ra cha tahan chi cha ni nihin ra nu satiñu ra chi itu.
4 Ta samani tahan ra Abel chi ri cuu sehe xihna cuii ri mbee a chivu sana ra,
ta in ri xahan vaha cuu ri,
ta chacan vaha xaan cuni ra Ndioo ndehe ra cha samani ra Abel chihin ra,
5 soco ña sii cuni ra Ndioo ndehe ra cha ni samani ra Caín iti nuun ra.
Tacan,
ta quihin xaan ra Caín tisihi nda cua ni nducuaha nuun ra cha xaan cuni ra.
6 Tacan cuu,
ta nducu tuhun ra Jehová Ndioo chi ra Caín,
ta cati ra ti:
“¿Ñacu chihi xaun tisihi,
ta ñacu ña vaha cuii ndehe cun?
7 Tu cha vaha savahun,
ña cua quihun tisihi.
Tu cha ña vaha savahun,
cha cumi run ndavaha ni nu iyo cun,
ta cuni xaan run sandoyo ñuhun run chihun,
soco tu cha cua sandee ini cun chihun,
cua cuu sacanaan maun chihin run”,
cati ra.
8 Ta quechaha cati ra Caín chi ra Abel yani ra ti:
―Coho tichi cuhu ―cati ra.
Tacan cuu,
ta chahni ra chi yani ra nu cuahan ra tican.
9 Ta nducu tuhun ra Jehová Ndioo chi ra Caín ti:
―¿Ndaa iyo ra Abel yani cun?
―cati ra.
Ta nducahan ra Caín,
ta cati ra ti:
―Ña chite.
Ñavi yuhu cuu ra cumi chi yani yu ―cati ra.
10 Ta cati ra Ndioo chi ra ti:
―¿Ñaan cha cuu cha ni savahun?
Cha ni chahni cun yani cun,
ta ni vii cana chaa xaan ra chihin yu iti nu caa ra.
11 Ta vitin,
in rai ndavaha xaan ni cuu cun,
vati cha chahni cun yani cun,
ta chati niñi ra nu ñuhun,
ta cana chaa ra na cua tachi tuni yu chihin cun.
12 Ta chacan cua satiñu cun nu ñuhun,
ta cua sandihi chi tundee ini chihin cun,
vati ña cua nihin vahun cha cua cachi cun,
ta cua caca ndahvi cun,
ta ña cua cuu ndoo cun ni in chiyo ta ni inga chiyo nu ñuhun ñuñivi ya ―cati ra.
13 Ta cati ndico ra Caín chi ra Ndioo ti:
―Cahnu xaan cuu cha cua cutuni yu,
ta ña cua cundei.
14 Ta vitin tava cun chi nu ñuhun ya,
ta cua caca xehi iti nuun cun cha ña cua ndehun chihin yu.
Cua caca ndahvi yu in chiyo ta inga chiyo,
ta ñahni nu cua cuu coi nu ñuhun ya.
Ndaa ra cuu ni cua cahni chihin yu,
tu cha cua nanihin tiñu chihin ―cati ra Caín.
15 Ta nducahan ndico ra Ndioo chi ra,
ta cati ra ti:
―Cha ndicha cuu chi,
vati ndaa ra cuu ni cua cahni chi ra Caín,
ta ucha chaha cua cutuni racan ―cati ra.
Tacan cuu,
ta tiso ra Ndioo in tuni chi ra Caín,
vati tacan ña cua cahni ndaa ra cuu ni chihin ra tu cua nanihin tiñu chi ra.
16 Tacan cuu,
ta quee chiyo ra Caín iti nuun ra Ndioo,
ta chacoo ndahvi ra ñuhun Nod.
Iyo Nod can chiyo cana nicandi nu cuu chi Edén.a
Cuhva cha chinu tata ra Caín
17 Tacan cuu,
ta chacoo ra Caín chi ña cuu ñasihi ra,
ta cha cuñuhun sehe ña,
ta chacoo in sehe ña cha chacunani Enoc,
ta ra Caín savaha ra in ñuun,
ta chacunani chi Enoc cuenda sivi sehe ra.
18 Tacan,
ta chacoo tahan in sehe ra Enoc cha chacunani Iraad,
ta chacoo tahan sehe ra Irad,
ta chacunani ra Mehujael,
ta chacoo tahan sehe ra Mehujael,
ta sacunani ra chi ra Metusael,
ta sehe ra Metusael can chacunani Lamec.
19 Ta ra Lamec can quihin uvi ñi ñahan cha cua cuu ñasihi ra.
Ada nani ña xihna cuii can,
ta ña uvi can nani ña Zila.
20 Tacan cuu,
ta queta quivi cacu in sehe ña Ada can cha nani ra Jabaal,
ta racan cuu sutu ndihi ñi chacoo vehe ñiin sana ñi,
ta china tuvi xaan sana ra ta ra.
21 Ta chacoo in yani ra cha nani Jubaal,
ta racan cuu sutu ndihi ra sacuacu arpa,
ta tivi ra ndihi nuun tuyoo.
22 Ta queta quivi cacu tahan in sehe ña Zila can,
ta nani ra Tubal-Caín,
ta nu ni chahnu ra vaha xaan satiñu ra chi ndihi nuun caa.
Yaha quivi,
ta chacoo tahan in cuhva ra Tubal-Caín cha nani ña Naama.
23 Ta cati ra Lamec chi ña Ada chi ña Zila ñi cuu ñasihi ra ti:
“Taa ndo soho ndo cha cua cahan yu,
vati cua cahni yu chi in rai tu cua sanicuehe ra chihin yu.
Ta ni cuhva cua cahni yu chi in ra tivaa,
tu cua cani ra chihin.
24 Tu cua queta ucha chaha cua cutuni ra cua cahni chi ra Caín,
cha ndicha cuu chi,
vati uni xico chahun uvi chaha cua cutuni ra cua cahni chihin yu”,
cati ra Lamec.
25 Tacan cuu,
ta ni chacoo tucu ra Adaan chi ñasihi ra,
ta chacoo inga sehe ña,
ta cati ña ti: ”
Seet cua cunani ve,
vati maan ra Ndioo sandunuun ndico inga sehi cha cuenda ra Abel,
vati ni chahni ra Caín chihin ra”,
cati ña.
26 Ta queta quivi chacoo tahan in sehe ra Seet can,
ta chacunani ra Enoos.
Ta quivi can quechaha sacahnu ñivi chi ra Jehová Ndioo.