Ña tasoho ñivi can chi ra Ndioo
3
Tacan cuu,
ta run coo can nditi ca run cha chito run cha ña vaha,
ta ñavi ca ndihi ca ri quiti cuhu cha saquetuvi ra Jehová Ndioo,
ta cati run chi maan ña ñahan can ti:
―¿Atu ndicha cha cati ra Ndioo chihin ndo ti ña cuu cachi ndo ndihi chiti yutun cha iyo nu taqui can?
―cati run.
2 Ta cati ndico ña ñahan can chi run coo can ti:
―Cuu cachi ndi ndihi chiti yutun cha iyo nu taqui ya,
3 soco ni cati ndico ra Ndioo ti ña cua cuu cachi ndi chiti yutun cha inda mahñu ya.
Ña cua cuu cachi ndi chi,
ta ni ña cua cuu tiin ndi chi.
Tu cua cachi ndi chi,
ta cua tiin ndi chi,
cua cuvi ndicha ndi ―cati ña.
4 Ta cati ndico maan run coo can chi ña ti:
―Ña ndicha,
ña cua cuvi ndo.
5 Chito vaha ra Ndioo ti quivi cha cua cachi ndo chiti can,
cua cuu nacoto ndo cha vaha chi cha ña vaha,
ta cua cuu ndo cuhva cuu maan ra ―cati run.
6 Ta ndehe ña ñahan can yutun can cha taqui xaan chi,
ta quechaha cuni ña cachi ña chi,
ta cuni ña cha chini tuni.
Tacan,
ta quihin ña chiti yutun can,
ta chachi ña chi,
ta cha naan tahan ña chi chi ii ña,
ta chachi tahan ra chi.
7 Tacan cuu,
ta nuna cha chini tuni chi nduvi tahan ñi,
ta ndehe ñi ti ñahni sahma ñi,
ta sa nanducu ñi ndaha numa yutun higo,
ta chasi ndaa ñi chi ñi.
8 Ta chini soho ñi ndusu maan ra Jehová Ndioo cha cha cua ini can tichi nu iyo ñi,
ta chacuindi xehe ñi tichi yutun cha iyo nu taqui can cha ña cua ndehe ra Ndioo chihin ñi,
9 ta cana ra Jehová Ndioo chi ra rai can,
ta cati ra ti:
―¿Ndaa indi cun,
Adaan?
―cati ra Ndioo.
10 Ta cati ra rai can ti:
―Chini yu ndusu cun tichi nu iye tichi yutun ya,
ta niyuhvi cuni yu,
vati ñahni sahma yu,
ta chacan chacuindi xehe yu ―cati ra.
11 Ta cati ndico ra Ndioo chi ra ti:
―¿Yoo ni cati chihin cun cha ñahni sahma cun?
¿Atu ni chachi cun chiti yutun cha cati yu cha ña cua cuu cachi cun?
―cati ra.
12 Ta cati ndico ra rai can ti:
―Ña ñahan cha chaha cun cha cua cutahan chihin yu,
chaha ña chiti yutun can chihin yu,
ta chachi yu chi ―cati ra.
13 Tacan cuu,
ta cati ra Jehová Ndioo chihin ña ñahan can ti:
―¿Ñaan cha cuu cha savaha cun?
―cati ra.
Ta cati ña ñahan can ti:
―Run coo can ni sandahyu ñahan chihin yu,
ta chachi yu chiti can ―cati ña.
14 Tacan,
ta cati ndico maan ra Ndioo chi maan run coo can ti:
―Quiti cuhu ndavaha ni cua cuu cun tañu ndihi ca ri quiti cuhu cha iyo.
Cuenda cha ni sandahyu ñahan cun chi ña ñahan ya cua caca chi tichi cun,
ta yuhma ñuhun cua coho cun ndihi quivi cua coo ndito cun,
15 ta cua savahi cha cua cuxaan ini cun chi ña ñahan ya,
ta maan ña cua cuxaan ini chi maun,
ta sehe cun cua cuxaan ini chi sehe ña,
ta sehe maan ña cua cuañu xini sehe cun,
ta maun cua sanicuehe xuu chaha sehe ña ―cati ra Ndioo.
16 Ta cati tahan ra Ndioo chi ña ñahan can ti:
―Ta yoho,
cuaha xaan tundoho cua ndehe cun cha cua cuñuhun sehe cun.
Cuaha xaan ca tundoho cua ndehe cun cha cua cacu sehe cun.
Ta chi ra ii cun cua cuni cun coo cun,
soco maan ra cua cundaca ñahan chihun ―cati ra chi ña.
17 Ta chi ra rai can ni cati ra Ndioo ti:
―Cuenda cha ni tasoho cun cha ni cahan ñasihi cun,
ta chachi cun chiti yutun cha ni cati yu cha ña cua cachi cun,
cuenda chacan cua coo xaan cha ndavaha ni nu ñuhun ñuñivi.
Ta cuaha xaan tundoho,
ta cua nihin cun cha cua cachi cun ndihi quivi cha cua coo ndito cun.
18 Ta cua cuina xaan iñu nu ñuhun,
ta cua cuhva chi tundoho chihun,
ta cua cachi cun yucu cha iyo tichi cuhu cuenda cha savahun tacan.
19 Cua quee tiin nuun cun,
vati ndee xaan cua satiñu cun,
ta cua nihun cha cua cachi cun nda cua nda quivi cha cua cuhun cun tichi ñuhun,
vati chi yuhma ñuhun ni chinu cun.
Yuhma ñuhun cuu cun,
ta ñuhun cua cuu ndico cun ―cati ra Ndioo.
20 Ta cati ra Adaan ti Eva cuu sivi ñasihi ra,
ta maan ña cuu sihi ndihi ñivi ñuñivi.
21 Ta savaha ra Jehová Ndioo cha chacunduchin ñi ñiin ri quiti cuhu.
22 Tacan,
ta quechaha saxini maan ra Ndioo ti:
“Vitin rahya cuu sava ta cua maan yo.
Chito ra cha vaha ta cha ña vaha,
ta coto cua sucu tahan ra chiti yutun cha cua cuhva cha cua coo ndito ñivi,
ta cua cachi ra chi,
ta cua coo ndito tahan ra ndihi ni quivi ndihi ni tiempu”,
saxini ra Ndioo.
23 Tacan,
ta ni tava ndaa ra Ndioo chi ra Adaan tichi Edén can,
vati cua satiñu ra nu ñuhun,
ta cua nihin ra cha cua cachi ra,
vati chi ñuhun can chinu ra.
24 Chacan cuu cha tava ndaa ra Ndioo chihin ñi iti chata Edén can,
ta ni tiso ra Ndioo tatun ra iti chiyo cana nicandi cha cumi ra ta ra tican,
ta iyo machete cha cuu chi ñuhun,
ta chico chi in chiyo ta inga chiyo,
ta cumi ra ta ra nu inda yutun chaha cha cua coo ndito ñivi ndihi ni quivi ndihi ni tiempu.