2
Cuhva can ndihi savaha ra Ndioo iti siqui andivi chi ñuhun ñuñivi chi ndihi cha iyo nuun chi.
2 Ndihi chi ni savaha ra Ndioo quivi ucha can.
Queta tiñu ni savaha ra,
ta chacunda tatu ra.
3 Ta sacu-ii ra Ndioo quivi ucha can,
ta cuu chi in quivi cha cuu cuenda maan ra,
vati quivi can chacunda tatu ra cuenda ndihi tiñu cha ni savaha ra.
4 Cuhva ya quetuvi iti siqui andivi ta ñuhun ñuñivi ya cha xihna cuii.
Iyo ra ñuñivi tichi yutun tata nu cuu chi Edén
Ta nu ni ndihi savaha ra Jehová Ndioo andivi ta ñuhun ñuñivi,
5 cha xihna cuii ña ta coo cuhu nahnu nu ñuhun,
ta ni cuhu cuati ña ta coo,
vati ña ta savaha ra Jehová Ndioo cha cuun savi nu ñuhun ñuñivi,
ta ña ta coo ñivi ñuñivi,
ta satiñu ñi nu ñuhun can.
6 Ta ndaa xaan vico cachi nu ñuhun ñuñivi,
ta sanducachin chi nu ñuhun can.
7 Tacan cuu,
ta savaha ra Jehová Ndioo in ra rai chi yuhma ñuhun,
ta tivi ra xitin ra chi tati ra,
ta ni chacoo ndito ra.
8 Ta tachi ra Jehová Ndioo ndihi yutun tata nu cuu chi Edén can,
chiyo nu cana nicandi,
ta ican cha nacoo ra chi ra rai ni savaha ra.
9 Ta savaha ra Jehová Ndioo cha na cana ndihi yutun tata.
Ta taqui xaan chi,
ta vixin xaan chiti chi cha cua cuu cachi yo.
Ta mahñu can inda in yutun cha chaha chiti cha cua coo ndito ñivi ndihi ni tiempu.
Ta inda tahan inga yutun cha chaha chiti cha chaha cha chini tuni chi ñivi,
ta cua coto ñi ñaan cha cuu cha vaha ta ñaan cha cuu cha ndavaha ni.
10 Ta iyo in yuta yaha mahñu Edén can,
ta natahvi cumi soco chi.
11 Ta sivi cha xihna cuii can cuu Pisoon ta candaa yuta ya cuu ndihi ñuhun Havilaa,
ta iyo xaan xuhun cuaan ican.
12 Ta vaha xaan xuhun cuaan iyo ican,
ta iyo tahan cha cuu bedelio sucha yutun cha cuu nduta vixin chahan cuu chacan,
ta iyo tahan yuu taqui cha nani ónice.
13 Ta yuta uvi can nani Gihoon,
ta chico chi candaa niniin ñuhun Cuus.
14 Ta yuta uni can cuu Tigri.
Yuta can cuu cha cuahan iti chiyo nu cana nicandi cha cuu ñuhun Asiria,
ta yuta cumi can cuu Euufrate.
15 Ta quihin ra Jehová Ndioo chi ra rai can,
ta cha nacoo ra chi ra nu cuu chi Edén can cha cua satiñu ra nuun chi,
ta cua cumi ra chi.
16 Ta tava tiñu ra Jehová Ndioo chi ra rai can,
ta cati ra chi ra ti:
“Cua cuu cachi cun ndihi chiti yutun cha iyo nu iyo cun,
17 soco chiti yutun cha chaha cha chini tuni vaha ta cha ña vaha ña cua cuu cachi cun chi,
vati quivi cha cua cachi cun chiti yutun can,
cua cuvi ndicha cun”,
cati ra.
18 Ta cati ndico tucu ra Jehová Ndioo ti:
“Ña vaha cha iyo ituhun ni maan ra rai can.
Cua na nducu yu yoo cua tindee chihin ra”,
cati ra.
19 Ni savaha ra Jehová Ndioo ndihi cha iyo nu ñuhun,
savaha ra ndihi ri quiti cuhu cha iyo tichi cuhu,
savaha ra ndihi ri saa tati iti siqui andivi,
ta quichi ndaca ra chi ri ta ri nu iyo ra Adaan cha cua ndehe ra yoso cuhva cua cunani ri.
Ta cuhva cha tiso ra Adaan can sivi ri,
cuhva can ndoo cha nani ri ta ri.
20 Tiso ra Adaan can sivi ndihi ri quiti cuhu chi ndihi ri saa tati iti siqui chi ndihi ri cuu sana ñivi cha chica cuu tichi cuhu,
soco chi maan ra Adaan yoni yoo iyo cha cua tindee chihin ra.
21 Tacan cuu,
ta savaha ra Jehová Ndioo cha na cua cusu naan ini ra Adaan,
ta nu quixi ra Adaan can ni tava ra in iquin nahan ra,
ta chasi ndico ra nu tava ra chi chi.
22 Ta chi iquin nahan cha ni tava ra Jehová Ndioo chi ra rai can savaha ra in ña ñahan,
ta chaha cuenda ra Ndioo chi ña chihin ra.
23 Tacan cuu,
ta cati ra Adaan ti:
“Vitin ndicha,
ñahya chinu ña chi iquin yu chi cuñu ñuhun yu,
ta chacan cua cunani ña ‘ñahan’,
vati chi iquin cuñu main ni savaha ra Ndioo chihin ña”,
cati ra.
24 Ta chacan cuu cha cua quee siin ra rai can chi sutu ra chi sihi ra,
ta cua natahan ra chi ñasihi ra,
ta cua cuu ñi in ni iquin cuñu.
25 Tacan,
ta nduvi tahan ñi ñahni cha ndichin ñi,
ni ra Adaan ni ñasihi ra,
ta ña cahan nuun ñi.